IPL 2026: આ વિદેશી ખેલાડીઓ તેમની ધાક જમાવશે! ફ્રેન્ચાઇઝીઓ કરોડોની બોલી લગાવશે
IPL ફ્રેન્ચાઇઝીઓએ રિટેન અને રિલીઝ થયેલા ખેલાડીઓની યાદી જાહેર કરી છે. આ યાદીમાં કેટલાક નામો એવા છે કે, જેમણે ક્રિકેટ ફેન્સને આશ્ચર્યચકિત કરી દીધા છે.
ગઈ સીઝનની ફાઇનલિસ્ટ ટીમ પંજાબ કિંગ્સે વિસ્ફોટક બેટ્સમેન ગ્લેન મેક્સવેલને રિલીઝ કર્યો છે. રિકી પોન્ટિંગ જ્યારે પંજાબ કિંગ્સના કોચ બન્યા ત્યારે મેક્સવેલને ટીમમાં લાવવામાં આવ્યો હતો. જો કે, આ તોફાની બેટ્સમેન નિષ્ફળ ગયો. તેણે ગયા સીઝનમાં 7 મેચ રમી અને ફક્ત 48 રન બનાવ્યા હતા.
ગુજરાત ટાઇટન્સમાંથી લખનૌ સુપર જાયન્ટ્સમાં જોડાયેલ ડેવિડ મિલરને પણ ફ્રેન્ચાઇઝીએ રિલીઝ કરી દીધો છે. ગુજરાતની વર્ષ 2022ની ટાઇટલ જીતમાં મુખ્ય ભૂમિકા ભજવનાર મિલરને લખનૌએ ફિનિશરની ભૂમિકા તરીકે ટીમમાં જોડ્યો હતો પરંતુ તે સફળ થઈ શક્યો નહીં અને ફ્રેન્ચાઇઝીએ આ વર્ષે તેને રિલીઝ કરવાનો નિર્ણય લીધો.
ચેન્નાઈ સુપર કિંગ્સની સફળતામાં મુખ્ય ભૂમિકા ભજવનાર અને ત્યારબાદ 3 વર્ષ સુધી રોયલ ચેલેન્જર્સ બેંગ્લોરની કેપ્ટનશીપ કરનાર ફાફ ડુ પ્લેસિસને ગયા વર્ષે દિલ્હી કેપિટલ્સે ટીમમાં જોડ્યો હતો. જો કે, આ વખતે ફ્રેન્ચાઇઝીએ તેને રિલીઝ કર્યો છે. હરાજીમાં ફ્રેન્ચાઇઝી તેને ફરીથી ટીમમાં જોડવાનો પ્રયાસ કરશે, તેવી આશા છે.
ઇંગ્લેન્ડના વિસ્ફોટક બેટ્સમેન લિયામ લિવિંગસ્ટોનને પણ ડિફેન્ડિંગ ચેમ્પિયન રોયલ ચેલેન્જર્સ બેંગ્લોરે રિલીઝ કર્યો છે. RCB એ ગયા સિઝનમાં ટાઇટલ જીત્યું હતું પરંતુ જમણા હાથનો આ બેટ્સમેન ખાસ ભૂમિકા ભજવી શક્યો નહીં. લિવિંગસ્ટોને 10 મેચ રમી અને 112 રન બનાવ્યા, જેમાં 1 અડધી સદીનો સમાવેશ થાય છે.
