Year Ender : 2024માં 10 ભારતીય ખેલાડીઓની કારકિર્દી થઈ સમાપ્ત, એક બેંકમાં કરે છે કામ, એક પાડોશી દેશનો બન્યો કેપ્ટન
વર્ષ 2025 માં હવે ગણતરીના દિવસો જ બાકી છે. વર્ષ 2024 વિદાય લેવાનું છે અને ટૂંક સમયમાં જ વર્ષ 2025 દસ્તક આપશે. ભારતીય ક્રિકેટના ઈતિહાસમાં વર્ષ 2024 હંમેશા યાદ રહેશે. કારણ કે આ વર્ષે ભારતીય પુરૂષ ક્રિકેટ ટીમે T20 વર્લ્ડ કપનો ખિતાબ જીતીને 17 વર્ષની રાહનો અંત આણ્યો હતો. જો કે તેની સાથે આ વર્ષ કેટલાક સ્ટાર ભારતીય ખેલાડીઓની નિવૃત્તિ માટે પણ યાદ કરવામાં આવશે. આ વર્ષે, રોહિત શર્મા અને વિરાટ કોહલી જેવા દિગ્ગજોએ T20 આંતરરાષ્ટ્રીય ક્રિકેટમાંથી નિવૃત્તિ લીધી હતી. તેની સાથે અન્ય ઘણા ભારતીયોએ 2024માં નિવૃત્તિ લઈને ક્રિકેટને અલવિદા કહ્યું. આવો જાણીએ આ તમામ ક્રિકેટરો વિશે.
વર્ષ 2024માં રોહિત શર્મા, વિરાટ કોહલી અને રવીન્દ્ર જાડેજા જેવા દિગ્ગજોએ T-20 આંતરરાષ્ટ્રીય ક્રિકેટમાંથી નિવૃત્તિ લીધી હતી. આ સિવાય અન્ય ઘણા ક્રિકેટરોએ 2024માં પોતાની ક્રિકેટ કારકિર્દીનો અંત લાવ્યો છે. વિરાટ, રોહિત અને જાડેજા સિવાય અન્ય તમામ ક્રિકેટરોએ ક્રિકેટના તમામ ફોર્મેટમાંથી નિવૃત્તિ જાહેર કરી હતી.
વિશ્વ ક્રિકેટમાં 'કિંગ' તરીકે જાણીતા વિરાટ કોહલીએ T20 વર્લ્ડ કપ જીત્યા બાદ જ નિવૃત્તિની જાહેરાત કરી દીધી હતી. જોકે તેણે માત્ર T20 ઈન્ટરનેશનલમાંથી નિવૃત્તિ લીધી હતી. તે હજુ પણ ટેસ્ટ અને વનડે ક્રિકેટ રમી રહ્યો છે. વિરાટે 125 T20 મેચમાં 4188 રન બનાવ્યા છે.
ભારતીય કેપ્ટન રોહિત શર્માએ પણ વિરાટની સાથે તેના T20 આંતરરાષ્ટ્રીય ક્રિકેટને વિરામ આપ્યો હતો. ભારતને T20 વર્લ્ડ ચેમ્પિયન બનાવનાર રોહિતે ટેસ્ટ અને ODI ક્રિકેટ રમવાનું ચાલુ રાખ્યું છે. તેણે 159 T20 મેચમાં 4231 રન બનાવ્યા છે.
રોહિત અને વિરાટની યાદીમાં ભારતના સ્ટાર ઓલરાઉન્ડર રવીન્દ્ર જાડેજાનો પણ સમાવેશ થાય છે. T20 વર્લ્ડ ચેમ્પિયન બન્યા બાદ જાડેજાએ T20 ઈન્ટરનેશનલ ક્રિકેટમાંથી પણ નિવૃત્તિ લીધી હતી. જોકે, તેણે ટેસ્ટ અને વનડેમાંથી નિવૃત્તિની જાહેરાત કરી ન હતી. જાડેજાએ ભારત માટે 74 T20 મેચ રમી છે.
ભારત માટે 9 T20 આંતરરાષ્ટ્રીય અને 73 ODI રમી ચૂકેલા કેદાર જાધવે આ વર્ષે જૂનમાં નિવૃત્તિની જાહેરાત કરી હતી. તેણે સોશિયલ મીડિયા દ્વારા આંતરરાષ્ટ્રીય ક્રિકેટમાંથી નિવૃત્તિની જાહેરાત કરી હતી.
ભારત માટે ત્રણ વનડે અને ત્રણ T20 આંતરરાષ્ટ્રીય મેચ રમી ચૂકેલા સિદ્ધાર્થ કૌલે પણ આંતરરાષ્ટ્રીય ક્રિકેટને અલવિદા કહી દીધું છે. 28 નવેમ્બરે આંતરરાષ્ટ્રીય ક્રિકેટમાંથી નિવૃત્તિ જાહેર કરનાર સિદ્ધાર્થ હવે સ્ટેટ બેંક ઓફ ઈન્ડિયામાં કામ કરી રહ્યો છે.
2011માં ભારત માટે ટેસ્ટ ડેબ્યૂ કરનાર વરુણ એરોને ફેબ્રુઆરી 2024માં રેડ બોલ ક્રિકેટમાંથી નિવૃત્તિની જાહેરાત કરી હતી. તેણે પોતાની સોશિયલ મીડિયા પોસ્ટમાં લખ્યું, 'હું 2008થી લાલ બોલની ક્રિકેટ રમી રહ્યો છું. કારણ કે મેં ઝડપી બોલિંગ કરી, મને ઘણી ઈજાઓ થઈ. હવે હું સમજી ગયો છું કે મારું શરીર મને આ ફોર્મેટમાં ઝડપી બોલિંગ કરવાનું ચાલુ રાખવા દેશે નહીં, તેથી મેં ક્રિકેટ છોડવાનો નિર્ણય કર્યો છે.
માત્ર બેટિંગથી જ નહીં પરંતુ વિકેટકીપિંગથી પણ ચાહકોનું દિલ જીતનાર દિનેશ કાર્તિકે આ વર્ષે 1 જૂને પોતાના 39માં જન્મદિવસના અવસર પર આંતરરાષ્ટ્રીય ક્રિકેટમાંથી નિવૃત્તિ લીધી હતી. કાર્તિકે IPLમાંથી પણ નિવૃત્તિ લઈ લીધી છે. તે હવે કોમેન્ટ્રી કરતો જોવા મળી રહ્યો છે.
ભારત માટે ટેસ્ટ અને વનડે રમી ચૂકેલા વિકેટકીપર બેટ્સમેન રિદ્ધિમાન સાહાએ પણ આ વર્ષે ક્રિકેટના તમામ ફોર્મેટમાંથી નિવૃત્તિની જાહેરાત કરી હતી. નવેમ્બર 2024માં તેણે કહ્યું હતું કે તે ક્રિકેટને અલવિદા કહી રહ્યો છે. તેણે 40 ટેસ્ટ અને 9 વનડે રમી હતી.
IPLમાં 93 મેચ રમી ચુકેલા સૌરભ તિવારીએ ટીમ ઈન્ડિયા માટે 3 ODI રમી છે. સૌરભે આ વર્ષની શરૂઆતમાં આંતરરાષ્ટ્રીય ક્રિકેટનો અંત લાવ્યો હતો. તે હાલમાં લંકા T10 સુપર લીગમાં 'નુવારા એલિયા કિંગ્સ' ટીમની કેપ્ટનશીપ કરી રહ્યો છે.
ભારતના સ્ટાર ક્રિકેટર શિખર ધવને આ વર્ષે ઓગસ્ટમાં ક્રિકેટના તમામ ફોર્મેટમાંથી નિવૃત્તિની જાહેરાત કરી હતી. તેણે આંતરરાષ્ટ્રીય અને સ્થાનિક ક્રિકેટમાંથી નિવૃત્તિ લઈ લીધી છે. ધવને ભારત માટે 167 ODI, 34 ટેસ્ટ અને 18 T20 આંતરરાષ્ટ્રીય મેચ રમી છે. (All Photo Credit : X / INSTAGRAM / BCCI / ICC / ESPN)