ચેમ્પિયન્સ ટ્રોફીને લઈ મોટું અપડેટ, ICCની બેઠક બાદ પણ ઉકેલ ન મળ્યો, હવે આ તારીખે લેવાશે નિર્ણય
ચેમ્પિયન્સ ટ્રોફી 2025ને લઈને ભારત અને પાકિસ્તાન વચ્ચે વિવાદ ચાલુ છે. આવી સ્થિતિમાં, આંતરરાષ્ટ્રીય ક્રિકેટ પરિષદે આ ટૂર્નામેન્ટ પર અંતિમ નિર્ણય લેવા માટે એક બેઠકનું આયોજન કર્યું હતું. પરંતુ હવે આ બેઠક મુલતવી રાખવામાં આવી છે અને કોઈ ઉકેલ આવ્યો નથી.
ICC ચેમ્પિયન્સ ટ્રોફી 2025ને લઈને 29 નવેમ્બરે ICCની બેઠક થઈ હતી. બોર્ડ ઓફ કંટ્રોલ ફોર ક્રિકેટ ઈન ઈન્ડિયા (BCCI) અને પાકિસ્તાન ક્રિકેટ બોર્ડ (PCB) સહિત તમામ બોર્ડના સભ્યોએ આ બેઠકમાં હાજરી આપી હતી. આ બેઠકમાં એ નક્કી થવાનું હતું કે ચેમ્પિયન્સ ટ્રોફી 2025 ક્યારે અને ક્યાં રમાશે. હાઈબ્રિડ મોડલ પર ટુર્નામેન્ટનું આયોજન કરી શકાય કે નહીં? અથવા તો આખી ટુર્નામેન્ટ પાકિસ્તાનમાં જ રમાશે. પરંતુ ICCની બેઠક બાદ પણ આ ટૂર્નામેન્ટ અંગે કોઈ નિર્ણય લેવામાં આવ્યો નથી. આ બેઠક હવે મુલતવી રાખવામાં આવી છે.
ICC બેઠકમાં કોઈ ઉકેલ નથી મળ્યો
વાસ્તવમાં, પાકિસ્તાન ચેમ્પિયન્સ ટ્રોફીનું આયોજન કરી રહ્યું છે, પરંતુ ભારતીય ટીમે પાડોશી દેશનો પ્રવાસ કરવાનો ઈનકાર કરી દીધો છે. ત્યારથી ટૂર્નામેન્ટ ક્યારે અને ક્યાં રમાશે તે અંગે વિવાદ ચાલી રહ્યો છે. જેના કારણે ICCએ આ બેઠકનું આયોજન કર્યું હતું. આ એક વર્ચ્યુઅલ મીટિંગ હતી, મીડિયા રિપોર્ટ્સ અનુસાર, આ મીટિંગ માત્ર 10 થી 15 મિનિટ જ ચાલી શકી, ત્યારબાદ મીટિંગ 30 નવેમ્બર એટલે કે આવતીકાલ સુધી સ્થગિત કરી દેવામાં આવી. હવે આ ટુર્નામેન્ટ પર અંતિમ નિર્ણય 30 નવેમ્બરે અપેક્ષિત છે.
ટુર્નામેન્ટ માટે 3 માંથી 1 વિકલ્પ પસંદ કરાશે
આઈસીસીની બેઠકમાં ત્રણ વિકલ્પો પર વિચાર કરવામાં આવ્યો હતો, એવું માનવામાં આવે છે કે આમાંથી એક વિકલ્પ પર ચેમ્પિયન્સ ટ્રોફી રમાશે. પહેલો વિકલ્પ એ છે કે ટુર્નામેન્ટ હાઈબ્રિડ મોડલ પર હોવી જોઈએ. ટીમ ઈન્ડિયા સિવાયની તમામ મેચો માત્ર પાકિસ્તાનમાં જ રમાશે. બીજો વિકલ્પ એ છે કે ટૂર્નામેન્ટ સંપૂર્ણપણે પાકિસ્તાનની બહાર રમાશે અને યજમાન અધિકાર PCB પાસે રહેશે. તે જ સમયે, છેલ્લો વિકલ્પ એ છે કે આ સમગ્ર ટૂર્નામેન્ટ પાકિસ્તાનમાં રમાશે, પરંતુ ભારત તેનો ભાગ નહીં બને.
પાકિસ્તાન હાઈબ્રિડ મોડલ માટે તૈયાર નથી
તમને જણાવી દઈએ કે, ભારતીય ટીમે 2008થી એક પણ વખત પાકિસ્તાનનો પ્રવાસ કર્યો નથી. આવી સ્થિતિમાં ટીમ ઈન્ડિયા આ ટૂર્નામેન્ટ હાઈબ્રિડ મોડલ પર રમવા માંગે છે. જો કે પાકિસ્તાન ક્રિકેટ બોર્ડે તાજેતરમાં ICCને જાણ કરી હતી કે તે ચેમ્પિયન્સ ટ્રોફી માટે હાઈબ્રિડ મોડલ સ્વીકારશે નહીં. તમને જણાવી દઈએ કે, પાકિસ્તાને અગાઉ એશિયા કપ 2023ની પણ યજમાની કરી હતી. ત્યારે પણ ટીમ ઈન્ડિયાએ પાકિસ્તાનને બદલે શ્રીલંકામાં મેચ રમી હતી. ટીમ ઈન્ડિયા આ વખતે પણ એવો જ વિકલ્પ ઈચ્છે છે.
આ પણ વાંચો: 6,6,6,4,6… હાર્દિક પંડ્યાનો આક્રમક અંદાજ, 21 વર્ષના ખેલાડીની ઓવરમાં ફટકાર્યા 28 રન, જુઓ વીડિયો
Published On - 5:25 pm, Fri, 29 November 24