અબુધાબીમાં પ્રથમ હિન્દુ મંદિરના પ્રાણ પ્રતિષ્ઠા મહોત્સવને હવે માત્ર બે દિવસ બાકી છે. પીએમ મોદી 14 ફેબ્રુઆરીએ કાર્યક્રમમાં ભાગ લેશે. ઉલ્લેખનીય છે કે મધ્ય પૂર્વમાં પરંપરાગત હિંદુ સ્થાપત્ય શૈલીમાં પથ્થરથી બનેલું આ પ્રથમ મંદિર બનવા જઈ રહ્યું છે જેનું નિર્માણ BAPS સંસ્થા દ્વારા કરવામાં આવ્યું છે. અબુ ધાબીમાં સ્થિત આ ભવ્ય મંદિર ભારત અને સંયુક્ત આરબ અમીરાત વચ્ચે મિત્રતા, સાંસ્કૃતિક સંવાદિતા અને સહકારની ભાવનાનું પ્રતીક છે. પ્રાણ પ્રતિષ્ઠા કાર્યક્રમ પહેલા મંદિરને રોશનીથી ઝળહળતું કરવામાં આવે છે.
ઉલ્લેખનીય છે કે UAEમાં અન્ય ત્રણ હિન્દુ મંદિરો છે જે દુબઈમાં આવેલા છે. પરંતુ BAPS સમગ્ર ખાડી વિસ્તારમાં સૌથી મોટું મંદિર હશે. સ્ટોન આર્કિટેક્ચર સાથે વિશાળ વિસ્તારમાં ફેલાયેલું, BAPS મંદિર ગલ્ફ પ્રદેશમાં સૌથી મોટું મંદિર હશે. વડાપ્રધાન મોદી મંગળવારથી સંયુક્ત આરબ અમીરાતની બે દિવસની મુલાકાત લેશે અને આ દરમિયાન તેઓ 14 ફેબ્રુઆરીએ વિશાળ મંદિરનું ઉદ્ઘાટન કરશે. ખાસ વાત એ છે કે મંદિરના અંદરના ભાગના નિર્માણમાં 40,000 ઘનફૂટ માર્બલનો ઉપયોગ કરવામાં આવ્યો છે.
વડાપ્રધાન નરેન્દ્ર મોદીની UAE મુલાકાતને લઈને UAE ખૂબ જ ઉત્સાહિત જણાય છે. ભારતમાં UAEના રાજદૂત અબ્દુલનાસિર અલશાલીએ સોમવારે આશા વ્યક્ત કરી હતી કે આ બંને દેશો વચ્ચેના વ્યૂહાત્મક સંબંધોને નવી ઊંચાઈએ લઈ જશે. અલશાલીએ કહ્યું કે આ પ્રવાસ ખૂબ જ ખાસ છે. આ અંગે અમે ગર્વ અને સન્માનની લાગણી અનુભવીએ છીએ.
અલશાલીએ કહ્યું કે UAE-ભારત સંબંધ માત્ર દ્વિપક્ષીય અર્થમાં જ નહીં પરંતુ બહુપક્ષીય બેઠકો, મેળાવડા અને જોડાણો સહિત સહકારના અન્ય તમામ ક્ષેત્રોમાં પણ વ્યૂહાત્મક છે.
આ મંદિર અબુ ધાબીમાં 'અલ વકબા' નામની જગ્યા પર 20,000 ચોરસ મીટરની જમીન પર બનાવવામાં આવ્યું છે. હાઇવેને અડીને આવેલ અલ વકબા, અબુ ધાબીથી લગભગ 30 મિનિટના અંતરે છે. તમને જણાવી દઈએ કે ભારતીય દૂતાવાસના ડેટા અનુસાર, UAEમાં લગભગ 26 લાખ ભારતીયો રહે છે, જે ત્યાંની વસ્તીના લગભગ 30% છે.
મંદિરમાં કોતરણી દ્વારા અધિકૃત પ્રાચીન કલા અને સ્થાપત્યને પુનર્જીવિત કરવામાં આવ્યું છે. મંદિર પ્રબંધનના પ્રવક્તા અશોક કોટેચાએ જણાવ્યું હતું કે માસ્ટર પ્લાનની ડિઝાઇન 2020ની શરૂઆતમાં પૂર્ણ થઈ ગઈ હતી. સમુદાયના સમર્થન અને ભારત અને UAEના નેતૃત્વથી ઐતિહાસિક મંદિરનું કામ આગળ વધી રહ્યું છે.
તમને જણાવી દઈએ કે UAE સરકારે અબુ ધાબીમાં મંદિર બનાવવા માટે 20,000 ચોરસ મીટર જમીન આપી હતી. UAE સરકારે 2015માં આની જાહેરાત કરી હતી જ્યારે વડાપ્રધાન મોદી ત્યાં બે દિવસની મુલાકાતે ગયા હતા. સંયુક્ત આરબ અમીરાતની રાજધાની અબુ ધાબીમાં પહેલું હિન્દુ મંદિર તૈયાર છે. મંદિર નિર્માણમાં ઇકો-ફ્રેન્ડલી પદ્ધતિઓ પર ભાર મૂકવામાં આવી રહ્યો છે.
તમને જણાવી દઈએ કે 2018માં પીએમ નરેન્દ્ર મોદીની દુબઈ મુલાકાત દરમિયાન બોચાસણ નિવાસી અક્ષર પુરુષોત્તમ સ્વામિનારાયણ સંસ્થાએ ત્યાં ઓપેરા હાઉસથી વીડિયો કોન્ફરન્સિંગ દ્વારા મંદિરનો શિલાન્યાસ કર્યો હતો.
Published On - 11:33 pm, Mon, 12 February 24