CWG 2022 Badminton: ભારત સામે પાકિસ્તાનના સૂપડા સાફ થઈ ગયા, ટીમ ઈન્ડિયા સામે આસાનીથી ટેકવ્યા ઘૂંટણ

બર્મિંગહામ કોમનવેલ્થ ગેમ્સ 2022 (CWG 2022 Badminton) શરૂ થઈ ગઈ છે અને પહેલા જ દિવસે ઘણા ભારતીય ખેલાડીઓ એક્શનમાં હતા. બેડમિન્ટન પણ સામેલ હતું, જ્યાં તેની શરૂઆત મિશ્ર ટીમ ઈવેન્ટથી થઈ હતી. પહેલા જ રાઉન્ડમાં ભારતનો પડોશી દેશ પાકિસ્તાનનો સામનો થયો હતો અને ટીમ ઈન્ડિયા (Team India) એ પરસેવો પાડ્યા વિના પાકિસ્તાન (Pakistan) ને 5-0થી હરાવ્યું હતું. મિક્સ ડબલ્સ હોય કે સિંગલ્સ મેચ, પીવી સિંધુ, કિદામ્બી શ્રીકાંત, અશ્વિની પોનપ્પા જેવા દિગ્ગજ ખેલાડીઓ સાથેની ભારતીય ટીમે એક પણ ગેમ ગુમાવ્યા વિના પાકિસ્તાનને હરાવ્યું. બીજા રાઉન્ડમાં ભારતનો મુકાબલો શનિવારે 30 જુલાઈએ શ્રીલંકા સામે થશે.

આસાન જીત સાથે શરૂઆત

2018ની ગોલ્ડ કોસ્ટ ગેમ્સમાં ભારતે આ ઈવેન્ટનો ગોલ્ડ જીત્યો હતો અને આ વખતે પણ ભારત ખિતાબનું દાવેદાર છે. ટીમ ઈન્ડિયાએ પણ આ જ સ્ટાઈલમાં શરૂઆત કરી હતી. પ્રથમ મેચની શરૂઆત મિક્સ ડબલ્સથી થઈ છે, જેમાં અશ્વિની પોનપ્પા અને સુમિત રેડ્ડીની જોડી ભારત માટે કોર્ટ પર ઉતરી છે. બંનેએ પાકિસ્તાનના મોહમ્મદ ઈરફાન ભટ્ટી અને ગઝાલા સિદ્દીકીને 21-9, 21-12થી સરળતાથી હરાવીને શાનદાર શરૂઆત કરી હતી. આ રીતે ભારતે 1-0ની લીડ મેળવી લીધી હતી.

શ્રીકાંત-સિંધુએ ભારતની ઝોળી ભરી

આ પછી મેન્સ અને વિમેન્સ સિંગલ્સની મેચો યોજાઈ હતી. મેન્સ સિંગલ્સમાં ભારતના ટોચના શટલર કિદામ્બી શ્રીકાંત કોર્ટ પર છે અને તેનો મુકાબલો પાકિસ્તાનના મુરાદ અલી સાથે હતો. શ્રીકાંતે શાનદાર શરૂઆત કરી અને એકતરફી ફેશનમાં પહેલી ગેમ 21-7થી જીતી લીધી. તેવી જ રીતે બીજી ગેમમાં પણ શ્રીકાંતે મેચ જીતી લીધી હતી અને મુરાદ અલીને 21-7, 21-12થી હરાવીને ભારતની પકડ મજબૂત કરી હતી. ત્રીજી મેચ મહિલા સિંગલ્સ પીવી સિંધુ અને મહુરા શહજાદ વચ્ચે હતી. અપેક્ષા મુજબ, પાકિસ્તાની શટલર ભૂતપૂર્વ વિશ્વ ચેમ્પિયન સિંધુ સામે રમી શકી ન હતી. સિંધુએ આ મેચ 21-7, 21-6થી જીતીને ભારતને 3-0થી લીડ અપાવી અને બીજા રાઉન્ડમાં પ્રવેશ કર્યો.

ડબલ્સ ના ધૂરંધરોનો કમાલ

જો કે આ પછી પણ બાકીની બે મેચ રમાઈ હતી. ચોથી મેચમાં સાત્વિકસાઈરાજ રેન્કીરેડ્ડી અને ચિરાગ શેટ્ટીની પુરૂષ ડબલ્સની જોડીએ મુરાદ અલી અને મુહમ્મદ ભાટીને 21-12, 21-9 થી હરાવ્યા હતા, જ્યારે છેલ્લી મેચ વિમેન્સ ડબલ્સ હતી, જેમાં ટ્રીસા જોલી અને ગાયત્રી ગોપીનાથની યુવા ભારતીય જોડી હતી. પાકિસ્તાની જોડીને 21-4, 21-5થી હાર આપી હતી. આ રીતે ભારતે પાકિસ્તાનને 5-0થી હરાવીને પોતાના અભિયાનની શાનદાર શરૂઆત કરી હતી.