Breaking News: IPL 2026 માં સદીઓનો ખાસ રેકોર્ડ બન્યો, 19 વર્ષના ઈતિહાસમાં પહેલીવાર બની આ ઘટના

IPL 2026 માં સિઝનની પહેલી સદી માટે લાંબી રાહ જોવી પડી હતી અને આ પહેલી સદી સંજુ સેમસનના બેટમાંથી આવી હતી. જો કે ત્યારથી ઘણી સદીઓ ફટકારવામાં આવી છે અને ઘણા રેકોર્ડ તોડવામાં આવ્યા છે. પરંતુ આ સિઝનમાં જે બન્યું છે તે અભૂતપૂર્વ છે. IPL ના 19 વર્ષના ઈતિહાસમાં પહેલીવાર સદીઓનો આવો ખાસ રેકોર્ડ બન્યો છે.

player from each team scored centuryImage Credit source: PTI

Smit Chauhan | Updated on: May 15, 2026 | 5:52 PM

IPL ની 19મી સિઝનમાં મોટા સ્કોરનો પ્રવાહ જોવા મળ્યો. દરેક ટીમે 200 થી વધુ રનનો સ્કોર ઘણી વખત બનાવ્યો. આવા મોટા સ્કોરનો સફળતાપૂર્વક પીછો પણ ઘણી વખત કરવામાં આવ્યો. જોકે પહેલી સદી માટે રાહ જોવી પડી હશે, પરંતુ એકવાર સદીનો સિલસિલો શરૂ થયો, પછી પણ આ ટ્રેન્ડ ચાલુ જ રહ્યો. દરેક સિઝનમાં અનેક સદીઓ ફટકારવામાં આવે છે, પરંતુ આ વખતે જે બન્યું તે અભૂતપૂર્વ હતું, અને તે વિરાટ કોહલીની સદી સાથે બન્યું.

IPLમાં પહેલીવાર દરેક ટીમના ખેલાડીએ સદી ફટકારી

RCBના સ્ટાર બેટ્સમેન વિરાટ કોહલીએ કોલકાતા નાઈટ રાઈડર્સ સામે શાનદાર સદી ફટકારી હતી. આ કોહલીની નવમી IPL સદી હતી, જેના કારણે RCBને શાનદાર વિજય મેળવવામાં મદદ મળી. કોહલીની સદી સાથે IPL માં ઈતિહાસ રચાયો હતો. કોહલીની આ સદી સાથે દરેક ટીમના ખેલાડીઓએ આ સિઝનમાં સદી ફટકારી હતી. IPL ના 19 વર્ષના ઈતિહાસમાં આવું પહેલીવાર બન્યું કે એક જ સિઝનમાં બધી 10 ટીમોના ખેલાડીઓ દ્વારા સદી ફટકારવામાં આવી હોય.

કઈ ટીમના કયા ખેલાડીએ સદી ફટકારી?

આ સિઝનમાં ચેન્નાઈ સુપર કિંગ્સે સદીનો દુકાળ પૂરો કર્યો અને સંજુ સેમસને સિઝનની પહેલી સદી ફટકારી હતી. જે બાદ દરેક ટીમ માટે એક પછી એક સદીઓ આવી હતી. સંજુએ CSK માટે બે સદી ફટકારી છે. ક્વિન્ટન ડી કોક, તિલક વર્મા અને રાયન રિકેલ્ટને મુંબઈ ઈન્ડિયન્સ માટે કુલ ત્રણ સદી ફટકારી છે. ત્યારબાદ સાઈ સુદર્શને ગુજરાત ટાઈટન્સ માટે સદી ફટકારી, જ્યારે અભિષેક શર્માએ સનરાઈઝર્સ હૈદરાબાદ માટે સેન્ચૂરી લગાવી.

15 વર્ષીય વૈભવ સૂર્યવંશીએ ફટકારી સદી

હવે જ્યારે સદીઓ ફટકારવામાં આવી રહી છે, તો વૈભવ સૂર્યવંશી કેવી રીતે પાછળ રહી શકે? IPL ઇતિહાસમાં સૌથી નાની ઉંમરના રાજસ્થાન રોયલ્સના 15 વર્ષીય વૈભવે ફરી એકવાર તોફાની ઇનિંગ રમી અને 36 બોલમાં સદી ફટકારી. લખનૌ સુપર જાયન્ટ્સ ભલે પ્લેઓફની દોડમાંથી બહાર થઈ ગયું હોય, પરંતુ મિશેલ માર્શે સદી ફટકારી હતી. તેવી જ રીતે, સંઘર્ષ કરી રહેલી દિલ્હી કેપિટલ્સ માટે કેએલ રાહુલે આ સિદ્ધિ હાંસલ કરી હતી, જ્યારે પંજાબ કિંગ્સ માટે કૂપર કોનોલીએ શાનદાર સદી ફટકારી હતી.