IPL 2025 : મુંબઈ ઈન્ડિયન્સ મોટો ઝટકો, આ સ્ટાર ખેલાડી વધુ 4 મેચ માટે ટુર્નામેન્ટમાંથી થયો બહાર
મુંબઈ ઈન્ડિયન્સનો સ્ટાર ખેલાડી અત્યાર સુધી IPL 2025માં એક પણ મેચ રમી શક્યો નથી અને હવે સમાચાર આવ્યા છે કે આ ખેલાડી આગામી બે અઠવાડિયા સુધી રમી શકશે નહીં, જેમાં મુંબઈને વધુ ચાર મેચ રમવાની છે. આ મુંબઈ ઈન્ડિયન્સ મોટો ઝટકો છે, કારણકે મુંબઈ તેની પહેલી બે મેચ હારી ગઈ છે અને હવે તેમને જીતની તલાશ છે. એવામાં આ મેચવિનર ખેલાડી વિના રમવું તેમના માટે વધુ મુશ્કેલીભર્યું રહેશે.
મુંબઈ ઈન્ડિયન્સની ટીમ IPL 2025માં તેની પહેલી બે મેચ હારી ગઈ છે અને હવે તેને વધુ એક ખરાબ સમાચાર મળ્યા છે. જો અહેવાલો પર વિશ્વાસ કરવામાં આવે તો, આ ટીમે તેના સ્ટાર ઝડપી બોલર જસપ્રીત બુમરાહ વિના રમવાનું ચાલુ રાખવું પડશે. એવા અહેવાલો છે કે જસપ્રીત બુમરાહ આગામી બે અઠવાડિયા સુધી IPL મેચ રમી શકશે નહીં.
બેંગલુરુમાં BCCI સેન્ટર ઓફ એક્સેલન્સ ખાતે બોલિંગ કરતા બુમરાહની એક ક્લિપ વાયરલ થઈ હોવા છતા તેને હજુ સુધી ફિટનેસ ક્લિયરન્સ મળ્યું નથી. બુમરાહ પર BCCI મેડિકલ ટીમ અને નેશનલ ક્રિકેટ એકેડેમી (NCA) સ્પોર્ટ્સ સાયન્સ ટીમ નજર રાખી રહી છે. કમરના નીચેના ભાગમાં થયેલી ઈજાને કારણે તે ગયા વર્ષના ઓસ્ટ્રેલિયા પ્રવાસથી ક્રિકેટથી દૂર છે. તેણે ચેમ્પિયન્સ ટ્રોફીમાં પણ ભાગ લીધો ન હતો અને હજુ સુધી IPL 2025માં રમ્યો નથી.
રિપોર્ટ અનુસાર, BCCIના એક અધિકારીએ કહ્યું, 'બુમરાહની તબિયત સારી થઈ રહી છે. બુમરાહના કિસ્સામાં, તમે ક્યારેય તેના વાપસી માટે સમયરેખા નક્કી કરી શકતા નથી. તે ધીમે ધીમે પોતાના કામનો ભાર વધારી રહ્યો છે. આ દરે, તે લગભગ બે અઠવાડિયામાં પાછા ફરવા માટે તૈયાર થઈ શકે છે. જો બુમરાહ આગામી બે અઠવાડિયા સુધી નહીં રમે, તો મુંબઈની ટીમ આ સમયગાળા દરમિયાન વધુ ચાર મેચ રમશે. આનો અર્થ એ થયો કે બુમરાહ IPLની શરૂઆતની 6-7 મેચોમાં રમી શકશે નહીં.
જોકે BCCI કે NCAમાં કોઈ એવો દાવો કરી રહ્યું નથી કે બુમરાહ જૂનમાં ઈંગ્લેન્ડ ટેસ્ટ શ્રેણી માટે ફિટ થઈ જશે, પરંતુ તેની રિકવરી 'સાચા માર્ગ પર' હોવાનું કહેવાય છે. બુમરાહના કિસ્સામાં કોઈ ઉતાવળ નથી. ડોક્ટરો, ફિઝિયો અને ખેલાડીઓ બુમરાહ 100% ફિટ હશે ત્યારે જ ક્લિયરન્સ આપશે.
BCCIના અધિકારીએ કહ્યું, 'બુમરાહ પ્રત્યે હંમેશા સાવધાની રાખવી જોઈએ. કામનો ભાર ધીમે ધીમે વધારવો પડે છે, જેમાં સમય લાગે છે. બે અઠવાડિયામાં પરત ફરવાની વાત ફક્ત વર્તમાન મૂલ્યાંકન પર આધારિત છે. આવતા અઠવાડિયે પરિસ્થિતિ બદલાઈ શકે છે. અમને લાગે છે કે તે એપ્રિલના બીજા કે ત્રીજા અઠવાડિયા સુધીમાં ફિટ થઈ જશે.
ન્યુઝીલેન્ડનો ભૂતપૂર્વ ફાસ્ટ બોલર શેન બોન્ડ જે પોતે પણ પીઠની ઈજાથી પીડાઈ રહ્યો છે, તેણે પણ BCCIને ચેતવણી આપી છે કે તેઓ ઈંગ્લેન્ડમાં બુમરાહ પર વધુ પડતો બોજ ન નાખે. બોન્ડે કહ્યું, 'ભારતે ઈંગ્લેન્ડમાં 5 ટેસ્ટ મેચ માટે બોલરોની સારી ટીમ તૈયાર રાખવી જોઈએ. જો બુમરાહ ફરીથી ઘાયલ થાય છે તો T20 વર્લ્ડ કપ, ODI વર્લ્ડ કપ બધું જ જોખમમાં મુકાઈ જશે.
ભારતીય ટીમે તેના વિના ચેમ્પિયન્સ ટ્રોફી જીતી હતી, પરંતુ મુંબઈ ઈન્ડિયન્સ તેના વિના સંઘર્ષ કરી રહી છે. 39 વર્ષ પછી ઈંગ્લેન્ડમાં ભારતને જીત અપાવવા માટે બુમરાહનું 100% ફિટ હોવું જરૂરી છે. 2024થી બુમરાહે 386.4 ઓવર ફેંકી છે અને 86 વિકેટ લીધી છે, જે કોઈપણ ઝડપી બોલર માટે સૌથી વધુ છે. હવે પ્રશ્ન એ છે કે શું તે ઈંગ્લેન્ડ માટે સંપૂર્ણપણે તૈયાર હશે? (All Photo Credit : PTI)
