IPL 2025 : 53.75 કરોડ રૂપિયાના IPL ઈતિહાસના બે સૌથી મોંઘા ખેલાડીઓ વચ્ચે થશે ટક્કર
પહેલી એપ્રિલની રાતે વિશ્વની સૌથી લોકપ્રિય અને સૌથી સફળ ક્રિકેટ લીગમાં પહેલીવાર બે સૌથી મોંઘા ખેલાડીઓની ટક્કર થવાની છે. આ બે ખેલાડી પર ઓક્શનમાં સૌથી મોટી બોલી લાગી હતી, અને હવે આ બંને મેદાનમાં પોતપોતાની ટીમને ચેમ્પિયન બનાવવા તૈયાર છે.
IPL 2025માં રિષભ LSG અને શ્રેયસ PBKSની કપ્તાની કરી રહ્યો છે. રિષભ પંતના નેતૃત્વ હેઠળ લખનૌ સુપર જાયન્ટ્સની આ ત્રીજી મેચ હશે. જ્યારે શ્રેયસ અય્યરની પંજાબ કિંગ્સ આ સિઝનની પોતાની બીજી મેચ રમશે.
IPL 2025ની પોતાની પહેલી મેચમાં લખનૌને હારનો સામનો કરવો પડ્યો હતો. તે મેચમાં 27 કરોડમાં ટીમમાં સામેલ રિષભ પંત ખાતું પણ ખોલાવી શક્યો ન હતો. પરંતુ બીજી મેચમાં LSGએ હૈદરાબાદને હરાવ્યું હતું. જોકે, અહીં પણ પંત ફ્લોપ રહ્યો અને માત્ર 15 રન બનાવી આઉટ થયો હતો.
પંજાબ કિંગ્સની વાત કરીએ તો તેઓએ IPL 2025માં ગુજરાત ટાઈટન્સ સામે જીત સાથે અભિયાનની શરૂઆત કરી હતી. પંજાબ કિંગ્સ 11 રનથી જીતી ગયું. આ મેચમાં, 26.75 કરોડ રૂપિયાની કિંમતના IPL ઈતિહાસના બીજા સૌથી મોંઘા ખેલાડી શ્રેયસ અય્યરે 42 બોલમાં 97 રનની તોફાની ઈનિંગ રમી હતી.
IPL 2025માં પહેલીવાર બે સૌથી મોંઘા ખેલાડીઓ ટકરાશે, પરંતુ અત્યાર સુધીના બંનેના પ્રદર્શનમાં શ્રેયસ અય્યરનું ફોર્મ રિષભ પંતના ફોર્મ કરતા વધુ સારું રહ્યું છે. જોકે, ક્રિકેટમાં દરેક દિવસ નવો હોય છે, એવામાં આજની મેચમાં કોણ કોના પર ભારે પડશે તે જોવાનું રસપ્રદ રહેશે. (All Photo Credit : PTI)
