IND vs ENG : લોર્ડ્સ ટેસ્ટમાં મોટો હંગામો, કેપ્ટન શુભમન ગિલ અમ્પાયર પર ભડક્યો

લોર્ડ્સ ટેસ્ટના બીજા દિવસે ટીમ ઈન્ડિયાએ 3 વિકેટ લઈને શાનદાર શરૂઆત કરી, ત્યારબાદ અચાનક બોલ બદલવાની ફરજ પડી, જે બાદ મેદાનમાં અલગ માહોલ જોવા મળ્યો. કેપ્ટન શુભમન ગિલ અને મોહમ્મદ સિરાજ અમ્પાયર સાથે દલીલ કરતા જોવા મળ્યા. આ બધું બોલને કારણે થયું, જેના વિશે આ શ્રેણીમાં પહેલાથી જ પ્રશ્નો ઉભા થયા હતા. મેચના બીજા દિવસે, ભારતીય કેપ્ટન અને બાંગ્લાદેશી અમ્પાયર સૈકત શરાફુદ્દૌલા વચ્ચે બોલમાં ફેરફારને લઈને આ ચર્ચા થઈ.

બોલ બદલ્યા બાદ વિવાદ

શુક્રવાર, 11 જુલાઈ, લોર્ડ્સ ટેસ્ટના બીજા દિવસે, ટીમ ઈન્ડિયાએ શાનદાર શરૂઆત કરી અને સ્ટાર ફાસ્ટ બોલર જસપ્રીત બુમરાહે અડધા કલાકમાં ઈંગ્લેન્ડને 3 મોટા ઝટકા આપ્યા. આમાં નવા બોલે પણ મોટી ભૂમિકા ભજવી, જે બોલને સ્વિંગ અને સીમ કરવામાં મદદ કરી રહ્યો હતો. મેચના પહેલા દિવસે 80.1 ઓવર પછી આ બોલ લેવામાં આવ્યો હતો. આવી સ્થિતિમાં, એવી અપેક્ષા રાખવામાં આવી રહી હતી કે નવો બોલ હોવાથી તે લાંબા સમય સુધી ચાલશે, પરંતુ ડ્યુક્સ બોલ અંગે ઉઠાવવામાં આવેલા પ્રશ્નો આ વખતે પણ સાચા સાબિત થયા અને માત્ર 10.3 ઓવર ફેંક્યા પછી તેને બદલવો પડ્યો.

બોલના આકારમાં ફેરફારની ફરિયાદ

બન્યું એવું કે ઈંગ્લેન્ડની ઈનિંગની 91મી ઓવરમાં ચોથો બોલ નાખ્યા પછી, મોહમ્મદ સિરાજે અમ્પાયરને બોલના આકારમાં ફેરફાર અંગે ફરિયાદ કરી. અમ્પાયર સૈકત શરાફુદ્દૌલાએ તરત જ તેને તપાસ્યો અને સ્પષ્ટ થયું કે બોલનો આકાર બદલાઈ ગયો છે. આવી સ્થિતિમાં, તેને બદલવાનો નિર્ણય લેવામાં આવ્યો અને પછી ઘણા બોલથી ભરેલા બોક્સમાંથી એક બોલ પસંદ કરવામાં આવ્યો. પરંતુ ભારતીય ટીમને આ બોલ આપવામાં આવતાની સાથે જ તેના પર સવાલો ઉભા થયા હતા.

ગિલ અમ્પાયર પર ગુસ્સે થયો

કેપ્ટન ગિલ સીધો અમ્પાયર શરાફુદ્દૌલા પાસે ગયો અને તેને આપવામાં આવેલા બોલ સામે વાંધો ઉઠાવ્યો. ગિલની ફરિયાદ એવી હતી કે આ બોલ બિલકુલ 10-11 ઓવર જૂનો લાગતો નથી, જ્યારે નિયમો અનુસાર બોલ જ્યારે બદલવામાં આવે છે ત્યારે મૂળ બોલ જેટલો જૂનો અથવા લગભગ તેટલો જ જૂનો હોવો જોઈએ. પરંતુ અમ્પાયરે ગિલના નિવેદનને નકારી કાઢ્યું અને ભારતીય કેપ્ટન આના પર ગુસ્સે થયો.

અમ્પાયરે ખેલાડીઓની વાત ન માની

ગિલે ગુસ્સામાં અમ્પાયરના હાથમાંથી બોલ છીનવી લીધો અને તેની સાથે દલીલ કરવા લાગ્યો. પછી બોલ સિરાજ પાસે પહોંચતાની સાથે જ તેણે અને આકાશ દીપે પણ તેના પર સવાલ ઉઠાવ્યા. સિરાજ પણ અમ્પાયર પાસે ગયો અને કહેવા લાગ્યો કે આ બોલ બિલકુલ 10 ઓવર જૂનો લાગતો નથી, પરંતુ અમ્પાયરે તેને બોલિંગ માટે પાછા ફરવા કહ્યું.

ગાવસ્કર-પુજારાએ પણ સવાલ ઉઠાવ્યા

આ દરમિયાન કોમેન્ટ્રી કરી રહેલા ભૂતપૂર્વ ભારતીય કેપ્ટન અને મહાન બેટ્સમેન સુનીલ ગાવસ્કરે પણ આ અંગે પ્રશ્નો ઉઠાવ્યા હતા. ગાવસ્કરે સ્પષ્ટપણે કહ્યું હતું કે ટીમ ઈન્ડિયાને આપવામાં આવેલ બોલ 10 ઓવરનો નહીં પણ 20 ઓવર જૂનો લાગતો હતો કારણ કે તેમાં પાછલા બોલમાં દેખાતી ચમક નહોતી. તેમણે અમ્પાયરના આ નિર્ણય પર પ્રશ્નો ઉઠાવ્યા હતા. ચેતેશ્વર પૂજારાએ એ પણ નિર્દેશ કર્યો હતો કે આ બોલ આવ્યા પછી, ભારતીય બોલરોને પહેલા જેવો સ્વિંગ મળી રહ્યો નથી.

આ પણ વાંચો: Breaking news : ટીમ ઈન્ડિયાને મોટો ઝટકો, રિષભ પંત લોર્ડ્સ ટેસ્ટમાંથી આટલા દિવસો માટે થયો બહાર

ક્રિકેટ સહિત રમતગમતના દરેક સમાચાર વાંચવા અહીં ક્લિક કરો