શું ભારત પાસે છે સૌથી વધુ ‘સોનું’ ? કયા દેશ પાસે કેટલા ટન ‘ગોલ્ડ રિઝર્વ’ છે? વર્લ્ડ ગોલ્ડ કાઉન્સિલના આંકડાએ ઉડાવ્યા ‘હોશ’
શું તમે જાણો છો કે, દુનિયામાં કયા દેશો પાસે સૌથી વધુ સોનાનો ભંડાર છે? વર્લ્ડ ગોલ્ડ કાઉન્સિલના તાજેતરના અહેવાલમાં વિશ્વના સૌથી અમીર અને શક્તિશાળી દેશોના ગોલ્ડ રિઝર્વના આંકડા સામે આવ્યા છે. આ બધા વચ્ચે સવાલ એ છે કે, શું આ યાદીમાં ભારત ટોપ-10 માં છે કે નહીં?
વર્લ્ડ ગોલ્ડ કાઉન્સિલ અનુસાર, દુનિયાભરમાં સોનાની માંગ ઝડપથી વધી રહી છે. ભારતમાં પણ સતત સોનાની માંગ વધી છે. એવામાં ચાલો જાણીએ કે, દુનિયાના એવા કયા 10 દેશ છે, જેમની પાસે સૌથી વધુ સોનું છે.
દુનિયાભરમાં સૌથી વધુ સોનું અમેરિકા પાસે છે. રિપોર્ટસ અનુસાર, અમેરિકા પાસે 8133.46 ટન ગોલ્ડ રિઝર્વ છે, જે અન્ય દેશો કરતાં ખૂબ જ વધારે છે. ખાસ વાત એ છે કે, અમેરિકા પછી લિસ્ટમાં જર્મનીનું નામ છે.
મળતી માહિતી મુજબ, જર્મની પાસે 3,351.53 ટન સોનું રિઝર્વ છે. હવે આમાં ભલે જર્મની 3,351.53 ટન રિઝર્વ સાથે બીજા સ્થાને હોય પરંતુ અમેરિકા અને જર્મની વચ્ચે ઘણો મોટો તફાવત છે. અમેરિકા અને જર્મની પછી ઇટાલીનું નામ આવે છે.
ઇટાલી પાસે 2,451.84 ટન સોનું રિઝર્વ છે. ત્યાર બાદ ફ્રાન્સ (2,436.97 ટન), રશિયા (2,335.85 ટન), ચીન (2,264.32 ટન) અને સ્વિટ્ઝરલેન્ડ (1040 ટન) આવે છે. સત્તાવાર સેન્ટ્રલ બેંક ગોલ્ડ રિઝર્વના મામલે ભારત વિશ્વમાં 8 મા સ્થાને છે, જેની રિઝર્વ બેંક (RBI) પાસે અંદાજે 882 ટન સોનું છે.
જો કે, ટોપ દેશો અને ભારત વચ્ચે ગોલ્ડ રિઝર્વમાં ઘણો મોટો તફાવત છે. હવે જો ભારતીય ઘરોમાં રહેલું દાગીના અને વ્યક્તિગત સોનું ગણવામાં આવે, તો ભારત વિશ્વમાં સૌથી મોટો ગ્રાહક દેશ છે. આ યાદીમાં છેલ્લા બે સ્થાન પર નેધરલેન્ડ્સ (612.45 ટન) નવમા અને તુર્કી (580.00 ટન) દસમા ક્રમે આવે છે.
