RCB vs PBKS : વિરાટ કોહલીએ IPL ફાઈનલમાં બનાવ્યો મોટો રેકોર્ડ, શિખર ધવનને પાછળ છોડી બન્યો નંબર 1
IPL 2025ની સિઝન વિરાટ કોહલી માટે સારી રહી અને તેણે ફરી એકવાર 600થી વધુ રન બનાવ્યા. ઉપરાંત દર વખતની જેમ, આ વખતે પણ તેણે ઘણા રેકોર્ડ તોડ્યા. તે ફાઈનલમાં કંઈ ખાસ કરી શક્યો નહીં, પરંતુ આ સિઝનના અંત સુધીમાં તેણે બીજો મોટો રેકોર્ડ બનાવ્યો.
વિરાટ કોહલીએ IPL 2025માં 600થી વધુ રન બનાવ્યા. આ રીતે, તેણે પોતાની ટીમ રોયલ ચેલેન્જર્સ બેંગલુરુને ફાઈનલમાં પહોંચાડવામાં મહત્વપૂર્ણ ભૂમિકા ભજવી. પછી કોહલીએ પંજાબ કિંગ્સ સામે ફાઈન લેગ પર શોટ રમ્યો કે તરત જ તેના નામે IPLનો એક નવો રેકોર્ડ નોંધાઈ ગયો.
IPL ઈતિહાસમાં સૌથી સફળ બેટ્સમેન વિરાટ કોહલી પહેલાથી જ સૌથી વધુ રન અને સદીનો રેકોર્ડ ધરાવે છે. કોહલીએ 8,500થી વધુ રન બનાવ્યા છે અને 8 સદી પણ ફટકારી છે. પરંતુ હવે, આ સાથે કોહલીએ IPLમાં સૌથી વધુ ચોગ્ગા ફટકારવાનો રેકોર્ડ પણ બનાવ્યો છે.
ફાઈનલમાં પહેલા બેટિંગ કરવા આવેલી RCBની ચોથી ઓવરમાં કોહલીએ કાયલ જેમિસનના પહેલા બોલ પર ફાઈન લેગ તરફ શોટ રમ્યો. આ શોટ પર, બોલ સીધો બાઉન્ડ્રી પાર ગયો અને આ સાથે કોહલીના IPLમાં 769 ચોગ્ગા થયા. તેણે IPLમાં સૌથી વધુ 768 ચોગ્ગા ફટકારવાનો શિખર ધવનનો રેકોર્ડ તોડ્યો હતો.
આ સિઝનની વાત કરીએ તો, વિરાટ કોહલીએ પહેલી મેચમાં અડધી સદી ફટકારીને શરૂઆત કરી હતી અને ટીમને ફાઈનલમાં પહોંચાડવામાં મોટી ભૂમિકા ભજવી હતી. તે IPLમાં સૌથી વધુ વખત એટલે કે 5 વખત એક સિઝનમાં 600 થી વધુ રન બનાવનાર બેટ્સમેન પણ બન્યો હતો.
આ સિઝનમાં પણ વિરાટ કોહલીએ ઘણા ચોગ્ગા ફટકાર્યા છે અને 66 ચોગ્ગા ફટકાર્યા છે. જોકે, આ યાદીમાં ટોચ પર ગુજરાત ટાઈટન્સના સ્ટાર યુવા ઓપનર સાઈ સુદર્શન છે, જેણે સૌથી વધુ 88 ચોગ્ગા ફટકાર્યા છે, જ્યારે વિરાટ કોહલી 69 ચોગ્ગા સાથે બીજા સ્થાને છે. (All Photo Credit : PTI)
Published On - 10:23 pm, Tue, 3 June 25
