IND vs ENG: વિરાટ-રોહિત ફ્લોપ, ગિલ-અય્યર રમ્યા નથી, લોર્ડ્સમાં ભારતીય બેટિંગ ભગવાન ભરોસે!
ભારતીય ટીમે ઈંગ્લેન્ડ સામેની ODI શ્રેણીની શરૂઆત જીત સાથે કરી હતી પરંતુ કાર્ડિફમાં બીજી મેચમાં હાર સાથે તેણે લીડ ગુમાવી દીધી હતી. હવે, ટીમ પાસે જીતવાની એક છેલ્લી તક છે, પરંતુ તે સરળ રહેશે નહીં, કારણ કે લોર્ડ્સમાં ભારતીય બેટિંગ ઘણીવાર નિષ્ફળ રહી છે અને ભારતીય બેટ્સમેનોનું પ્રદર્શન ફ્લોપ રહ્યું છે.
ટીમ ઈન્ડિયા પાસે ઈંગ્લેન્ડના પ્રવાસ પર સફળતા મેળવવાની છેલ્લી તક છે. T20 શ્રેણી ગુમાવ્યા બાદ ભારતીય ટીમ પાસે ODI શ્રેણી જીતવાની તક છે. ત્રીજી મેચ 19 જુલાઈએ લોર્ડ્સ ખાતે રમાશે. જોકે, લોર્ડ્સમાં ભારતની બેટિંગ ચિંતાનો વિષય છે, કારણ કે ટીમના સ્ટાર બેટ્સમેનોનો રેકોર્ડ લોર્ડ્સમાં ખરાબ છે.
કોહલી, રોહિત અને બુમરાહ જેવા સ્ટાર્સ પહેલા પણ લોર્ડ્સમાં રમી ચૂક્યા છે, પરંતુ શુભમન, શ્રેયસ અને ઈશાન જેવા ખેલાડીઓ પહેલીવાર લોર્ડ્સમાં રમશે. કેટલાક ખેલાડીઓ અહીં ટેસ્ટ મેચ રમી ચૂક્યા છે, પરંતુ ઘણા એવા છે જેઓ લોર્ડ્સમાં પહેલીવાર રમશે.
લોર્ડ્સમાં ભારતીય બેટ્સમેનોનો રેકોર્ડ ખરાબ રહ્યો છે. કોહલીએ લોર્ડ્સમાં ત્રણ વનડેમાં ફક્ત 77 રન જ બનાવ્યા છે. તેણે એક ફિફ્ટી પણ ફટકારી નથી. રોહિત લોર્ડ્સમાં બે વનડે રમ્યો છે જેમાં ફક્ત 15 રન બનાવ્યા છે. કેએલ રાહુલ અહીં ફક્ત એક જ મેચ રમ્યો છે અને 0 પર આઉટ થયો હતો.
કેપ્ટન ગિલ, વાઈસ-કેપ્ટન અય્યર, ઇશાન કિશન, શિવમ દુબે અને અક્ષર પટેલ પણ આ મેદાન પર પહેલી વનડે રમશે. ગિલે લોર્ડ્સમાં ટેસ્ટ મેચ રમી હતી, પરંતુ તેનું પ્રદર્શન ખરાબ રહ્યું હતું. 2025 માં રમાયેલી તે ટેસ્ટ મેચમાં ગિલ બંને ઈનિંગ મળીને ફક્ત 22 રન જ બનાવી શક્યો હતો.
આ શ્રેણીમાં પણ ટીમ ઈન્ડિયાની બેટિંગ એવરેજ રહી છે. કોહલી પહેલી મેચમાં નિષ્ફળ ગયો હતો પરંતુ બીજી મેચમાં તેણે 65 રન બનાવ્યા હતા. કેપ્ટન ગિલે પહેલી મેચમાં 80 અને બીજી મેચમાં 31 રન બનાવ્યા હતા. અય્યરે 35 અને 66 રન બનાવ્યા છે.
સૌથી મોટી ચિંતા રોહિત શર્માની છે, જે બંને મેચમાં ફોર્મમાં દેખાયો નહીં. બે ઈનિંગમાં મળીને તે ફક્ત 37 રન જ બનાવી શક્યો છે. તેથી, નિર્ણાયક મેચમાં ટીમ ઈન્ડિયાની બેટિંગ અંગે ચિંતા થવી સ્વાભાવિક છે. (PC:PTI/X)
Published On - 5:25 pm, Sat, 18 July 26
