Breaking News Dickie Bird Death : ટીમ ઈન્ડિયાના વર્લ્ડ કપ વિજયના સાક્ષી રહેલા ફેમસ અમ્પાયર ડિકી બર્ડનું નિધન
ક્રિકેટ ઈતિહાસના મહાન અમ્પાયર ડિકી બર્ડનું નિધન થયું હતું. ઈંગ્લેન્ડના કાઉન્ટી ક્લબે પોસ્ટ કરી આ જાણકારી આપી હતી. ડિકી બર્ડે 32 વર્ષની ઉંમરે ક્રિકેટમાંથી નિવૃત્તિ લીધી અને પછી અમ્પાયરિંગ શરૂ કર્યું, અને વિશ્વના સૌથી સફળ અને લોકપ્રિય અમ્પાયર બન્યા. બર્ડ ત્રણ વર્લ્ડ કપ ફાઈનલમાં અમ્પાયરિંગ કરનાર પ્રથમ અમ્પાયર હતા.
ક્રિકેટ ઈતિહાસના સૌથી પ્રખ્યાત અને શ્રેષ્ઠ અમ્પાયરોમાંના એક ગણાતા ઈંગ્લેન્ડના ડિકી બર્ડનું નિધન થયું છે. તેઓ 92 વર્ષના હતા. ઈંગ્લેન્ડના કાઉન્ટી ક્લબ યોર્કશાયરએ એક નિવેદનમાં બર્ડના નિધનની જાહેરાત કરી. લગભગ 150 આંતરરાષ્ટ્રીય મેચોમાં અમ્પાયરિંગ કર્યા પછી, બર્ડ ક્રિકેટ ઈતિહાસમાં પ્રથમ અમ્પાયર હતા જેમણે પોતાની અલગ ઓળખ બનાવી અને અમ્પાયરિંગ પ્રોફેશનને લોકપ્રિય બનાવ્યો. ઈંગ્લેન્ડ ક્રિકેટ બોર્ડે પણ બર્ડના નિધન પર શોક વ્યક્ત કર્યો. આંતરરાષ્ટ્રીય અમ્પાયર બનતા પહેલા, બર્ડ ફર્સ્ટ-ક્લાસ ક્રિકેટર પણ હતા પરંતુ 32 વર્ષની ઉંમરે નિવૃત્તિ લીધી.
કાઉન્ટી ક્લબ યોર્કશાયરે આપી શ્રદ્ધાંજલિ
બર્ડનું મંગળવાર, 23 સપ્ટેમ્બરના રોજ 92 વર્ષની વયે તેમના ઘરે અવસાન થયું. કાઉન્ટી ક્લબે યોર્કશાયર માટે ફર્સ્ટ-ક્લાસ ક્રિકેટ રમનારા બર્ડના અવસાનની જાહેરાત કરી. યોર્કશાયરે એક નિવેદનમાં કહ્યું, “યોર્કશાયર કાઉન્ટી ક્રિકેટ ક્લબ ક્રિકેટના સૌથી પ્રિય વ્યક્તિઓમાંના એક હેરોલ્ડ ડેનિસ ‘ડિકી’ બર્ડના અવસાનની જાહેરાત કરતા ખૂબ જ દુઃખી છે.”
ક્રિકેટર તરીકે કારકિર્દી સફળ ન રહી
19 એપ્રિલ, 1933ના રોજ ઈંગ્લેન્ડના યોર્કશાયરના બાર્ન્સલીમાં જન્મેલા બર્ડનું પૂરું નામ હેરોલ્ડ ડેનિસ બર્ડ હતું, પરંતુ તે વિશ્વભરમાં ડિકી બર્ડ તરીકે જાણીતા બન્યા. તેમણે યોર્કશાયરથી પોતાની ફર્સ્ટ-ક્લાસ ક્રિકેટ કારકિર્દીની શરૂઆત કરી હતી, પરંતુ 22-યાર્ડ પિચ પર તેમને ક્યારેય નોંધપાત્ર સફળતા મળી ન હતી. જમણા હાથના બેટ્સમેન બર્ડે ત્રણ વર્ષ યોર્કશાયર તરફથી રમ્યા પછી ચાર સિઝન લેસ્ટરશાયર માટે રમ્યા, પરંતુ તેમનું નસીબ ત્યાં પણ બદલાયું નહીં, જેના કારણે તેમણે 32 વર્ષની ઉંમરે ક્રિકેટમાંથી નિવૃત્તિ લીધી. બર્ડે 93 ફર્સ્ટ-ક્લાસ મેચોમાં માત્ર 3,314 રન બનાવ્યા.
અમ્પાયર બનતાની સાથે જ નસીબ બદલાયું
પરંતુ અહીંથી જ તેમની કારકિર્દીમાં વળાંક આવ્યો જ્યારે તેમણે અમ્પાયરિંગમાં હાથ અજમાવ્યો. માત્ર 37 વર્ષની ઉંમરે તેમણે 1970માં તેમની પ્રથમ કાઉન્ટી ચેમ્પિયનશિપ મેચમાં અમ્પાયરિંગ કર્યું, અને તેના થોડા સમય પછી તેઓ ટેસ્ટ ક્રિકેટમાં પણ અમ્પાયરિંગ કરવા લાગ્યા. તેમની ટેસ્ટ અમ્પાયરિંગ કારકિર્દી 1973માં ઈંગ્લેન્ડ અને ન્યુઝીલેન્ડ વચ્ચેની લીડ્સ ટેસ્ટ મેચથી શરૂ થઈ હતી અને તેઓ 1996 સુધી વિશ્વના સૌથી પ્રખ્યાત અમ્પાયરોમાંના એક રહ્યા. તેમણે છેલ્લી વખત 1996માં ભારત અને ઈંગ્લેન્ડ વચ્ચેની લોર્ડ્સ ટેસ્ટ મેચમાં અમ્પાયરિંગ કર્યું હતું. આ મેચ દરમિયાન, બંને ટીમો દ્વારા તેમને ગાર્ડ ઓફ ઓનર પણ આપવામાં આવ્યું હતું.
ત્રણ વર્લ્ડ કપ ફાઈનલમાં કર્યું અમ્પાયરિંગ
બર્ડ ત્રણ વર્લ્ડ કપ ફાઈનલમાં અમ્પાયરિંગ કરનાર પ્રથમ અમ્પાયર હતા. તેઓ 1975, 1979 અને 1983માં રમાયેલા પહેલા ત્રણ વર્લ્ડ કપ ફાઈનલમાં ઓન-ફિલ્ડ અમ્પાયર હતા. ત્રીજી ફાઈનલમાં, જે તેમનું છેલ્લું પણ હતું, તેમાં કપિલ દેવના નેતૃત્વ હેઠળની ભારતીય ટીમે બે વખતના ચેમ્પિયન વેસ્ટ ઈન્ડીઝને હરાવીને પ્રથમ વખત વર્લ્ડ કપ ટ્રોફી જીતી હતી. ડિકી બર્ડે કુલ 66 ટેસ્ટ અને 69 વનડેમાં અમ્પાયરિંગ કર્યું, આ દરમિયાન તેઓ સૌથી સફળ અને લોકપ્રિય અમ્પાયરોમાંના એક બન્યા.
આ પણ વાંચો: દિનેશ કાર્તિક બન્યો ભારતનો કેપ્ટન, 20 વર્ષ પછી ટીમ ઈન્ડિયાને ચેમ્પિયન બનાવવાનો પડકાર
