ઓસ્ટ્રેલિયાએ વર્લ્ડ કપ 2022 વિજેતા મહિલા ક્રિકેટ ટીમ સાથે કોમનવેલ્થ ગેમ્સ 2022 (Commonwealth Games 2022) માં પ્રવેશવાનું નક્કી કર્યું છે. મેગ લેનિંગ કોમનવેલ્થ ગેમ્સ 2022 માં ન્યુઝીલેન્ડમાં ODI વર્લ્ડ કપ 2022 જીતવા માટે અપરિવર્તિત મહિલા ટીમનું નેતૃત્વ કરશે. તમને જણાવી દઈએ કે, ઓસ્ટ્રેલિયા મહિલા (Australian Women Cricket Team) ક્રિકેટ ટીમે વર્લ્ડ કપ 2022 ની ફાઇનલમાં ઈંગ્લેન્ડને 71 રનથી હરાવીને પ્રતિષ્ઠિત ટ્રોફી જીતી હતી.
જો કે ઓસ્ટ્રેલિયાની ટીમ નવા કોચ સાથે બર્મિંગહામ જશે. કારણ કે ટીમના મુખ્ય કોચ મેથ્યુ મોટે ઈંગ્લેન્ડ સાથે કામ કરવા ઓસ્ટ્રેલિયાનો સાથ છોડી દીધો છે. હાલમાં શેલી નિત્શ્કેને ઓસ્ટ્રેલિયા મહિલા ક્રિકેટ ટીમના મુખ્ય કોચ તરીકે કામચલાઉ રીતે નિયુક્ત કરવામાં આવ્યા છે. તમને જણાવી દઈએ કે, મેથ્યુ મોટને તાજેતરમાં જ ઈંગ્લેન્ડની મર્યાદિત ઓવરોની ટીમના મુખ્ય કોચ તરીકે જાહેર કરવામાં આવ્યા છે.
આ દરમિયાન ઓસ્ટ્રેલિયાની સ્ટાર ઓલરાઉન્ડર એલિસ પેરી હાલમાં પીઠની ઈજાથી ઝઝૂમી રહી છે. પરંતુ તે એક બેટ્સમેન તરીકે કોમનવેલ્થ ગેમ્સ 2022 માં ભાગ લઈ શકે છે. તમને જણાવી દઈએ કે, કોમનવેલ્થ ગેમ્સ 2022 બર્મિંગહામમાં 28 જુલાઈથી 8 ઓગસ્ટ સુધી યોજાવાની છે.
ઑસ્ટ્રેલિયા ટીમના ફિઝિયોથેરાપિસ્ટ કેટ બેરવર્થને ક્રિકબઝ સાથે વાત કરતા કહ્યું હતું કે, “2022 કોમનવેલ્થ ગેમ્સમાં ઓલરાઉન્ડર તરીકે એલિસ પેરીની ઉપલબ્ધતા આગામી અઠવાડિયામાં તેની પ્રગતિ અને તબીબી સલાહ પર નિર્ભર રહેશે.”
ઓસ્ટ્રેલિયાની ટીમ આવતા મહિને નેશનલ ક્રિકેટ સેન્ટરમાં ટ્રેનિંગ શરૂ કરવા જઈ રહી છે અને તેની સાથે જ તેઓ આગામી કોમનવેલ્થ ગેમ્સ 2022 માટે તેમની સફર પણ શરૂ કરશે. ઓસ્ટ્રેલિયા બર્મિંગહામ જતા પહેલા ત્રિકોણીય શ્રેણીમાં આયર્લેન્ડ અને પાકિસ્તાનનો સામનો કરશે.
મેગ લેનિંગે કહ્યું, “અમારા ખેલાડીઓ માટે કોમનવેલ્થ ગેમ્સ દરમિયાન બેડમિન્ટન, સ્ક્વોશ, લૉન બાઉલ અને અન્ય ઘણી રમતોના એથ્લેટ્સ સાથે સમય પસાર કરવો એ એક અદ્ભુત અને નવો અનુભવ હશે. અમે બધા ટીવી પર કોમનવેલ્થ ગેમ્સ જોઈને મોટા થયા છીએ અને જે રીતે ઑસ્ટ્રેલિયન એથ્લેટ્સે અમને અત્યાર સુધી પ્રેરણા આપી છે આશા છે કે અમે પણ એવું જ કરી શકીશું.”
મેગ લેનિંગ (સુકાની), રશેલ હેન્સ (ઉપ સુકાની), ડાર્સી બ્રાઉન, નિકોલા કેરી, એશ્લે ગાર્ડનર, ગ્રેસ હેરિસ, એલિસા હીલી, જેસ જોનાસન, અલાના કિંગ, તાહલિયા મેકગ્રા, બેથ મૂની , એલિસ પેરી, મેગન શુટ, એનાબેલ સધરલેન્ડ, અમાન્દા-જેડ વેલિંગ્ટન.