ચીને અમેરિકાનાં નવા પ્રેસિડેન્ટ બીડેનને અભિનંદન આપવાનો ઇનકાર કર્યો, જાણો શું છે કારણ

યુએસના હાલના રાષ્ટ્રપતિ ડોનાલ્ડ ટ્રમ્પે હજી સુધી પરિણામોને સ્વીકાર્યા નથી અને ઘણા રાજ્યોમાં મત ગણતરીને પડકારવામાં આવી છે. વિશ્વના નેતાઓએ જો બિડેન અને ઉપરાષ્ટ્રપતિ ચૂંટાયેલા કમલા હેરિસને અભિનંદન આપ્યા છે. અમેરિકન શહેરોમાં પણ ઉજવણીનું વાતાવરણ છે પણ ચીન જાહેર બિડેનની જીતથી નાખુશ હોય તેવો વર્તાવ કરી રહ્યું છે.

વ્હાઇટ હાઉસમાં ટ્રમ્પનું ચાર વર્ષનું શાસન અમેરિકા અને ચીન વચ્ચેના વેપાર યુદ્ધને લઈને ચર્ચામાં રહ્યું છે. ચીનથી ફેલાયેલ કોવિડ -19 રોગચાળા અને ઝિનજિયાંગ અને હોંગકોંગ જેવા પ્રાંતોમાં તેના માનવાધિકાર ઉલ્લંઘનને લઈને પણ બંને દેશો વચ્ચે સંઘર્ષ થયો છે. બંને દેશોએ એક બીજાના નેતાઓ પર મુસાફરી પર પ્રતિબંધ પણ લગાવ્યો હતો.  વાણિજ્ય દૂતાવાસ બંધ કરાવવા કાર્યવાહી પણ કરવામાં આવી હતી.

ચીન ઉપરાંત રશિયા, મેક્સિકો અને કેટલાક અન્ય દેશોએ નવા ચૂંટાયેલા રાષ્ટ્રપતિને અભિનંદન આપ્યા નથી. ચીને સત્તાવાર નિવેદનમાં કહ્યું હતું કે જાણવા મળ્યું છે કે બિડેને ચૂંટણીમાં પોતાને વિજેતા જાહેર કર્યો છે. ચીની વિદેશ મંત્રાલયના પ્રવક્તા વાંગ વેનબિને કહ્યું અમારી સમજણ છે કે ચૂંટણીનું પરિણામ અમેરિકન કાયદા અને પ્રક્રિયા પ્રમાણે નક્કી કરવામાં આવશે. ટ્રમ્પે અત્યાર સુધી ચૂંટણીના પરિણામો સ્વીકારવાનો ઇનકાર કરી દીધો છે.