
2026 T20 વર્લ્ડ કપની સેમિફાઈનલ મેચો માટેનું શેડ્યૂલ જાહેર થઈ ગયું છે. સુપર 8 રાઉન્ડ બાદ ભારત, ઈંગ્લેન્ડ, દક્ષિણ આફ્રિકા અને ન્યુઝીલેન્ડે શ્રેષ્ઠ પ્રદર્શન કરીને અંતિમ ચાર ટીમોમાં સ્થાન મેળવ્યું છે. હવે આ ચારેય ટીમો ફાઈનલમાં પહોંચવા માટે એકબીજા સામે જંગ લડશે. બંને મુકાબલા રોમાંચથી ભરપૂર રહેવાની શક્યતા છે.
પ્રથમ સેમિફાઇનલ બુધવાર, 4 માર્ચે રમાશે. આ મુકાબલો દક્ષિણ આફ્રિકા અને ન્યુઝીલેન્ડ વચ્ચે કોલકાતાના ઐતિહાસિક ઇડન ગાર્ડન્સ મેદાનમાં યોજાશે. મેચનો ટોસ સાંજે 6:30 વાગ્યે થશે, જ્યારે મેચનો પ્રારંભ સાંજે 7 વાગ્યે થશે. લીગ તબક્કામાં દક્ષિણ આફ્રિકાએ ન્યુઝીલેન્ડને હરાવ્યું હતું, જેના કારણે આ મેચ વધુ રસપ્રદ બનવાની આશા છે.
બીજી સેમિફાઇનલ ગુરુવાર, 5 માર્ચે મુંબઈના વાનખેડે સ્ટેડિયમ ખાતે યોજાશે. આ મુકાબલો ભારત અને ઈંગ્લેન્ડ વચ્ચે રમાશે. ટોસ સાંજે 6:30 વાગ્યે થશે અને મેચ સાંજે 7 વાગ્યે શરૂ થશે. 2022 ના T20 વર્લ્ડ કપની સેમિફાઈનલમાં ઈંગ્લેન્ડે ભારતને હરાવ્યું હતું, તેથી આ વખતે ટીમ ઈન્ડિયા તેનો બદલો લેવા તૈયાર છે.
મુંબઈમાં યોજાનારી આ મેચ પર સમગ્ર દેશની નજર રહેશે. ભારતીય ટીમે ટુર્નામેન્ટ દરમિયાન દમદાર પ્રદર્શન કર્યું છે. બેટિંગ અને બોલિંગ બંને વિભાગમાં મજબૂત દેખાવને કારણે ટીમ આત્મવિશ્વાસથી ભરપૂર છે. બીજી તરફ, ઇંગ્લેન્ડ પણ મજબૂત પ્રતિસ્પર્ધી તરીકે મેદાનમાં ઉતરશે, જેથી મુકાબલો ટક્કરનો બની શકે છે.
આ મહત્વપૂર્ણ મેચો માટે ICC દ્વારા રિઝર્વ ડેની પણ વ્યવસ્થા કરવામાં આવી છે. જો 4 માર્ચે પહેલી સેમિફાઇનલ વરસાદ કે અન્ય કારણોસર પૂર્ણ ન થઈ શકે, તો તે આગામી દિવસે પૂર્ણ કરવામાં આવશે. તેવી જ રીતે, 5 માર્ચની બીજી સેમિફાઇનલ માટે પણ રિઝર્વ ડે રાખવામાં આવ્યો છે.
ICC ના નિયમ મુજબ, રિઝર્વ ડેનો ઉપયોગ માત્ર ત્યારે જ કરવામાં આવશે જ્યારે નિર્ધારિત દિવસે ઓછામાં ઓછી પાંચ ઓવરની મેચ પણ શક્ય ન હોય. આયોજકો દ્વારા સમયસર મેચ પૂર્ણ થાય તે માટે તમામ પ્રયાસો હાથ ધરવામાં આવશે. હવે ક્રિકેટપ્રેમીઓ આતુરતાથી સેમિફાઇનલની રોમાંચક ટક્કર જોવા રાહ જોઈ રહ્યા છે.
Published On - 8:27 pm, Mon, 2 March 26