મુંબઈ ઈન્ડિયન્સે તેમના કોચિંગ સ્ટાફમાં મોટો ફેરફાર કર્યો છે. મુંબઈ ઈન્ડિયન્સે લસિથ મલિંગા, પારસ મ્હામ્બ્રે અને કાર્લ હોપકિન્સનને બહાર કર્યા છે. ફ્રેન્ચાઇઝીએ સોશિયલ મીડિયા પોસ્ટ દ્વારા આ વાતની પુષ્ટિ કરી છે અને ત્રણેય કોચના યોગદાન બદલ આભાર માન્યો છે. પાંચ વખતની IPL ચેમ્પિયન મુંબઈ ઈન્ડિયન્સે મુખ્ય કોચ મહેલા જયવર્ધનેના પદ છોડવાની જાહેરાત કર્યાના થોડા દિવસો બાદ જ આ નિર્ણય લેવામાં આવ્યો છે. જયવર્ધનેના સ્થાને વેસ્ટ ઈન્ડિઝના દિગ્ગજ ખેલાડી કિરોન પોલાર્ડની નિમણૂક કરવામાં આવી છે.

મુંબઈ ઈન્ડિયન્સના ત્રણ કોચ બહાર

મુંબઈ ઈન્ડિયન્સે તેમના ત્રણ કોચને રિલીઝ કરવા અંગે કહ્યું, “લસિથ મલિંગા, પારસ મ્હામ્બ્રે અને કાર્લ હોપકિન્સન પુરુષોની ટીમના કોચિંગ સેટઅપમાં તેમની ભૂમિકાઓથી આગળ વધી રહ્યા છે.” ફ્રેન્ચાઇઝીએ ત્રણેયનો તેમની પ્રતિબદ્ધતા, યોગદાન અને સેવા બદલ આભાર માન્યો.

મલિંગાની મુંબઈ ઈન્ડિયન્સ સાથેની સફર સમાપ્ત

લસિથ મલિંગા મુંબઈ ઈન્ડિયન્સ પરિવારનો એક ખાસ સદસ્ય રહ્યો છે. તે MI ફ્રેન્ચાઇઝના ઇતિહાસના સૌથી પ્રતિષ્ઠિત ચહેરાઓમાંનો એક છે. તેણે મુંબઈના બોલિંગ આક્રમણનું નેતૃત્વ કર્યું હતું અને ટીમને ચાર IPL ટાઇટલ તેમજ 2011 ચેમ્પિયન્સ લીગ T20 જીતવામાં મુખ્ય ભૂમિકા ભજવી હતી. નિવૃત્તિ પછી મલિંગા ટીમ સાથે મેન્ટર અને કોચ તરીકે રહ્યો હતો. એક નિવેદનમાં મુંબઈ ઈન્ડિયન્સે કહ્યું, “મુંબઈ ઈન્ડિયન્સ સાથે લસિથની સફર ખરેખર ખાસ રહી છે. તેનો જુસ્સો, સ્પર્ધાત્મક ભાવના અને ટીમ પ્રત્યેની પ્રતિબદ્ધતાએ ખેલાડીઓને પ્રેરણા આપી છે. તેનો વારસો હંમેશા મુંબઈ ઈન્ડિયન્સનો અભિન્ન ભાગ રહેશે.”

મ્હામ્બ્રે અને હોપકિન્સનનું યોગદાન

પારસ મ્હામ્બ્રેનો પણ મુંબઈ ઈન્ડિયન્સ સાથે લાંબો સમય રહ્યો છે. તે 2010 થી 2017 સુધી ટીમ સાથે હતો અને 2024 માં પાછો MI માં જોડાયો હતો. મુંબઈએ જણાવ્યું હતું કે બંને કાર્યકાળ દરમિયાન પારસે ટીમમાં “અપાર અનુભવ, સમર્પણ અને MI કલ્ચરની ઊંડી સમજ” લાવી છે. ફ્રેન્ચાઇઝીએ વધુમાં જણાવ્યું હતું કે બોલિંગ પ્રતિભા વિકસાવવામાં પારસના યોગદાન અને વર્ષોથી તેણે બનાવેલા સંબંધોની હંમેશા ખૂબ પ્રશંસા થઈ છે.

તેમના કામની પ્રશંસા કરી

કાર્લ હોપકિન્સન 2025 સીઝન પહેલા મુંબઈ ઈન્ડિયન્સમાં જોડાયો હતો. તે ઈંગ્લેન્ડની પુરુષ ટીમ સાથેના તેના સમયનો મૂલ્યવાન આંતરરાષ્ટ્રીય અનુભવ લાવે છે. મુંબઈએ જણાવ્યું હતું કે ફ્રેન્ચાઇઝી સાથેના હોપકિન્સનના સમય દરમિયાન તેની વ્યાવસાયિકતા, કુશળતા અને ટીમના ફિલ્ડિંગના લેવલને સુધારવા માટેની પ્રતિબદ્ધતાની પ્રશંસનીય રહી છે.

મુંબઈ ઈન્ડિયન્સે ત્રણેયને શુભકામનાઓ પાઠવી

મુંબઈ ઈન્ડિયન્સે તેમના નિવેદનનો અંત એમ કહીને કર્યો, “મુંબઈ ઈન્ડિયન્સ ટીમ અને વિશાળ MI પરિવારમાં તેમના યોગદાન બદલ લસિથ, પારસ અને કાર્લનો હૃદયપૂર્વક આભાર માને છે. તેમની પ્રતિબદ્ધતા, તેમણે બનાવેલા સંબંધો અને તેમણે બનાવેલી યાદો હંમેશા અમારી સફરનો ભાગ રહેશે. અમે ત્રણેયને તેમના ભવિષ્ય માટે શુભકામનાઓ પાઠવીએ છીએ. વન્સ MI, ઓલવેઝ MI.”

Breaking News: સ્ટાર ખેલાડી T20 શ્રેણીમાંથી થયો બહાર, 5 ઓવરમાં 76 રન આપનાર ખેલાડીને મળી તક