Breaking News : બે મહિલા ક્રિકેટરોએ એક બીજા સાથે કરી લીધા લગ્ન, એક જ ટીમમાં રમતા રમતા થઈ ગયો પ્રેમ, જુઓ Photos
ક્રિકેટ જગતમાં એક અનોખી પ્રેમકથા સાકાર થઈ છે! ઇંગ્લેન્ડની એમી જોન્સ અને ઓસ્ટ્રેલિયાની પીપ્પા ક્લેરી, જે કટ્ટર હરીફ દેશોના ખેલાડીઓ છે, તેઓ લગ્નના બંધને બંધાયા છે.
ક્રિકેટમાં દુશ્મન દેશની મહિલા ખેલાડીઓ વચ્ચે પ્રેમ ફૂલી ઉઠ્યો અને હવે તે લગ્નબંધનમાં પરિણમ્યો છે. મહિલા ક્રિકેટમાં આવી હૃદયસ્પર્શી ઘટનાઓ ક્યારેક સામે આવતી રહે છે, અને આ વખતે ફરી એકવાર બે આંતરરાષ્ટ્રીય ખેલાડીઓના લગ્ન ચર્ચામાં આવ્યા છે.
ઇંગ્લેન્ડ અને ઓસ્ટ્રેલિયા વચ્ચેની ક્રિકેટ હરીફાઈ વિશ્વની સૌથી જૂની અને ચર્ચિત સ્પર્ધાઓમાંની એક માનવામાં આવે છે. મેદાન પર બંને દેશોના ખેલાડીઓ અને ચાહકો વચ્ચે ભારે સ્પર્ધા જોવા મળે છે. પરંતુ આ હરીફાઈની બહાર, એક સુંદર પ્રેમકથા પણ જન્મી છે. ઇંગ્લેન્ડની વિકેટકીપર એમી જોન્સ અને ઓસ્ટ્રેલિયાની ઝડપી બોલર પીપ્પા ક્લેરી હવે લગ્નગ્રંથિથી જોડાઈ ગઈ છે. બંનેએ 4 એપ્રિલે લગ્ન કર્યા હતા.
એમી જોન્સ ઇંગ્લેન્ડ મહિલા ક્રિકેટ ટીમનો મહત્વપૂર્ણ ભાગ છે, જ્યારે પીપ્પા ક્લેરી ઓસ્ટ્રેલિયન ઝડપી બોલર તરીકે ઓળખાય છે. બંને પ્રથમ વખત મહિલા બિગ બેશ લીગ દરમિયાન મળ્યા હતા, જ્યાં તેઓ પર્થ સ્કોર્ચર્સ માટે એક જ ટીમમાં રમતા હતા. આ દરમિયાન તેમની વચ્ચે મિત્રતા વધી અને ધીમે ધીમે તે પ્રેમમાં બદલાઈ ગઈ.
શરૂઆતમાં, બંનેએ લાંબા અંતરના સંબંધને જાળવી રાખ્યો હતો. જોકે, 2021માં પીપ્પા ક્લેરીએ મોટો નિર્ણય લઈને ઇંગ્લેન્ડમાં વસવાટ શરૂ કર્યો. ત્યાં તેણે નોર્થ વેસ્ટ થંડર અને લેન્કેશાયર જેવી ટીમો માટે રમ્યું. હાલ બંને લેસ્ટરશાયરમાં સાથે રહે છે અને તેમની જોડી ક્રિકેટ જગતમાં ચર્ચાનો વિષય બની છે.
એમી અને પીપ્પાએ 22 જુલાઈ, 2024ના રોજ સગાઈ કરી હતી. તેમણે સોશિયલ મીડિયા પર આ ખુશખબર પોતાના ચાહકો સાથે શેર કરી હતી. હવે લગભગ દોઢ વર્ષ પછી, બંનેએ સત્તાવાર રીતે લગ્ન કરીને તેમના સંબંધને નવી ઓળખ આપી છે.
આ પહેલા પણ મહિલા ક્રિકેટમાં આવી ઘણી જોડી જોવા મળી છે. ઇંગ્લેન્ડની નેટ સાયવર-બ્રન્ટ અને કેથરિન બ્રન્ટ, દક્ષિણ આફ્રિકાની ડેન વાન નિકેર્ક અને મેરિઝાન કેપ, તેમજ ન્યુઝીલેન્ડની એમી સેટરથવેટ અને લી તાહુહુ જેવી ખેલાડીઓએ પણ લગ્ન કરીને પોતાના સંબંધોને સકારાત્મક દિશામાં આગળ વધાર્યા છે. ઓસ્ટ્રેલિયાની મેગન શુટ અને જેસ હોલ્યોકે પણ 2019માં લગ્ન કર્યા હતા.
