IND vs HKG: વિરાટ કોહલી સ્ક્રિન પર એવુ તે શુ જોઈ ગયો કે મોં ખુલ્લુ જ રહી ગયુ ? Video

એશિયા કપ 2022 (Asia Cup 2022) માં હોંગકોંગ સામેની મેચમાં વિરાટ કોહલી (Virat Kohli) એ પોતાનું ફોર્મ બતાવ્યું અને 44 બોલમાં અણનમ 59 રન બનાવ્યા. આ ઇનિંગ પછી તેનો આત્મવિશ્વાસ પણ વધ્યો અને કોહલીની શાનદાર ઇનિંગનું એક કારણ કદાચ પ્રશંસકો પણ હતા, જેમણે આ મેચમાં તેના પર એટલો વિશ્વાસ વ્યક્ત કર્યો કે તેનું મોં જ એ જોઈને ખુલ્લું રહી ગયું. વાસ્તવમાં, મેચ દરમિયાન, ટીવીના દર્શકો માટે સ્ક્રીન પર એક પોલ બતાવવામાં આવ્યો હતો, જેના પર ચાહકોને મત આપવા માટે કહેવામાં આવ્યું હતું.

રોહિત, રાહુલ અને કોહલી માટે મતદાન

ચાહકોને પૂછવામાં આવ્યું કે રોહિત શર્મા, કેએલ રાહુલ અને વિરાટ કોહલીમાંથી કોણ ભારત માટે હોંગકોંગ સામે સૌથી વધુ રન બનાવશે. પ્રશંસકોએ આના પર મતદાન કરવામાં વધુ સમય ન લગાવ્યો અને 51 ટકા ચાહકોએ કોહલીની તરફેણમાં મતદાન કર્યું. વાત 5મી ઓવરની છે, જ્યારે ભારતે કોઈ પણ નુકશાન વિના 33 રન બનાવ્યા હતા અને રોહિત અને રાહુલ ક્રિઝ પર હતા. સ્ક્રીન પર વોટિંગ શો થઈ રહ્યો હતો અને તે જ સમયે કેમેરા કોહલી તરફ વળ્યો. જે પેડ પહેરીને તૈયાર હતો અને ડ્રેસિંગ રૂમની બાલ્કનીમાં અવેશ ખાન સાથે વાત કરી રહ્યો હતો.

કોહલીનું પરફેક્ટ ટાઈમિંગ

દરમિયાન સ્ક્રીન પર મતદાન દર્શાવવામાં આવ્યું હતું. આ દરમિયાન સ્ક્રીન પર કે મેદાન પર જે કંઈ થયું તે જોઈને કોહલી આશ્ચર્યચકિત થઈ ગયો. કોહલીની પ્રતિક્રિયાની પરફેક્ટ ટાઈમિંગ ખૂબ જ વાયરલ થઈ રહી છે. ચાહકોની આગાહીઓ પણ સાચી સાબિત થઈ. રોહિત 13 બોલમાં માત્ર 21 રન જ બનાવી શક્યો, જ્યારે કેએલ રાહુલ પણ માત્ર 36 રન જ બનાવી શક્યો. એટલે કે આ ત્રણ બેટ્સમેનોમાં કોહલીએ સૌથી વધુ રન બનાવ્યા.

ભૂતપૂર્વ ભારતીય કેપ્ટને 40 બોલમાં પોતાની T20 કારકિર્દીની 31મી ફિફ્ટી પૂરી કરી હતી. જો કે આ મેચમાં ભારત તરફથી સૂર્યકુમાર યાદવે સૌથી વધુ રન બનાવ્યા હતા. તેણે 26 બોલમાં અણનમ 68 રનની ઝડપી ઈનિંગ્સ રમી હતી. સૂર્યકુમારે 22 બોલમાં પોતાની ફિફ્ટી પૂરી કરી હતી. તેણે પોતાની ઇનિંગમાં 6 ફોર અને 6 સિક્સર ફટકારી હતી. ભારતે હોંગકોંગ સામે 40 રને જીત મેળવીને સુપર 4માં પ્રવેશ કર્યો હતો.