IND vs AUS: ગ્લેન મેક્સવેલ થર્ડ અંપાયરના નિર્ણય પર નારાજ, અક્ષર પટેલના સીધા થ્રો પર ‘વિચિત્ર’ રન આઉટ-Video

ભારતીય ક્રિકેટ ટીમ (Indian Cricket Team) અને રન આઉટ. સતત બે દિવસમાં ટીમ ઈન્ડિયાએ વિરોધી ટીમના ખેલાડીને રન આઉટ કર્યા, જેના કારણે ભારે ચર્ચા જાગી છે. પ્રથમ લોર્ડ્સમાં, ભારતીય મહિલા ટીમની ઓલરાઉન્ડર દીપ્તિ શર્માએ નોન-સ્ટ્રાઈક એન્ડમાં ઈંગ્લેન્ડના બેટ્સમેનને રન આઉટ કર્યો, જેણે ફરીથી એ જ જૂની ‘સ્પોર્ટ્સમેનશિપ’ ચર્ચાને જન્મ આપ્યો. લગભગ 24 કલાક બાદ હૈદરાબાદમાં અન્ય એક ભારતીય ઓલરાઉન્ડર અક્ષર પટેલે (Axar Patel) ગ્લેન મેક્સવેલને (Glenn Maxwell) ગજબ વિચિત્ર રન આઉટ કર્યો હતો. જે જોઈને ઘડીકભર માથુ ખંજવાળી ઉઠો. આનાથી પણ ચર્ચા થઈ, જોકે બસ તેના વિશે કોઈ વિવાદ નહોતો સર્જાયો.

શનિવારે 24 સપ્ટેમ્બરે લોર્ડ્સમાં, દીપ્તિ શર્માએ ઈંગ્લેન્ડના બેટ્સમેન ડીનને બોલ ફેંકતા પહેલા ક્રિઝ છોડવા બદલ રન આઉટ કરી દીધી હતી. દર વખતની જેમ આ વખતે પણ સમગ્ર અંગ્રેજી મીડિયા, ઈંગ્લેન્ડના ક્રિકેટરો અને ઈંગ્લિશ ચાહકોએ આ અંગે હોબાળો મચાવ્યો હતો. આ અંગે ચર્ચા ચાલુ છે. લોર્ડ્સથી હજારો માઈલ દૂર હૈદરાબાદમાં ભારત અને ઓસ્ટ્રેલિયા વચ્ચેનો રનઆઉટ પણ ચર્ચાનો વિષય બન્યો હતો.

મેક્સવેલ રન આઉટનો નિયમ ભૂલી ગયો

ભારત અને ઓસ્ટ્રેલિયા વચ્ચેની T20 શ્રેણીની ત્રીજી અને છેલ્લી મેચમાં પ્રથમ બેટિંગ કરી રહેલો ગ્લેન મેક્સવેલ આ રનઆઉટનો શિકાર બન્યો હતો. આઠમી ઓવરમાં, મેક્સવેલે યુઝવેન્દ્ર ચહલનો ત્રીજો બોલ ડીપ ફાઈન લેગ તરફ રમ્યો અને બે રન મેળવવા માટે દોડ્યો. બીજો રન પૂરો કરે તે પહેલા જ અક્ષર પટેલનો સીધો થ્રો સ્ટમ્પ પર વાગ્યો અને રનઆઉટની અપીલ કરી.

જ્યારે ત્રીજા અમ્પાયરે રિપ્લેનો આશરો લીધો ત્યારે એવું દર્શાવવામાં આવ્યું હતું કે બોલના આગમન પહેલા જ વિકેટકીપર દિનેશ કાર્તિકના ગ્લોવ્સમાંથી એક બેઈલ પડી ગઈ હતી, જ્યારે બાદમાં બોલે બીજી બેઈલ ઉડાવી દીધી હતી.

મેક્સવેલ સહિત મોટાભાગના ચાહકો સમજી ગયા હતા કે, એકવાર દિનેશ કાર્તિકે બોલ ઝડપ્યા વિના સ્ટમ્પ પરથી બેઈલ નિચે પાડી દીધી તો રન આઉટની શક્યતા ખતમ થઈ જશે. પરંતુ ત્રીજા અમ્પાયરે તેને આઉટ જાહેર કરતા જ મેક્સવેલ આશ્ચર્યચકિત હતો અને અમ્પાયરને પૂછવા લાગ્યો કે કેવી રીતે? આવો નિર્ણય કેમ આપવામાં આવ્યો હતો?

નિયમ શું કહે છે?

દેખીતી રીતે મેક્સવેલ કદાચ નિયમથી અજાણ હતો. ICC ના રન આઉટ માટેના કાયદા હેઠળ, જો સ્ટમ્પની ઉપરના બે બેઈલમાંથી એક પ્રથમ પડે છે, તો બીજી બેઈલને નિચે પાડીને બેટ્સમેનને રનઆઉટ થઈ શકા છે. એટલે કે, એકંદરે, બેટ્સમેન ક્રિઝ પર પહોંચે તે પહેલાં, બંને બેઈલમાંથી કોઈપણ એકને નિચે પાડવી જરૂરી છે, જેથી તે રનઆઉટ થઈ શકે. મેક્સવેલના કિસ્સામાં પણ એવું જ થયું. કાર્તિકની ઉતાવળને કારણે, એક બેઈલ પહેલા પડી ગઈ, પરંતુ અક્ષર પટેલનો થ્રો એટલો સચોટ હતો કે બોલ સીધો અન્ય સ્ટંપ પર જઈને અથડાયો અને ઓફ સાઈડની બેઈલ હવામાં ઉડી ગઈ હતી.