સાબરકાંઠાઃ 4 નગરપાલિકાના પ્રમુખ બદલવામાં નારાજ સભ્યોએ ઉઠાવ્યો ફાયદો, ખેડબ્રહ્મા અને તલોદમાં સત્તા જ બદલાઈ ગઈ

સાબરકાંઠા જિલ્લામાં  ચાર નગરપાલિકાના પ્રમુખ અને ઉપપ્રમુખની 2.5 વર્ષની સત્તાની સમયમર્યાદા પુર્ણ થતાં નવા પ્રમુખ અને ઉપપ્રમુખની વરણી કરવાની પ્રક્રિયા હાથ ધરાઈ હતી. શાસક પક્ષો પોતાની પાલિકાના પ્રમુખ બદલવા જતાં બે પાલિકાઓમાં તો રાજકીય પક્ષના શાસન પણ બદલાઈ ગયા હતા અને બળવાખોરો અને નારાજ કોર્પોરેટરોએ જાણે સત્તા બદલતા નિશાન તાકી લીધા હતા. સાબરકાંઠા જિલ્લાના તલોદ,ખેડબ્રહ્મા, પ્રાંતિજ અને ઈડર નગરપાલિકાના પ્રમુખ અને ઉપપ્રમુખની અવધી પુર્ણ થઈ હતી. 2.5 વર્ષ અગાઉ ચારેય નગરપાલિકાઓની સામાન્ય ચૂંટણીઓ વર્ષ 2018માં યોજાઈ હતી.

સામાન્ય ચૂંટણી યોજાયા બાદ પ્રમુખ અને ઉપપ્રમુખ પદની પણ વરણી ચૂંટાયેલા રાજકીય પક્ષોએ કરી હતી. 2.5 વર્ષની સત્તાની સમયમર્યાદાના નિયમ મુજબ સત્તાનો સમયગાળો પુર્ણ થતાં હવે નવા પ્રમુખ અને ઉપપ્રમુખની પસંદગી કરીને તેમની વરણી કરવી રાજકીય પક્ષો માટે આવશ્યક બની હતી. જે માટેની પ્રક્રિયા ચારેય પાલિકાઓમાં આજે યોજાઈ હતી. પરંતુ ચાર પૈકી પ્રાંતિજ અને ઈડર નગરપાલીકાઓમાં સરળતાથી પ્રમુખ અને ઉપપ્રમુખની વરણી થઈ શકી હતી, પરંતુ ખેડબ્રહ્માં અને તલોદ નગરપાલિકાઓમાં સત્તાના સુત્રો જ બદલાઈ ગયા હતા.

તલોદ નગરપાલિકા પર કોંગ્રેસની સત્તા હતી અને અહીં પહેલા ભાજપ પાસે 11 અને કોંગ્રેસ પાસે 13 સભ્ય સંખ્યાબળ હતું, જેમાં એક બેઠક ખાલી પડી હતી. જો કે હવે પ્રમુખની વરણી સમયે જ કોંગ્રેસના પાંચ સભ્યો ભાજપમાં ભળી જતા જ કોંગ્રેસે પોતાની સત્તા ગુમાવી પડી હતી અને ભાજપે બાજી મારી લઈ પોતાનો કેસરીયો ફરકાવી લીધો હતો. તલોદ નગરપાલિકામાં કોંગ્રેસમાં આંતરીક બળવાની સ્થિતી છેલ્લા કેટલાય સમયથી ચાલતી હતી અને અવિશ્વાસની દરખાસ્ત પણ રજુ થઈ હતી, પરંતુ હવે આખરે ભાજપ સત્તા મેળવવામાં સફળ નિવડી છે.

રોચક VIDEO જોવા માટે TV9Gujaratiના YOUTUBE પેજને SUBSCRIBE કરો

ખેડબ્રહ્મા નગરપાલિકામાં ભાજપની સત્તા હતી, પરંતુ અહીં બે સભ્યો ગેરહાજર રહેતા જ ભાજપની સત્તા પડી ભાંગી હતી અને કોંગ્રેસને જાણે કે મોકો મળ્યો હતો. ખેડબ્રહ્મા નગરપાલિકામાં ભાજપ અને કોંગ્રેસને બંનેને 14-14 સભ્ય સંખ્યાબળ હતું. કોંગ્રેસ અહી સત્તા મેળવવા માટે મથી રહી હતી અને આ માટે વિધાનસભાના વિપક્ષી દંડક અશ્વીન કોટવાલ પણ અહીં પોતાના હોમગ્રામઉન્ડ પર પાલિકા પોતાના પક્ષે હસ્તગત કરવા માટે પ્રયાસ કરી રહ્યા હતા. જેમાં ભાજપના નારાજ કોર્પેોરેટરો ગેરહાજર રહેતા જ કોંગ્રેસને જાણે કે સત્તાનો રસ્તો સરળ થઈ ગયો હતો.