Breaking News: રાતોરાત IPL 2026 છોડી પોતાના દેશ ચાલ્યા ગયા એક જ ટીમના ત્રણ ખેલાડીઓ, જાણો કેમ
IPL 2026 માં ત્રણ ખેલાડીઓને અચાનક તેમના દેશમાં પાછા ફરવું પડ્યું. જોકે, આ ત્રણેય ખેલાડીઓના વિદાયનું કારણ ઈજા કે કોઈ ઈન્ટરનેશનલ મેચ નથી. મેચ પૂરી થયા બાદ રાતોરાત એક જ ટીમના આ ત્રણ ખેલાડીઓએ ભારત છોડવું પડ્યું હતું. આ ત્રણમાં એક ખેલાડી હાલ સૌથી વધુ વિકેટ લેનાર બોલર છે.
IPL 2026 માં અડધાથી વધુ મેચો પૂર્ણ થઈ ગઈ છે. જોકે, ઘણા ખેલાડીઓ ઈજાને કારણે ટુર્નામેન્ટમાંથી બહાર થઈ ગયા છે. આ બધા વચ્ચે એક જ ટીમના ત્રણ ખેલાડીઓને અચાનક પોતાના દેશ પાછા ફરવું પડ્યું છે, જેમાં આ સિઝનમાં અત્યાર સુધી સૌથી વધુ વિકેટ લેનાર બોલરનો પણ સમાવેશ થાય છે.
મીડિયા રિપોર્ટ્સ અનુસાર જમણા હાથના ફાસ્ટ બોલર ઈશાન મલિંગાને શ્રીલંકન બોર્ડના કહેવાથી પોતાના દેશ પાછા ફરવાની ફરજ પડી છે. માત્ર મલિંગા જ નહીં, પરંતુ સનરાઈઝર્સના અન્ય બે શ્રીલંકન ખેલાડીઓ દિલશાન માદુશંકા અને કમિન્ડુ મેન્ડિસ પણ શ્રીલંકા પાછા ફર્યા છે.
રિપોર્ટમાં જણાવાયું છે કે ત્રણેય ખેલાડીઓએ વિઝાની ઔપચારિકતાઓ પૂર્ણ કરવા માટે પોતાના દેશ પરત ફરવું પડ્યું છે. શ્રીલંકાની ટીમ IPL પછી વેસ્ટ ઈન્ડિઝના પ્રવાસે જવાની છે. આ માટે ખેલાડીઓએ બાયોમેટ્રિક વિઝા પ્રક્રિયા પૂર્ણ કરવી જરૂરી છે. આ કારણે તેમને IPL વચ્ચે પાછા શ્રીલંકા જવું પડ્યું.
જોકે, આનાથી તેમના IPLમાં રમવા પર કોઈ અસર પડશે નહીં, કારણ કે ત્રણેય શુક્રવારે સનરાઈઝર્સ હૈદરાબાદ ટીમમાં ફરી જોડાશે. ટીમની આગામી મેચ રવિવાર, 3 મેના રોજ કોલકાતા નાઈટ રાઈડર્સ સામે છે.
સનરાઈઝર્સ હૈદરાબાદ માટે મલિંગાની હાજરી મહત્વપૂર્ણ છે. મલિંગાએ આ સિઝનમાં સતત સારી બોલિંગ કરી છે અને ટીમની સફળતામાં મહત્વપૂર્ણ યોગદાન આપ્યું છે. શ્રીલંકા પરત ફરતા પહેલા મલિંગાએ સનરાઈઝર્સ હૈદરાબાદની જીતમાં ફાળો આપ્યો હતો.
બુધવારે રાત્રે હૈદરાબાદે મુંબઈ ઈન્ડિયન્સને તેમના હોમ ગ્રાઉન્ડ વાનખેડે સ્ટેડિયમ પર રેકોર્ડ 244 રનનો પીછો કરી હરાવ્યું હતું. મલિંગાએ 4 ઓવરમાં 29 રન આપીને 1 વિકેટ લીધી હતી. આ સિઝનમાં 15 વિકેટ સાથે તે હાલમાં પર્પલ કેપ રેસમાં સૌથી આગળ છે. (PC:PTI/X/SRH)
