IND vs PAK T20 WC Breaking : એક મેચ, કરોડોનો વરસાદ! ભારત-પાકિસ્તાન મેચમાં જાહેરાતની કિંમત જાણીને આંખો ફાટી જશે
T20 વર્લ્ડ કપ 2026માં ભારત અને પાકિસ્તાન વચ્ચે યોજાનારી મેચને લઈને હજુ સુધી સ્પષ્ટતા થઈ નથી. પાકિસ્તાન ક્રિકેટ બોર્ડ (PCB) દ્વારા ભારત સામે રમવા અંગે ઇનકારની વાત સામે આવી છે, જેના પગલે ICC સાથે ચર્ચાઓ ચાલી રહી છે. પરંતુ આ મેચ રમાય કે ન રમાય, તેની આસપાસનો વ્યાવસાયિક દાવ ખૂબ મોટો છે.
ભારત-પાકિસ્તાન ક્રિકેટ મેચ વિશ્વની સૌથી વધુ જોવાતી સ્પોર્ટ્સ ઇવેન્ટ્સમાંની એક છે. માત્ર ભારત અને પાકિસ્તાન જ નહીં, પરંતુ વિશ્વભરમાં રહેતા કરોડો દક્ષિણ એશિયાઈ દર્શકો આ મેચને લાઈવ જોતા હોય છે. સતત ઊંચી TRPને કારણે આ મેચ બ્રાન્ડ્સ અને જાહેરાતકર્તાઓ માટે સૌથી વધુ માંગવાળી ઇન્વેન્ટરી બની જાય છે.
આ હાઈ-વોલ્ટેજ મુકાબલા દરમિયાન જાહેરાતના દર આસમાને પહોંચે છે. તાજેતરના ટ્રેન્ડ મુજબ, ભારત-પાકિસ્તાન મેચમાં 10 સેકન્ડની ટીવી જાહેરાત માટે ₹14 લાખથી લઈને ₹50 લાખ સુધી ચૂકવવા પડે છે. વર્લ્ડ કપ અને ચેમ્પિયન્સ ટ્રોફી જેવી ICC ઇવેન્ટ્સમાં આ દર સૌથી વધુ હોય છે.
એશિયા કપ 2025માં ભારત-પાકિસ્તાન મેચ માટે પ્રતિ 10 સેકન્ડે આશરે ₹14 થી ₹16 લાખનો દર હતો. જ્યારે ચેમ્પિયન્સ ટ્રોફી 2025-26માં આ દરોમાં મોટો ઉછાળો જોવા મળ્યો હતો અને ₹20 લાખથી ₹50 લાખ સુધી પહોંચ્યા હતા. નોકઆઉટ અને પ્રીમિયમ મેચોમાં સરેરાશ દર ₹35 થી ₹40 લાખ રહ્યા હતા.
ટેલિવિઝન સિવાય હવે ડિજિટલ પ્લેટફોર્મ પર પણ જાહેરાત માટે ભારે માંગ છે. એશિયા કપ દરમિયાન ડિજિટલ જાહેરાત દરો પ્રતિ 10 સેકન્ડે ₹15 લાખ સુધી પહોંચ્યા હતા, જ્યારે ફાઇનલ અને હાઈ-પ્રોફાઇલ મેચોમાં ₹25 થી ₹30 લાખ સુધી ચૂકવવામાં આવ્યા હતા.
જો ભારત-પાકિસ્તાન મેચ રદ થાય તો બ્રોડકાસ્ટર્સને સીધી જાહેરાત આવકમાં અંદાજે ₹200 થી ₹250 કરોડનું નુકસાન થવાની શક્યતા છે. ઉપરાંત, સ્પોન્સરશિપ ડીલ્સ અને બ્રાન્ડ કમિટમેન્ટ્સ પર પણ મોટો અસર પડી શકે છે. (PC: PTI/X)
