મુકેશ અંબાણીએ વધાર્યું જગત જમાદાર ટ્રમ્પનું ટેન્શન, ગુજરાતની રિફાઇનરી સાથે છે કનેક્શન, જાણો
રિલાયન્સ ઇન્ડસ્ટ્રીઝે ડિસ્કાઉન્ટેડ દરે રશિયન ક્રૂડ ઓઇલની ખરીદી ફરી શરૂ કરી છે. કંપની હવે એવા રશિયન સપ્લાયર્સ પાસેથી તેલ આયાત કરી રહી છે, જે અમેરિકા અને યુરોપના પ્રતિબંધોની જપટમાં નથી. આ શિપમેન્ટ ગુજરાતના જામનગર સ્થિત વિશ્વની સૌથી મોટી રિફાઇનરીમાં મોકલવામાં આવી રહી છે. આ પગલાથી આ મહિને ભારતની રશિયન તેલ આયાતમાં થનારા ઘટાડાને મર્યાદિત રાખવામાં મદદ મળશે.
યુએસ દ્વારા રશિયન તેલ ઉત્પાદકો પર પ્રતિબંધો લાગુ કર્યા બાદ રિલાયન્સે થોડા સમય માટે રશિયન તેલની ખરીદી રોકી દીધી હતી અને મધ્ય પૂર્વમાંથી પુરવઠો વધાર્યો હતો. જોકે હવે બિન-મંજૂરી પામેલા રશિયન સપ્લાયર્સ ઉપલબ્ધ થતાં કંપનીએ ફરીથી રશિયન ક્રૂડ તરફ વળવાનું નક્કી કર્યું છે.
વિદેશી મીડિયા અહેવાલો મુજબ, એશિયાના સૌથી ધનિક ઉદ્યોગપતિ મુકેશ અંબાણીની માલિકીની જામનગર રિફાઇનરીએ ફરી એકવાર મોસ્કો સાથે જોડાણ સ્થાપિત કર્યું છે. આ વખતે રશિયન તેલનો પુરવઠો એવા ઉત્પાદકો પાસેથી લેવાઈ રહ્યો છે, જે અમેરિકન અને યુરોપિયન પ્રતિબંધોથી બહાર છે.
પ્રતિબંધિત કંપનીઓ બજારમાંથી પાછળ હટતાં અને નવી બિન-મંજૂરી કંપનીઓના ઉદય સાથે રિલાયન્સે રશિયન તેલની ખરીદી વધારવાનો નિર્ણય લીધો છે. હવે સૌથી મોટો સવાલ એ છે કે આ પગલાથી અમેરિકા અને યુરોપ સાથે ભારતના સંબંધોમાં ફરી તણાવ ઊભો થશે કે કેમ. અમેરિકાએ સંકેત આપ્યો છે કે રશિયન તેલ ખરીદવા પર ભારતને 25 ટકા વધારાની ટેરિફનો સામનો કરવો પડી શકે છે.
બ્લુમબર્ગના અહેવાલ મુજબ, આ મુદ્દાથી પરિચિત સૂત્રોએ જણાવ્યું છે કે રિલાયન્સ ઇન્ડસ્ટ્રીઝ લિમિટેડ બિન-મંજૂરી પામેલા રશિયન સપ્લાયર્સ પાસેથી અફ્રામેક્સ ટેન્કરો મારફતે ક્રૂડ ઓઇલ આયાત કરી રહી છે. આ તેલ 6.6 લાખ બેરલ પ્રતિ દિવસ ક્ષમતા ધરાવતી જામનગર રિફાઇનરીમાં પહોંચાડવામાં આવી રહ્યું છે, જ્યાંથી સ્થાનિક બજારમાં પુરવઠો થાય છે. આ ખરીદીથી ભારતની રશિયન તેલ આયાતમાં થનારો ઘટાડો અડધાથી વધુ રહેવાની શક્યતા ઓછી થઈ શકે છે.
યુક્રેન યુદ્ધને કારણે ક્રેમલિનના ભંડોળને રોકવા માટે અમેરિકાએ ઓક્ટોબરમાં રશિયાની બે મોટી તેલ કંપનીઓ—રોઝનેફ્ટ અને લ્યુકોઇલ—પર પ્રતિબંધો લાદ્યા હતા. આ પગલાં બાદ ભારતીય રિફાઇનરીઓને બિન-મંજૂરી પામેલા રશિયન ઉત્પાદકો તરફ વળવું પડ્યું હતું અથવા અન્ય દેશોથી વધુ ખર્ચાળ તેલ ખરીદવું પડ્યું હતું.
22 ઓક્ટોબરે પ્રતિબંધો લાગુ થયા બાદ રિલાયન્સે રશિયન તેલની ખરીદી રોકી હતી અને કંપનીને બંને ઉત્પાદકો સાથેના ચાલુ કરારો પૂર્ણ કરવા માટે એક મહિનાનો સમય આપવામાં આવ્યો હતો. સૂત્રોના જણાવ્યા અનુસાર, જામનગર સ્થિત વિશ્વના સૌથી મોટા રિફાઇનરી સંકુલને 22 ઓક્ટોબર પહેલાં કરાયેલા કરારો હેઠળના જહાજો સ્વીકારવા માટે વધારાનો સમય આપવામાં આવ્યો હતો.
