કાનુની સવાલ: “જેટલા મહિના લગ્ન ચાલ્યા, એટલા કરોડ આપો”, એલિમનીની માંગણી પર SCએ આપ્યો ચુકાદો
એક મહિલાએ ડિવોર્સના કેસમાં માગ કરી છે કે તેણે 12 કરોડ રુપિયા જોઈએ છે. આના પર ચીફ જસ્ટિસની બેન્ચે કહ્યું કે, તમારા લગ્ન ફક્ત 18 મહિના જ ટક્યા અને તમે 18 કરોડ રૂપિયાની માગ કરી રહ્યા છો. આનો અર્થ એ છે કે તમે લગ્નના દરેક મહિના માટે એક કરોડ રૂપિયા માંગો છો.
તેમણે મહિલાને પૂછ્યું કે તે કેટલી શિક્ષિત છે. આના પર મહિલાએ કહ્યું કે, તેણે MBA સુધીનો અભ્યાસ કર્યો છે અને અગાઉ IT ક્ષેત્રમાં કામ કર્યું છે. આના પર મુખ્ય ન્યાયાધીશે કહ્યું કે, તમે બેંગ્લોર અને હૈદરાબાદ જેવા શહેરોમાં કામ કરી શકો છો. તો પછી તમે કેમ કામ નથી કરતા?
એટલું જ નહીં મુખ્ય ન્યાયાધીશે લગ્નના ટૂંકા સમયગાળાનો ઉલ્લેખ કરતા કહ્યું કે, તે ફક્ત 18 મહિના ચાલ્યું અને તમે દર મહિને 1 કરોડની માગ કરી રહ્યા છો. પુરુષના વકીલ માધવી દીવાને કહ્યું કે, 18 મહિનાના લગ્નના અંતને કારણે મહિલા અનિશ્ચિત સમય માટે નાણાકીય સહાય માંગી શકતી નથી. દીવાને કહ્યું કે તે શિક્ષિત છે અને કામ કરી શકે છે. આ પછી બેન્ચે સંબંધિત વ્યક્તિની આવકવેરાની વિગતો પણ માગી જેથી નક્કી કરી શકાય કે તેની નાણાકીય સ્થિતિ શું છે. તે ભરણપોષણ તરીકે કેટલી રકમ આપવા સક્ષમ છે.
આ સાથે મુખ્ય ન્યાયાધીશે સ્પષ્ટ કર્યું કે, મહિલા એવી કોઈપણ મિલકતમાં હકનો દાવો કરી શકતી નથી જે તેના પૂર્વ પતિના નામે નહીં પરંતુ તેના પિતાના નામે હોય. અંતે કોર્ટે કહ્યું કે મહિલા કાં તો ફ્લેટ લઈ શકે છે અથવા 4 કરોડ રૂપિયાની રકમ માટે સમાધાન કરી શકે છે.
આ ઉપરાંત મુખ્ય ન્યાયાધીશે ત્યાં સુધી કહ્યું કે, જે લોકો નોકરી કરવા સક્ષમ છે તેઓ જાણી જોઈને બેરોજગારીનો માર્ગ પસંદ કરી શકતા નથી અને પછી તેની આડમાં મોટી રકમ માંગી શકતા નથી. તેમણે કહ્યું કે તમે શિક્ષિત છો. તમારે આ રકમ પર નિર્ભર ન રહેવું જોઈએ. તમારે જાતે કમાવવું જોઈએ અને સંપૂર્ણ ગૌરવ સાથે તમારું જીવન જીવવું જોઈએ.
(Disclaimer: જો તમારી પાસે કોઈ ચોક્કસ કેસ હોય તો કાનૂની નિષ્ણાત (વકીલ) ની સલાહ લેવી સલાહભર્યું છે. અહીં આપેલી માહિતી ફક્ત કોર્ટના નિર્ણયો અને કલમોને આધારે આપવામાં આવી છે. તમારે કોઈ કેસ માટે જાણવું હોય તો યોગ્ય વકીલની સલાહ લઈ શકો છો.)(All Image Symbolic)
