NPS Swasthya: રિટાયરમેન્ટ બચત સાથે હવે મળશે ₹1 થી ₹30 લાખનું હેલ્થ કવર, PFRDA એ જાહેર કરી નવી ગાઇડલાઇન્સ
નેશનલ પેન્શન સિસ્ટમ (NPS) હવે માત્ર નિવૃત્તિ સમયની મૂડી પૂરતી મર્યાદિત નહીં રહે. PFRDA દ્વારા જાહેર કરાયેલી નવી ‘NPS સ્વાસ્થ્ય’ યોજના હેઠળ સબસ્ક્રાઇબર્સને ₹1 લાખથી ₹30 લાખ સુધીનું હેલ્થ કવર અને બીમારીના ખર્ચ માટે પોતાના યોગદાનમાંથી પૈસા વાપરવાની સુવિધા કેવી રીતે મળશે? જાણો નિયમો અને શરતો.
નિવૃત્તિ માટેની બચત જો જરૂરિયાતના સમયે બીમારીની સારવારમાં પણ કામ આવી જાય તો તે રોકાણકાર માટે ખૂબ મોટો ટેકો સાબિત થાય છે. આ બાબતને ધ્યાને રાખીને પેન્શન ફંડ રેગ્યુલેટરી એન્ડ ડેવલપમેન્ટ ઓથોરિટી (PFRDA) એ ‘NPS સ્વાસ્થ્ય’ (NPS Swasthya) ની સત્તાવાર ઓપરેશનલ ગાઇડલાઇન્સ જાહેર કરી દીધી છે. આ નવી જોગવાઈ અમલમાં આવતાં જ હવે NPS સબસ્ક્રાઇબર્સને નિવૃત્તિ ભંડોળની સાથે-સાથે હેલ્થ ઇન્શ્યોરન્સ કવરેજનો બેવડો લાભ મળશે.
NPS સાથે હેલ્થ ઇન્શ્યોરન્સનું અનોખું જોડાણ: PFRDA દ્વારા જાહેર કરાયેલ માળખા અનુસાર 'NPS સ્વાસ્થ્ય' મુખ્યત્વે બે હિસ્સામાં કાર્ય કરશે: NPS Swasthya Investment Account: જેમાં નિયમિત રોકાણ દ્વારા રિટાયરમેન્ટ ફંડ વધતું રહેશે. Super Top-Up Health Insurance Policy: જે સબસ્ક્રાઇબર અને તેના પરિવારને તબીબી કટોકટી સામે મોટું આર્થિક રક્ષણ પૂરું પાડશે.
કોણ જોડાઈ શકે અને કેટલી રકમથી શરૂઆત? NPS માં જોડાવા માટે પાત્રતા ધરાવતી કોઈપણ વ્યક્તિ આ સ્કીમમાં એનરોલ કરી શકે છે, જોકે આ માટે સંબંધિત હેલ્થ પોલિસી લેવી ફરજિયાત રહેશે. યોજનાની શરૂઆતમાં ગ્રાહકે પ્રથમ વર્ષનું હેલ્થ ઇન્શ્યોરન્સ પ્રીમિયમ, હેલ્થ બેનિફિટ એલાયન્સ (HBA) ના વાર્ષિક મેન્ટેનન્સ ચાર્જ પેટે ₹200, લાગુ ટેક્સ અને ઇન્વેસ્ટમેન્ટ એકાઉન્ટમાં ઓછામાં ઓછા ₹1,000 જમા કરાવવાના રહેશે. ત્યારબાદ ભવિષ્યમાં માત્ર ₹10 જેવી નજીવી રકમથી પણ યોગદાન આપી શકાશે.
સારવાર માટે 25% રકમ ઉપાડવાની મંજૂરી: પૈસા સીધા હોસ્પિટલને મળશે: આ સ્કીમની સૌથી વિશેષ સુવિધા આંશિક ઉપાડ (Partial Withdrawal) ની છે. સબસ્ક્રાઇબર પોતાના કુલ જમા યોગદાનમાંથી 25 ટકા સુધીની રકમ માન્ય હેલ્થકેર ખર્ચ માટે વાપરી શકે છે. આ રકમ ખાતાધારકના બેંક એકાઉન્ટમાં રોકડ સ્વરૂપે નહીં આવે, પરંતુ જે-તે હોસ્પિટલ કે હેલ્થકેર પ્રોવાઇડરને સીધી ટ્રાન્સફર કરવામાં આવશે. આ આંશિક ઉપાડ કેટલી વખત કરવો તેના પર કોઈ મહત્તમ મર્યાદા નથી, પરંતુ કુલ ઉપાડ 25 ટકાથી વધવો જોઈએ નહીં.
પરિવારના સભ્યો અને વયમર્યાદા: આ સ્ટાન્ડર્ડ પોલિસીમાં ફેમિલી ફ્લોટર વિકલ્પ ઉપલબ્ધ છે. તેમાં સબસ્ક્રાઇબરની સાથે પતિ/પત્ની અને બે આશ્રિત (ડિપેન્ડન્ટ) બાળકો આવરી લેવાશે. માતા-પિતા આ ફેમિલી ફ્લોટરમાં સામેલ નહીં થાય. યોજનામાં જોડાવાની વયમર્યાદા 18 થી 70 વર્ષ રાખવામાં આવી છે, જ્યારે નિયમો અને પ્રીમિયમની શરતોને આધીન 85 વર્ષની વય સુધી પોલિસીનું રિન્યુઅલ થઈ શકશે.
₹1 લાખથી ₹30 લાખ સુધીનું કવરેજ: પોલિસીમાં સમ ઇન્સ્યોર્ડ (Sum Insured) માટે ₹1 લાખ, ₹5 લાખ, ₹10 લાખ અને ₹30 લાખના ચાર સ્લેબ આપવામાં આવ્યા છે. તેની સાથે વાર્ષિક એગ્રીગેટ ડિડક્ટિબલ (Aggregate Deductible) અનુક્રમે ₹10,000, ₹50,000, ₹1 લાખ અને ₹3 લાખ નક્કી કરાયું છે. સામાન્ય હોસ્પિટલાઇઝેશનમાં સિંગલ પ્રાઇવેટ રૂમની પાત્રતા મળશે, જ્યારે ICU ના ચાર્જીસ વાસ્તવિક ખર્ચને આધારે મંજૂર કરાશે.
PFRDA ના આ નવા નિર્ણયથી NPS માત્ર લાંબા ગાળાના નિવૃત્તિ રોકાણ સુધી સીમિત ન રહેતાં, મુશ્કેલ સમયમાં આરોગ્યની સુરક્ષા આપતું સર્વગ્રાહી ફાઇનાન્સિયલ ટૂલ બની ગયું છે.
