IND vs SL: શ્રીલંકન બોલરો સામે ભારત 225 રનમાં સમેટાયુ, પૃથ્વી શો ફીફટી ચુક્યો, સાકરિયા અણનમ
ભારતીય ટીમે (Team India) શ્રેણી પોતાને નામ કરી લીધી હતી. પરંતુ શ્રીલંકાને ક્લીન સ્વિપ કરવાનો ઈરાદો પાર પાડવા રુપ સ્કોર બનાવવો મુશ્કેલ બની ગયો હતો. ભારતીય બેટ્સમેનો શાનદાર રમતને મોટી ઈનીંગમાં ફેરવી શક્યા નહોતા.
ભારત અને શ્રીલંકા (India vs Sri Lanka) વચ્ચે આજે કોલંબોમાં વન ડે શ્રેણીની અંતિમ મેચ રમાઈ રહી છે. ભારતે ટોસ જીતીને પ્રથમ બેટીંગ પસંદ કરી હતી. ભારતે 5 નવા ચહેરાને ટીમમાં સ્થાન આપ્યુ હતુ. જોકે ભારત પહેલાથી જ શ્રેણીને પોતાના હસ્તગત કરી ચુક્યુ છે. વરસાદના અવરોધને લઈને મેચને 3 ઓવર ઘટાડી દેવાઈ હતી. ભારતીય ટીમે 43.1 ઓવરમાં 225 રન કર્યા હતા. શરુઆત ધમાકેદાર રહેતા એક સમયે એમ લાગી રહ્યુ હતુ કે ભારતીય ટીમ એક મોટો સ્કોર શ્રીલંકા સામે ખડકશે. પરંતુ મોટી ઈનીંગના અભાવે એ આશા ઠગારી નિવડી હતી.
ભારતની બેટીંગ ઈનીંગ
ભારતીય ટીમ (Team india)માં 5 નવા ચહેરાઓને સમાવવામાં આવ્યા હતા. ભારતીય ટીમમાં નવા સમાવવામાં આવેલા ખેલાડી પૈકી સંજૂ સેમસને શાનદાર રમત રમી હતી. ઈનીંગની શરુઆત ભારતે આક્રમક રીતે કરી હતી. પરંતુ કેપ્ટન શિખર ધવન ઉછળતા બોલને રમવામાં થાપ ખાઈ જતા વિકેટ ગુમાવી બેઠો હતો. શિખર ધવને 11 બોલમાં 13 રન કર્યા હતા.
પૃથ્વી શો લયમાં રમી રહ્યો હતો. તે 1 રન માટે અર્ધશતક ચુકી ગયો હતો. તેણે 49 બોલમાં 49 રન કર્યા હતા. આ દરમ્યાન 8 ચોગ્ગા લગાવ્યા હતા. સંજૂ સેમસને 46 બોલમાં 46 રન કર્યા હતા. તેણે 1 સિક્સ અને 5 ચોગ્ગા લગાવ્યા હતા. સૂર્યકુમાર યાદવે 40 રન કર્યા હતા. જ્યારે હાર્દિક પંડ્યા ફરી એકવાર ઝડપથી આઉટ થયો હતો. તેણે 19 રન
બનાવ્યા હતા.
શ્રીલંકાની બોલીંગ ઈનીંગ
બીજી વન ડે મેચમાં શ્રીલંકન બોલરો ભારતીય ટીમ પર હાવી રહ્યા હતા. ફરી એકવાર તક મળતા જ ભારતીય બેટ્સમેનો પર હાવી થતા મોટી ઈનીંગ ભારતીય બેટ્સમેનો રમી શક્યા નહોતા. પ્રવિણ જયાવિક્રમાએ 3 વિકેટ ઝડપી હતી. પ્રવિણે 10 ઓવરમાં 59 રન આપ્યા હતા. અકિલા ધનંજયાએ 3 વિકેટ ઝડપી હતી. તેણે 10 ઓવરમાં 44 રન આપ્યા હતા. દશમંથા ચામિરાએ 2 વિકેટ, દાશુન શનાકા અને ચામિકા કરુણારત્નેએ 1-1 વિકેટ ઝડપી હતી.