IPL Mega Auction: દિલ્હી અને લખનૌ વચ્ચે અદલાબદલી, 3 ટીમોને મળ્યા નવા કેપ્ટન !

IPL 2025 સીઝન માટે સાઉદી અરેબિયાના જેદ્દાહમાં યોજાયેલી મેગા હરાજીમાં જે આગાહી કરવામાં આવી રહી હતી તે થયું. હરાજીમાં પ્રવેશેલા કેટલાક દિગ્ગજ ખેલાડીઓ માટે જબરદસ્ત બોલીઓ લગાવવામાં આવી હતી અને તેમના પર ઘણા પૈસાનો વરસાદ થયો હતો.

પહેલા 12 ખેલાડીઓની બોલીએ ઘણી ટીમોના બજેટને હચમચાવી નાખ્યું પરંતુ આ દરમિયાન કેટલીક ટીમોને એવા કેપ્ટન પણ મળી ગયા જેના માટે તેઓ ખાસ આ હરાજીમાં આવ્યા હતા. દિલ્હી કેપિટલ્સ અને લખનૌ સુપર જાયન્ટ્સે આ મામલે લગભગ અદલાબદલી કરી હતી.

12 મોટા ખેલાડીઓનો સમાવેશ

મેગા ઓક્શનના પ્રથમ દિવસે માર્કી પ્લેયર્સ સાથે બિડિંગની શરૂઆત થઈ હતી, જેમાં 12 મોટા ખેલાડીઓનો સમાવેશ કરવામાં આવ્યો હતો. રિષભ પંત, કેએલ રાહુલ, શ્રેયસ અય્યર, જોસ બટલર જેવા મોટા ખેલાડીઓ હતા, જેમના માટે મોટી બોલીની અપેક્ષા હતી. આવું જ થયું, જ્યાં પંતે IPL ઓક્શનના ઈતિહાસમાં સૌથી મોંઘા ખેલાડીનો રેકોર્ડ બનાવ્યો. લખનૌ સુપર જાયન્ટ્સે તેના માટે 27 કરોડ રૂપિયાની બોલી લગાવીને ઈતિહાસ રચ્યો હતો.

દિલ્હી કેપિટલ્સ અને લખનૌ સુપર જાયન્ટ્સનો રસપ્રદ મામલો

આ મેગા ઓક્શન ઘણી ટીમો માટે ખૂબ જ મહત્વપૂર્ણ બનવાની હતી અને તેનું એક કારણ કેપ્ટનોની જરૂરિયાત પણ હતી. દિલ્હી, બેંગલુરુ, પંજાબ, કોલકાતા અને લખનઉ જેવી ટીમોને નવા કેપ્ટનની જરૂર હતી અને કેટલીક ટીમોએ શરૂઆતના 12 ખેલાડીઓમાં પોતાના કેપ્ટનની સમસ્યાનો ઉકેલ લાવી દીધો હતો. આમાં સૌથી રસપ્રદ મામલો દિલ્હી કેપિટલ્સ અને લખનૌ સુપર જાયન્ટ્સનો હતો, જેમણે પોતાના કેપ્ટનની અદલાબદલી કરી હતી.

ભારતીય બેટ્સમેન કેએલ રાહુલને લગભગ અડધી કિંમતે ખરીદ્યો

હા, લખનૌ સુપર જાયન્ટ્સે ઋષભ પંત પર 27 કરોડ રૂપિયાની રેકોર્ડ બોલી લગાવી હતી. એ પણ સ્પષ્ટ થઈ ગયું કે લખનૌએ તેમને કેપ્ટનશીપના ઉમેદવાર તરીકે ધ્યાનમાં રાખીને આ બોલી લગાવી હતી. પંત ગત સિઝનમાં દિલ્હીનો કેપ્ટન હતો. બીજી તરફ દિલ્હી કેપિટલ્સે ભારતીય બેટ્સમેન કેએલ રાહુલને લગભગ અડધી કિંમતે ખરીદ્યો હતો. દિલ્હીએ તેના માટે માત્ર 14 કરોડ રૂપિયા ખર્ચ્યા હતા, જે અપેક્ષા કરતા ઘણા ઓછા જણાતા હતા. રાહુલ અગાઉ લખનઉના કેપ્ટન હતા. જો કે હાલ એ સ્પષ્ટ નથી થયું કે શું દિલ્હી તેને કેપ્ટન બનાવશે? રાહુલના અનુભવને જોતા લાગે છે કે દિલ્હી આ પગલું ભરી શકે છે.

શ્રેયસ અય્યર માટે આશ્ચર્યજનક રકમ ખર્ચી

આ બંને સિવાય પંજાબ કિંગ્સને પણ તેમનો કેપ્ટન મળ્યો છે. પંજાબ, જે 110 કરોડ રૂપિયાના સૌથી મોટા બજેટ સાથે હરાજીમાં પ્રવેશ્યું હતું, તેણે ભારતીય બેટ્સમેન શ્રેયસ અય્યર માટે 26.75 કરોડ રૂપિયાની આશ્ચર્યજનક રકમ ખર્ચી હતી. આ પણ સ્પષ્ટ સંકેત હતો કે પંજાબે માત્ર ઐયરને કેપ્ટન બનાવવા માટે આટલી ઊંચી બોલી લગાવી હતી. ઐયરની કપ્તાની હેઠળ કોલકાતાએ ગત સિઝનમાં ત્રીજું ટાઇટલ જીત્યું હતું.