ટીમ ઈન્ડિયા સ્પોન્સરશિપ માટે BCCIએ શરૂ કરી બિડિંગ, નવા નિયમમાં આ કંપનીઓને નહીં મળે તક

BCCIએ 2 સપ્ટેમ્બર 2025ના રોજ ભારતીય ક્રિકેટ ટીમના ટાઈટલ સ્પોન્સરશિપ અધિકારો માટે નવી બોલી લગાવવાની શરૂઆત કરી છે. પરંતુ આ વખતે નિયમો ખૂબ જ કડક બનાવવામાં આવ્યા છે. સરકારના નવા કાયદાઓને કારણે, હવે રિયલ મની ગેમિંગ, સટ્ટાબાજી, જુગાર અથવા ક્રિપ્ટોકરન્સી સાથે સંબંધિત કોઈપણ કંપની આ પ્રક્રિયામાં ભાગ લઈ શકશે નહીં.

સ્પોન્સરશિપ માટે નવા નિયમ

નોંધનીય છે કે ડ્રીમ11 અને માય11સર્કલ જેવી કંપનીઓએ છેલ્લા કેટલાક વર્ષોમાં BCCIને લગભગ 1,000 કરોડ રૂપિયાનું ભંડોળ આપ્યું હતું. પરંતુ હવે નવા કાયદાઓને કારણે, આ કંપનીઓ ભારતીય ક્રિકેટથી સંપૂર્ણપણે બહાર થઈ ગઈ છે. ડ્રીમ11એ પોતે જ સમય પહેલા ટીમ ઈન્ડિયાના ટાઈટલ સ્પોન્સર તરીકેનો પોતાનો કરાર સમાપ્ત કરવાનો નિર્ણય લીધો છે.

Dream11 એ સ્પોન્સરશિપ છોડી

Dream11એ 2023માં ટીમ ઈન્ડિયાની ટાઈટલ સ્પોન્સરશિપ 358 કરોડ રૂપિયામાં મેળવી હતી, જે 2026 સુધી હતી. પરંતુ હવે નવા કાયદાને કારણે, કંપનીએ ભારતમાં તેનો મની ગેમિંગ બિઝનેસ બંધ કરી દીધો છે અને તેના કારણે તેને સ્પોન્સરશિપ પણ છોડી દેવી પડી છે. BCCIએ કહ્યું છે કે ડ્રીમ11ના આ નિર્ણય પર કોઈ દંડ લાદવામાં આવશે નહીં.

કેટલીક બ્રાન્ડ્સ સીધી બહાર

BCCIએ તેના નવા નિયમોમાં સ્પષ્ટ કર્યું છે કે જે કંપનીઓ ભારતમાં કે વિદેશમાં ઓનલાઈન મની ગેમિંગ, સટ્ટાબાજી, જુગાર અથવા ક્રિપ્ટો જેવી પ્રવૃત્તિઓમાં સામેલ છે તેઓ આ સ્પોન્સરશિપ રેસમાં ભાગ લઈ શકશે નહીં. આ ઉપરાંત દારૂ, તમાકુ, પોર્નોગ્રાફી જેવી નૈતિક રીતે વાંધાજનક ગણાતી કંપનીઓને પણ આ પ્રક્રિયામાંથી બાકાત રાખવામાં આવી છે.

સરોગેટ બ્રાન્ડિંગ નહીં

BCCIએ સ્પષ્ટ કર્યું છે કે કોઈપણ કંપની સરોગેટ બ્રાન્ડિંગ એટલે કે બીજા નામ અથવા ઓળખનો ઉપયોગ કરીને બોલી લગાવવાનો પ્રયાસ કરી શકશે નહીં. જો કોઈ કંપની અનેક બિઝનેસ કેટેગરીમાં કામ કરે છે અને તેમાંથી એક પર પણ પ્રતિબંધ મૂકવામાં આવ્યો હશે, તો તેને સ્પોન્સરશિપ માટેની રેસમાંથી બહાર ગણવામાં આવશે.

બોલી લગાવનારા માટે કડક શરતો

આ ટાઈટલ સ્પોન્સરશિપ માટે બોલી લગાવવા માંગતી કોઈપણ કંપનીનું સરેરાશ વાર્ષિક ટર્નઓવર અથવા નેટવર્થ છેલ્લા ત્રણ વર્ષમાં ઓછામાં ઓછું રૂ. 300 કરોડ હોવું જોઈએ. બોલી લગાવવાની પ્રક્રિયા માટે ઈન્ટરેસ્ટેડ પાર્ટી (IEOI) દસ્તાવેજ ખરીદવાની છેલ્લી તારીખ 12 સપ્ટેમ્બર છે, જ્યારે બોલી સબમિટ કરવાની છેલ્લી તારીખ 16 સપ્ટેમ્બર નક્કી કરવામાં આવી છે.

આ પણ વાંચો: IND vs PAK : એશિયા કપમાં ભારત-પાકિસ્તાન મેચ જોવા ખરીદવી પડશે વધુ 6 મેચની ટિકિટ, જાણો કેમ

ક્રિકેટ સહિત રમતગમતના દરેક સમાચાર વાંચવા અહીં ક્લિક કરો