Adani Investment : આ રિયલ એસ્ટેટ કંપની પર આવ્યું અદાણીનું દિલ, ચાલી રહી છે ડીલ માટે વાતચીત
અદાણી રિયલ્ટીએ રિયલ એસ્ટેટની અગ્રણી કંપની એમાર ઈન્ડિયામાં હિસ્સો ખરીદવા માટે વાતચીત શરૂ કરી છે. હાલમાં, Emaar India દેશના 5 બજારો ગુડગાંવ, જયપુર, લખનૌ, મોહાલી અને ઈન્દોરમાં હાજરી ધરાવે છે.
ગૌતમ અદાણી ગ્રુપની કંપની રિયલ એસ્ટેટ સેક્ટરમાં મોટા સોદાની તૈયારી કરી રહી છે. ગ્રુપની કંપની અદાણી રિયલ્ટીએ રિયલ એસ્ટેટની અગ્રણી કંપની એમાર ઈન્ડિયામાં હિસ્સો ખરીદવા માટે વાતચીત શરૂ કરી છે. તમને જણાવી દઈએ કે Emaar India તેની ગ્લોબલ પેરન્ટ કંપની Emaar Groupની માલિકીની છે.
Emaar Group એ અગ્રણી રિયલ એસ્ટેટ ડેવલપર છે જેનું મુખ્ય મથક દુબઈ, સંયુક્ત આરબ અમીરાતમાં છે. સૂત્રોએ જણાવ્યા અનુસાર અમદાવાદ સ્થિત કંપની અદાણી રિયલ્ટીના વરિષ્ઠ અધિકારીઓ Emaar Indiaના નેતૃત્વ સાથે વાતચીત કરી રહ્યા છે. સૂત્રના જણાવ્યા અનુસાર, સંભવિત ટ્રાન્ઝેક્શનની ચર્ચા ચાલી રહી છે, જેમાં એમાર ઈન્ડિયામાં તેની માલિકીનો એક હિસ્સો અદાણી ગ્રુપને વેચવાનો સમાવેશ થાય છે. જો કે હજુ સુધી તેને અંતિમ સ્વરૂપ આપવામાં આવ્યું નથી.
સૂત્રોનું કહેવું છે કે બંને એન્ટિટી હાલમાં તેમની વાટાઘાટોના પ્રારંભિક તબક્કામાં છે અને હિસ્સાના વેચાણ માટે બ્લુ પ્રિન્ટ તૈયાર કરવામાં આવી રહી છે. અન્ય એક સૂત્રએ જણાવ્યું હતું કે અદાણી ગ્રૂપ દ્વારા કેટલો હિસ્સો લેવામાં આવશે તેની કોઈ નિશ્ચિતતા નથી
ગુડગાંવ-મુખ્યમથક ધરાવતી Emaar India દેશના કોમર્શિયલ અને હાઉસિંગ રિયલ એસ્ટેટ માર્કેટમાં અગ્રણી કંપની છે. અગાઉ, Emaar India ના CEO કલ્યાણ ચક્રવર્તીએ આ વર્ષે 8-10 મિલિયન ચોરસ ફૂટના રિયલ એસ્ટેટ પ્રોજેક્ટ્સ લોન્ચ કરવાની યોજના વિશે વાત કરી હતી. આ પ્રોજેક્ટ્સમાં 2029 સુધીમાં લગભગ એક અબજ યુએસ ડોલર (વર્તમાન દરે રૂપિયા 8,400 કરોડ)નું રોકાણ કરવામાં આવશે. મીડિયા સાથે વાત કરતાં તેમણે કહ્યું હતું કે 80 ટકા નવા પ્રોજેક્ટ ગુડગાંવમાં હશે. હાલમાં કંપની દેશના 5 બજારોમાં હાજરી ધરાવે છે - ગુડગાંવ, જયપુર, લખનૌ, મોહાલી અને ઈન્દોર.
FY23માં Emaar India Ltdની ઓપરેટિંગ આવક 31.4 ટકા ઘટીને રૂપિયા 1,670 કરોડ થઈ હતી. ગયા વર્ષે તેની ઓપરેટિંગ આવક રૂપિયા 2,434 કરોડ હતી. નાણાકીય વર્ષ 2022માં રૂપિયા 189 કરોડનો ચોખ્ખો નફો થયો હતો. તે જ સમયે, નાણાકીય વર્ષ 2023 માં, કંપનીએ 118.7 કરોડ રૂપિયાની ખોટ નોંધાવી હતી.