ગુજરાત ટાઇટન્સ (Gujarat Titans) એ IPL 2022 નો ખિતાબ જીત્યો છે. પહેલીવાર આ લીગમાં રમી રહેલ ગુજરાત ટાઇટન્સ ચેમ્પિયન બને તેવું સિઝનની શરૂઆત કોઇ કહી શકતા ન હતા. પરંતુ હાર્દિક પંડ્યા (Hardik Pandya) ની આગેવાની હેઠળની ટીમ લીગ મેચોમાં શાનદાર પ્રદર્શન બાદ ફાઇનલમાં રાજસ્થાન રોયલ્સ (Rajasthan Royals) ને હરાવી ચેમ્પિયન બની હતી. હવે ગુજરાત ટાઇટન્સના બેટિંગ કોચ ગેરી કર્સ્ટને (Gary Kirsten) મોટું નિવેદન આપ્યું છે. તેણે કહ્યું કે, ગુજરાત ટાઇટન્સના ચેમ્પિયન બનવામાં કેપ્ટન હાર્દિક પંડ્યાનો મહત્વનો ભાગ હતો. તેણે કહ્યું કે, હાર્દિક પંડ્યાએ જે નંબર પર બેટિંગ કરી અને રન બનાવ્યા તે મહત્વપૂર્ણ છે. ગત સિઝન સુધી હાર્દિક પંડ્યા છેલ્લી ઓવરોમાં બેટિંગ કરવા આવતો હતો. પરંતુ આ સિઝનમાં તેણે ચોથા નંબર પર બેટિંગ કરી હતી.
ગુજરાત ટાઇટન્સના બેટિંગ કોચ ગેરી કર્સ્ટને કહ્યું કે, સુકાની હાર્દિક પંડ્યાએ મિડલ ઓર્ડરમાં રમવાની જવાબદારી ઉપાડી છે. તેણે ત્રીજા અને ચોથા નંબર પર બેટિંગ કરી શાનદાર પ્રદર્શન કરી રન બનાવ્યા હતા. તેણે કહ્યું કે હાર્દિક પંડ્યા અત્યાર સુધી ફિનિશરની ભૂમિકા ભજવતો હતો. પરંતુ આ વખતે તેણે જે કર્યું તે ઘણું અલગ હતું. આમ કરવું સહેલું ન હતું. તેણે વધુમાં કહ્યું કે, હાર્દિક પંડ્યાએ આખી સિઝનમાં શાનદાર કેપ્ટનશિપ કરી. હાર્દિક પંડ્યાએ જે રીતે સુકાની કરી તે ઘણા કેપ્ટનો માટે બોધપાઠ છે. કેપ્ટન તરીકે તેણે મેદાનની અંદર અને બહાર શાનદાર વાતાવરણ જાળવી રાખ્યું હતું.
ગેરી કર્સ્ટને કહ્યું કે, સુકાની હાર્દિક પંડ્યા દરેક નિર્ણય શાંત ચિત્તે લેતો રહ્યો. મેદાન પર ખેલાડીઓનો આત્મવિશ્વાસ પણ જાળવી રાખ્યો હતો. એક કેપ્ટન તરીકે આ ખૂબ જ મહત્વપૂર્ણ છે. આ સિઝનમાં ગુજરાત ટાઇટન્સ (Gujarat Titans) ના સુકાની હાર્દિક પંડ્યા (Hardik Pandya) એ 131.26 ના સ્ટ્રાઇક રેટથી 487 રન બનાવ્યા હતા. રાજસ્થાન રોયલ્સ સામેની ફાઈનલ મેચમાં તેણે શાનદાર ઓલરાઉન્ડ પ્રદર્શન કર્યું હતું. આ મેચમાં હાર્દિક પંડ્યાએ 4 ઓવરમાં 17 રન આપીને 3 વિકેટ ઝડપી હતી. તો જ્યારે ગુજરાત ટાઇટન્સની ટીમ બેટિંગ કરવા ઉતરી ત્યારે હાર્દિક પંડ્યાએ 34 રનની મહત્વની ઇનિંગ રમી હતી. ફાઇનલ મેચમાં સુકાની હાર્દિક પંડ્યાના શાનદાર પ્રદર્શનને કારણે ગુજરાત ટાઇટન્સ તેની પ્રથમ સિઝનમાં જ ચેમ્પિયન બનવામાં સફળ રહી હતી.