પાકિસ્તાન જેના પર ઉછળકૂદ કરી વિશ્વમાં આતંક ફેલાવે છે તે અણુ મથકોનો હવાલો IAEA લઈ લેઃ રાજનાથસિંહ
પાકિસ્તાનના આંતકી ઠેકાણાઓને નષ્ટ કરવા ભારતે કરેલ ઓપરેશન સિંદૂર બાદ, રક્ષા પ્રધાન રાજનાથ સિંહે આજે જમ્મુ કાશ્મીરમાં સૈન્ય મથકોની મુલાકાત લીધી હતી. ઓપરેશન સિંદૂર અને યુદ્ધવિરામ કરાર બાદ સંરક્ષણ પ્રધાન રાજનાથસિંહની આજની મુલાકાતને ખૂબ જ સૂચક માનવામાં આવે છે. જમ્મુ કાશ્મીરમાં સૈન્ય જવાનોને સંબોધતા રાજનાથસિંહે કહ્યું કે, પાકિસ્તાનના પરમાણુ શસ્ત્રોને આંતરરાષ્ટ્રીય પરમાણુ ઉર્જા એજન્સી (IAEA) ની દેખરેખ હેઠળ લઈ લેવા જોઈએ.
સંરક્ષણ મંત્રી રાજનાથ સિંહે કહ્યું કે હું આખી દુનિયાને પૂછું છું કે શું પાકિસ્તાન જેવા બેજવાબદાર અને દુષ્ટ રાષ્ટ્રના હાથમાં પરમાણુ શસ્ત્રો સુરક્ષિત છે ખરા ? મારું માનવું છે કે પાકિસ્તાનના પરમાણુ શસ્ત્રોને આંતરરાષ્ટ્રીય પરમાણુ ઉર્જા એજન્સી (IAEA) ની દેખરેખ હેઠળ લઈ લેવા જોઈએ.
પ્રધાનમંત્રી નરેન્દ્ર મોદીએ આતંકવાદ સામે ભારતની નીતિને સ્પષ્ટ રીતે ફરીથી વ્યાખ્યાયિત કરી છે, અને કહ્યું છે કે ભારતીય ભૂમિ પર કોઈપણ આતંકવાદી હુમલાને યુદ્ધ તરીકે ગણવામાં આવશે. બંને દેશો વચ્ચે હવે જે સમજૂતી બની છે તે એ છે કે સરહદ પાર કોઈ પણ અયોગ્ય પ્રવૃત્તિ કરવામાં આવશે નહીં. જો આ કરવામાં આવશે તો મામલો બહાર આવશે અને ઘણો આગળ વધશે. આપણા વડા પ્રધાને પણ સ્પષ્ટ કર્યું છે કે આતંકવાદ અને વાતચીત એકસાથે નહીં ચાલે અને જો વાતચીત થશે તો તે આતંકવાદ અને પીઓકે પર થશે.
સંરક્ષણ પ્રધાન રાજનાથ સિંહે કહ્યું કે જેમ પીએમ મોદીએ કહ્યું છે કે આતંકવાદ અને વાતચીત એકસાથે ચાલી શકે નહીં. જો કોઈ ચર્ચા થશે તો તે ફક્ત આતંકવાદ અને પાકિસ્તાને પચાવી પાડેલા ભારતના કાશ્મીર મુદ્દા પર જ થશે. દુનિયા જાણે છે કે આપણી સેનાનું લક્ષ્ય સચોટ છે અને જ્યારે તેઓ નિશાન બનાવે છે, ત્યારે દુશ્મન ગોળીબારની ગણતરી કરે છે. આતંકવાદીઓએ તેમના ધર્મના આધારે હત્યા કરી છે જ્યારે ભારતે તેમના કાર્યોના આધારે તેમનો નાશ કર્યો છે.
Published On - 4:06 pm, Thu, 15 May 25
