Mumbai Indians : IPL 2022 માં આ ખેલાડીઓએ તેમના પ્રદર્શનથી મુંબઈ ઈન્ડિયન્સને નિરાશ કર્યા હતા

ઇન્ડિયન પ્રીમિયર લીગ (IPL 2022) માં 5 વખતની ચેમ્પિયન મુંબઈ ઈન્ડિયન્સ (Mumbai Indians) માટે ખૂબ જ નિરાશાજનક રહ્યું. આ સિઝનમાં રોહિત શર્મા (Rohit Sharma) ની ટીમ માત્ર 4 મેચ જીતી શકી હતી. જ્યારે 10 મેચમાં હારનો સામનો કરવો પડ્યો હતો. મુંબઈ ઈન્ડિયન્સ આ સિઝનમાં પોઈન્ટ ટેબલમાં 8 પોઈન્ટ સાથે 10માં નંબરે છે. આ સિઝનમાં કેપ્ટન રોહિત શર્મા સહિત ઘણા ખેલાડીઓ ફ્લોપ રહ્યા હતા. આજે આપણે એ ખેલાડીઓના પ્રદર્શન પર નજર નાખીશું જેમણે પોતાના ખરાબ પ્રદર્શનથી પાંચ વખતની ચેમ્પિયન ટીમને નિરાશ કરી હતી. આ યાદીમાં ઘણા મોટા નામ સામેલ છે.

કેરોન પોલાર્ડ
કિરોન પોલાર્ડ (Kieron Pollard) 2010થી મુંબઈ ઈન્ડિયન્સ સાથે જોડાયેલો છે. પોલાર્ડે આ સમયગાળા દરમિયાન ઘણી શાનદાર ઈનિંગ્સ રમી અને મુંબઈ ઈન્ડિયન્સને મુશ્કેલ સમયમાંથી બહાર કાઢ્યું. T20 ના સૌથી સફળ ઓલરાઉન્ડરોમાંથી એક છે. પરંતુ આ વર્ષ આ ઓલરાઉન્ડર માટે નિરાશાજનક રહ્યું. આ કેરેબિયન ઓલરાઉન્ડર આ સિઝનમાં બેટ અને બોલ બંનેમાં નિષ્ફળ રહ્યો હતો. પોલાર્ડ આ સિઝનમાં 11 મેચમાં માત્ર 144 રન જ બનાવી શક્યો હતો. આ દરમિયાન તેની એવરેજ 14.40 ની હતી. બોલિંગમાં પણ પોલાર્ડ કંઈ ખાસ કરી શક્યો ન હતો. આ સિઝનમાં તેણે 4 વિકેટ લીધી હતી. જ્યારે ઈકોનોમી 8.93 હતી.

ટાઇમલ મિલ્સ
મુંબઈ ઈન્ડિયન્સ (MI) એ ઈંગ્લેન્ડના ફાસ્ટ બોલર ટાઈમલ મિલ્સ (Tymal Mills) ને મેગા ઓક્શનમાં રૂ. 1.5 કરોડની કિંમતે ખરીદ્યો હતો. પરંતુ મિલ્સની કામગીરી નિરાશાજનક રહી હતી. તે આ સિઝનમાં 5 મેચમાં 6 વિકેટ જ લેવામાં સફળ રહ્યો હતો. તેની ઇકોનોની પણ પ્રતિ ઓવર 11 રનથી વધુ હતું. ત્યાર બાદ મિલ્સને પ્લેઈંગ ઈલેવનમાં જગ્યા મળી ન હતી. 4 વર્ષ પછી આ લીગમાં રમી રહેલી મિલ્સ પગની ઘૂંટીની ઈજાને કારણે આખી સિઝન રમી શક્યો ન હતો.

રોહિત શર્મા
આઈપીએલના ઈતિહાસમાં સૌથી વધુ સુકાની રહેલા રોહિત શર્મા (Rohit Sharma) આ સિઝનમાં પોતાના પ્રદર્શનથી ઘણો નિરાશ હતો. હકીકતમાં કેપ્ટનશિપની સાથે સાથે રોહિત શર્મા બેટિંગમાં પણ નિષ્ફળ રહ્યો હતો. રોહિત શર્મા માટે આ સિઝન અત્યાર સુધીની સૌથી ખરાબ હતી. રોહિત શર્મા આ સિઝનમાં 14 મેચમાં માત્ર 268 રન બનાવી શક્યો હતો. આ દરમિયાન શર્માનો સ્ટ્રાઈક રેટ 120.18 હતો. જ્યારે સરેરાશ 19.14 ની હતી. તો આ સિઝનમાં રોહિત શર્માનો સર્વશ્રેષ્ઠ સ્કોર 48 રન હતો.