ચિન્નાસ્વામી સ્ટેડિયમ ખાતે 4 મે, શનિવારે રોયલ ચેલેન્જર્સ બેંગ્લોર સામે ગુજરાત ટાઈટન્સની બેટિંગ ખરાબ રીતે નિષ્ફળ રહી અને પાવરપ્લેમાં કેપ્ટન શુભમન ગિલ સહિત GTનો ટોપ ઓર્ડર સુપર ફ્લોપ રહ્યો હતો.
પોતાની નબળી બોલિંગને કારણે આ સિઝનની શરૂઆતથી જ સતત હારતી રહેલી રોયલ ચેલેન્જર્સ બેંગ્લોરે ગુજરાત ટાઈટન્સ સામેની મેચમાં જોરદાર શરૂઆત કરીને શુભમન ગિલની ટીમને મુશ્કેલીમાં મૂકી દીધી હતી. પાવરપ્લેમાં જ ગુજરાતે 3 વિકેટ ગુમાવી દીધી હતી. મોહમ્મદ સિરાજ અને કેમરન ગ્રીને 6 ઓવરમાં જ ટીમની પ્રથમ 3 વિકેટ ગુમાવી દીધી હતી.
પાવરપ્લે પુરો થયો ત્યાં સુધીમાં ગુજરાતની ટીમ માત્ર 23 રન જ બનાવી શકી હતી, જ્યારે તેમની 3 વિકેટ પડી ગઈ હતી. આ સાથે, ગુજરાત ટાઈટન્સનો આ સ્કોર IPL 2024 માં પાવરપ્લેમાં સૌથી ઓછો સ્કોર પણ સાબિત થયો. આ પહેલા આ રેકોર્ડ પંજાબ કિંગ્સના નામે હતો, જેણે સનરાઈઝર્સ હૈદરાબાદ સામે પ્રથમ 6 ઓવરમાં માત્ર 27 રન બનાવ્યા હતા.
એટલું જ નહીં IPLના ઈતિહાસમાં પાવરપ્લેમાં ગુજરાતનો આ સૌથી નાનો સ્કોર પણ છે. માત્ર આ મેચ જ નહીં પરંતુ આ સિઝનમાં ગુજરાતની ટીમ પાવરપ્લેમાં ઝડપી શરૂઆત કરવામાં નિષ્ફળ રહી છે. આ સિઝનમાં તેમનો પાવરપ્લે રન રેટ 7.54 રહ્યો છે, જે તમામ 10 ટીમોમાં સૌથી ઓછો છે.
બેંગલુરુના સ્ટાર ફાસ્ટ બોલર મોહમ્મદ સિરાજે ગુજરાતની હાલત ખરાબ કરવામાં સૌથી મોટી ભૂમિકા ભજવી હતી, જે આ સિઝનમાં સંઘર્ષ કરી રહ્યો હતો. તેણે બીજી ઓવરમાં રિદ્ધિમાન સાહા અને ચોથી ઓવરમાં કેપ્ટન શુભમન ગિલની વિકેટ લીધી હતી. ત્યાર બાદ છઠ્ઠી ઓવરમાં કેમરૂન ગ્રીને સાઈ સુદર્શનની વિકેટ લીધી હતી.