અફઘાનિસ્તાન શ્રેણી પહેલા ટીમ ઈન્ડિયા માટે સારા સમાચાર, 3 ઓલરાઉન્ડર વાપસી માટે તૈયાર, બુમરાહ અંગે મોટું અપડેટ
અફઘાનિસ્તાન સામેની T20I શ્રેણી પહેલા ટીમ ઈન્ડિયા માટે સારા સમાચાર સામે આવ્યા છે. હાર્દિક પંડ્યા, નીતિશ કુમાર રેડ્ડી અને વોશિંગ્ટન સુંદર ફિટનેસ મેળવીને વાપસી માટે તૈયાર છે. બીજી તરફ, જસપ્રીત બુમરાહની રિકવરી પર પણ પસંદગીકારોની નજર છે. જોકે, અફઘાનિસ્તાન સામે તેની વાપસી અંગે હજુ સ્થિતિ સ્પષ્ટ નથી અને ટીમ મેનેજમેન્ટ તેને લઈને સાવચેતી રાખી રહ્યું છે.
ભારતીય ટીમે શ્રીલંકા પ્રવાસ બાદ હવે અફઘાનિસ્તાન સામે ત્રણ મેચની T20I શ્રેણી રમવાની છે. 13 સપ્ટેમ્બરથી શરૂ થનારી આ શ્રેણી પહેલા ટીમ મેનેજમેન્ટ માટે ત્રણ મહત્વપૂર્ણ ખેલાડીઓની ફિટનેસ રાહતના સમાચાર છે.
હાર્દિક પંડ્યા, નીતિશ કુમાર રેડ્ડી અને વોશિંગ્ટન સુંદર પોતાની ફિટનેસ પર સતત કામ કરી રહ્યા છે. અહેવાલ મુજબ, ત્રણેય ખેલાડીઓ શ્રેણી પહેલા પસંદગી માટે ઉપલબ્ધ થઈ શકે છે.
નીતિશ કુમાર રેડ્ડી BCCI સેન્ટર ઓફ એક્સેલન્સમાં સંપૂર્ણ ક્ષમતાથી તાલીમ લઈ રહ્યા છે. બીજી તરફ, વોશિંગ્ટન સુંદર પણ પોતાની ફિટનેસ સાબિત કરવા માટે તૈયારી કરી રહ્યો છે. પસંદગી સમિતિ આ અઠવાડિયે ટીમની જાહેરાત કરી શકે છે.
જસપ્રીત બુમરાહની વાપસી અંગે પણ મહત્વનું અપડેટ છે. તેની રિકવરી સારી રીતે ચાલી રહી છે અને મેનેજમેન્ટ તેની સ્થિતિ પર નજીકથી નજર રાખી રહ્યું છે. જોકે, અફઘાનિસ્તાન સામેની શ્રેણી તેની વાપસી માટે વહેલી પડી શકે છે.
બુમરાહને 2027 વનડે વર્લ્ડ કપને ધ્યાનમાં રાખીને વનડે અને ટેસ્ટ ક્રિકેટ પર ધ્યાન કેન્દ્રિત કરાવવાની યોજના હતી. હવે ઈજાને કારણે તેના વર્કલોડ અંગે સાવચેતી રાખવામાં આવી રહી છે અને એશિયન ગેમ્સમાં તેની વાપસીની શક્યતા વધુ મજબૂત માનવામાં આવી રહી છે. (PC:PTI/X)
