પેટીએમને તેના મહત્વપૂર્ણ પેમેન્ટ ગેટવેમાં રોકાણ કરવાની મંજૂરી મળી શકે છે. આ સમાચાર બાદ કટોકટીમાંથી પસાર થઈ રહેલી Paytm ને થોડી રાહત મળી શકે છે. રોકાણની આ મંજુરી છેલ્લા બે વર્ષથી અટવાયેલી છે. સૂત્રોના જણાવ્યા અનુસાર, ચીની શેરહોલ્ડર એન્ટ ગ્રુપ કંપનીએ Paytmમાં પોતાનો હિસ્સો ઘટાડ્યો છે અને તે બાદ આ બાબતે સરકારનું વલણ બદલાઈ ગયું છે.
Paytmને થોડા દિવસોમાં તેની મંજૂરી મળી શકે છે. આ રોકાણ પેટીએમને તેના યુનિટને સુધારવામાં મદદ કરશે જે ઓનલાઈન વ્યવહારોની પ્રક્રિયા કરે છે. જો કે આ રોકાણ રૂ. 1 બિલિયન કરતા ઓછું છે. સરકારની નજરમાં પેટીએમની વિશ્વસનીયતા હજુ પણ સારી છે.
પેટીએમ પેમેન્ટ્સ બેંક પર રિઝર્વ બેંકની કાર્યવાહી બાદ કંપનીને લઈને આશંકાઓ વધી ગઈ છે. RBI એ વર્ષ 2022 માં Paytm પેમેન્ટ સર્વિસીસની પેમેન્ટ એગ્રીગેટર લાઈસન્સ એપ્લિકેશનને હોલ્ડ પર રાખી હતી. બેન્કિંગ રેગ્યુલેટરે One97 Communications Limited ને પહેલાના રોકાણ માટે કેન્દ્ર સરકાર પાસેથી મંજૂરી મેળવવા કહ્યું હતું.
વન97 કોમ્યુનિકેશન લિ.માં એન્ટ ગ્રુપ કંપનીનો હિસ્સો અંદાજે 25 ટકા હતો અને ભારત સરકારે ચીનમાંથી આવતા રોકાણો પર સ્ક્રુટિની પ્રક્રિયા કડક કરી હતી. Paytmના સ્થાપક વિજય શેખર શર્માએ ગયા વર્ષે એન્ટ ગ્રુપ પાસેથી 10.3 ટકા હિસ્સો ખરીદ્યો હતો અને આ પછી તેઓ One97માં સૌથી મોટા શેરહોલ્ડર બન્યા હતા.
આ ડીલ પછી, Paytmમાં તેમનો હિસ્સો વધીને 24 ટકાથી વધારે થયો હતો. સૂત્રોના જણાવ્યા અનુસાર, આ ડીલથી પેટીએમ પેમેન્ટ સર્વિસીસમાં સરકારનો વિશ્વાસ વધ્યો છે. આ દરખાસ્ત હવે અંતિમ નિર્ણય માટે આંતર મંત્રાલય સમિતિ પાસે જશે.