Abhishek Sharma : અભિષેક શર્માએ હાર્દિક પંડ્યાને ધોઈ નાખ્યો, ફટકાર્યા છગ્ગા-ચોગ્ગા
સૈયદ મુશ્તાક અલી ટ્રોફીમાં પંજાબ તરફથી રમતા અભિષેક શર્માએ ફરી એકવાર પોતાની વિસ્ફોટક બેટિંગનું પ્રદર્શન કર્યું. ડાબા હાથના બેટ્સમેને માત્ર 18 બોલમાં અડધી સદી ફટકારી હતી. વર્લ્ડ નંબર 1 T20 બેટ્સમેન અભિષેક શર્માએ ભારતના બેસ્ટ ઓલરાઉન્ડર હાર્દિક પંડ્યાને બરાબર ફટકાર્યો હતો.
આફ્રિકા સામે T20 શ્રેણી પહેલા અભિષેક શર્મા જબરદસ્ત ફોર્મમાં છે. બંગાળ બાદ તેણે બરોડાની બોલિંગ યુનિટને પણ ખતમ કરી દીધી. અભિષેકે ભારતના બેસ્ટ ઓલરાઉન્ડર હાર્દિક પંડ્યાની બોલિંગમાં પણ જોરદાર ફટકાબાજી કરી હતી.
વિશ્વના નંબર 1 T20 બેટ્સમેન અભિષેક શર્માએ આ મેચમાં માત્ર 18 બોલમાં અડધી સદી ફટકારી હતી. જોકે, તે પોતાની અડધી સદી પૂર્ણ કર્યા પછી તરત જ આઉટ થઈ ગયો હતો.
અભિષેક શર્મા ક્રીઝ પર આવતાની સાથે જ મોટા શોટ રમ્યો. તેણે હાર્દિક પંડ્યાના ચાર બોલ રમ્યા અને તેમાંથી 12 રન બનાવ્યા. તેણે પંડ્યાની ઓવરમાં એક છગ્ગો અને એક ચોગ્ગો ફટકાર્યો.
પછી હાર્દિક પંડ્યાએ રસિક સલામને આઉટ કર્યો. હાર્દિક પંડ્યાએ આ મેચમાં ચાર ઓવરમાં 52 રન આપીને એક વિકેટ લીધી.
અભિષેક શર્માએ તેની ઇનિંગમાં ચાર છગ્ગા અને પાંચ ચોગ્ગા ફટકાર્યા એટલે કે તેણે તેના 50 રનમાંથી 44 રન બાઉન્ડ્રીથી બનાવ્યા. તેની વિસ્ફોટક બેટિંગથી પંજાબે 20 ઓવરમાં 222 રન બનાવ્યા હતા.
આ પહેલા અભિષેકે બંગાળ સામે 52 બોલમાં 148 રન બનાવ્યા હતા. તેણે 16 છગ્ગા અને 8 ચોગ્ગા ફટકાર્યા. શર્માએ માત્ર 12 બોલમાં ફિફ્ટી અને 32 બોલમાં સદી પૂરી કરી હતી. તેણે શમી અને આકાશ દીપને ફટકાર્યા હતા.અભિષેક સારા ફોર્મમાં છે અને આફ્રિકા સામે તેની બેટિંગ પર નજર રહેશે.
ભારત અને દક્ષિણ આફ્રિકા વચ્ચેની T20 શ્રેણીમાં પાંચ મેચ રમાશે. પહેલી મેચ 9 ડિસેમ્બરે કટકમાં રમાશે. બીજી મેચ 11 ડિસેમ્બરે નવા ચંદીગઢમાં રમાશે. ત્રીજી મેચ 14 ડિસેમ્બરે ધર્મશાળામાં રમાશે. ચોથી T20 17 ડિસેમ્બરે લખનૌમાં અને પાંચમી T20 19 ડિસેમ્બરે અમદાવાદમાં રમાશે. (PC: PTI)
