એક જ પરિવારની બે પેઢીઓને આઉટ કરી રચ્યો ‘નવો ઇતિહાસ’, 21 વર્ષના ગાળામાં પિતા-પુત્ર બંનેને પેવેલિયનનો રસ્તો બતાવ્યો

ક્રિકેટમાં રેકોર્ડ્સ બનતા અને તૂટતા રહે છે પરંતુ અમુક સિદ્ધિઓ એવી હોય છે કે, જે ઇતિહાસમાં ખાસ સ્થાન બનાવી લે છે. ઇંગ્લેન્ડના દિગ્ગજ ફાસ્ટ બોલર જેમ્સ એન્ડરસને આવો જ એક અનોખો પરાક્રમ કરી બતાવ્યો છે. તેણે 21 વર્ષના અંતરાલમાં એક જ પરિવારની બે પેઢીઓને આઉટ કરવાનો કમાલ કર્યો છે.

પિતા પછી હવે પુત્રનો કર્યો શિકાર

વાસ્તવમાં, એન્ડરસને વર્ષ 2005 માં નોર્થમ્પટનશાયરના બેટ્સમેન ડેવિડ સેલ્સને આઉટ કર્યો હતો. હવે 21 વર્ષ પછી તેણે તે જ ટીમ માટે રમી રહેલા તેમના પુત્ર જેમ્સ સેલ્સને પણ પેવેલિયનનો રસ્તો બતાવી દીધો છે. એન્ડરસને લંકાશાયર અને નોર્થમ્પટનશાયર વચ્ચે રમાઈ રહેલી કાઉન્ટી ક્રિકેટ મેચમાં જેમ્સ સેલ્સને આઉટ કરીને આ સિદ્ધિ મેળવી હતી.

જેમ્સ એન્ડરસનનો આ પરાક્રમ માત્ર એક રેકોર્ડ નથી પરંતુ તેની ફિટનેસ, અનુભવ અને લાંબી કારકિર્દીનું ઉત્તમ ઉદાહરણ છે. 21 વર્ષના ગાળામાં પિતા અને પુત્ર બંનેને આઉટ કરવા એ ક્રિકેટના ઇતિહાસમાં એક યાદગાર ક્ષણ બની ગઈ છે. આ મેચમાં કેપ્ટન એન્ડરસને પિતાને આઉટ કર્યાના 21 વર્ષ બાદ પુત્રને પોતાનો શિકાર બનાવ્યો હતો.

આટલું જ નહીં, એન્ડરસને 5 વિકેટ ઝડપીને સૌને ચોંકાવી દીધા હતા. તેના આ શાનદાર પ્રદર્શનને કારણે નોર્થમ્પટનશાયરની ટીમ 200 રન પહેલા જ પોતાની 9 વિકેટ ગુમાવી બેઠી હતી. દિવસના અંતે ટીમનો સ્કોર 9 વિકેટે 215 રન હતો. આ પહેલા લંકાશાયરે પોતાની પ્રથમ ઇનિંગમાં 384 રનનો સ્કોર ઊભો કર્યો હતો.

43ની ઉંમરે પણ જલવો બરકરાર

43 વર્ષનો એન્ડરસન હજુ પણ ક્રિકેટમાં એક્ટિવ છે અને શાનદાર પ્રદર્શન કરી રહ્યો છે. એન્ડરસને વર્ષ 2024 માં ઇન્ટરનેશનલ ક્રિકેટમાંથી નિવૃત્તિ લીધી હતી. તેના નામે ટેસ્ટ ક્રિકેટમાં 700થી વધુ વિકેટ છે, જે કોઈપણ ફાસ્ટ બોલર માટે એક ઐતિહાસિક સિદ્ધિ છે. આમ છતાં, તે ડોમેસ્ટિક ક્રિકેટમાં સતત રમી રહ્યો છે અને પોતાની ટીમ માટે મહત્વનું યોગદાન આપી રહ્યો છે. ગત સિઝનમાં એન્ડરસને લંકાશાયરની કેપ્ટનશીપ કરી હતી, જ્યાં ટીમે સારું પ્રદર્શન કર્યું હતું. ત્યારબાદ તેને કાયમી કેપ્ટન બનાવવામાં આવ્યો હતો. તેનું લક્ષ્ય આ સિઝનમાં ટીમને ફર્સ્ટ ડિવિઝનમાં પ્રમોશન અપાવવાનું છે.

Breaking News : શનિવારે રમાયેલી ડબલ હેડર મેચના પૈસા વસૂલ ખેલાડીઓ, જુઓ ફોટો