Breaking News: પાકિસ્તાન સુપર લીગ છોડી IPLમાં સામેલ થતા જ આ ખેલાડીને થયો ₹1.75 કરોડનો ફાયદો
PSL છોડીને IPLમાં જોડાનાર ખેલાડીઓની યાદીમાં વધુ એક ખેલાડીનો ઉમેરો થયો છે. આ ખેલાડીને રાજસ્થાન રોયલ્સ દ્વારા સાઈન કરવામાં આવ્યો છે. પાકિસ્તાન સુપર લીગ છોડી IPLમાં સામેલ થતા જે તેને ₹1.75 કરોડનો ફાયદો થયો છે.
પહેલેથી જ અનેક મુશ્કેલીઓનો સામનો કરી રહેલી પાકિસ્તાન સુપર લીગને વધુ એક ઝટકો લાગ્યો છે. કેટલાક વિદેશી ખેલાડીઓ પહેલાથી જ લીગમાંથી ખસી ગયા છે, જ્યારે અન્ય IPLમાં જોડાઈ રહ્યા છે. આ યાદીમાં વધુ એક નામ ઉમેરાયું છે.
શ્રીલંકાનો T20 કેપ્ટન દાસુન શનાકા PSL છોડીને IPLમાં જોડાયો છે. રાજસ્થાન રોયલ્સે ઈંગ્લેન્ડના ઓલરાઉન્ડર સેમ કરન, જે ઈજાને કારણે ટુર્નામેન્ટમાંથી બહાર થઈ ગયો હતો, તેના સ્થાને શનાકાને સાઈન કર્યો છે.
શનાકાને IPLની હરાજીમાં કોઈ ટીમે ખરીદ્યો ના હતો, જે બાદ તે PSL તરફ વળ્યો. તેને લાહોર કલંદર્સે 75 લાખ પાકિસ્તાની રૂપિયામાં ખરીદ્યો હતો. જોકે, હવે તેણે આ ઓફર ઠુકરાવી દીધી છે અને IPLમાં જોડાઈ ગયો છે.
આ નિર્ણયથી શ્રીલંકાના ઓલરાઉન્ડરને ઘણો ફાયદો થયો છે, તેને IPL ટીમમાં ₹2 કરોડની કિંમતે સાઈન કર્યો છે. જો તે PSL માં રમ્યો હોત, તો તેને માત્ર ₹25 લાખ મળ્યા હોત, પરંતુ હવે તેને ₹1.75 કરોડનો ફાયદો થશે.
શનાકા IPLમાં ત્રીજી વખત રમી રહ્યો છે, અને યોગાનુયોગ તે ત્રણેય વખત ઈજાગ્રસ્ત ખેલાડીના રીપ્લેસમેન્ટ તરીકે સામેલ થયો છે. તે અગાઉ બંને વખત ગુજરાત ટાઈટન્સમાં રમી ચૂક્યો છે. જોકે, તેણે ફક્ત ત્રણ મેચ રમી છે, જેમાં તેણે ફક્ત 26 રન બનાવ્યા છે. (PC: PTI)
Published On - 7:20 pm, Mon, 23 March 26
