“પુષ્પા કભી ઝુકેગા નહી, પણ પહેલી વાર..”; અલ્લુ અર્જુને ભારે ભીડને જોઈ કર્યા પ્રણામ
બિહારના પટના સ્થિત ગાંધી મેદાન ખાતે દક્ષિણના ફિલ્મ સ્ટારની બહુપ્રતિક્ષિત ફિલ્મ 'પુષ્પા 2: ધ રૂલ'નો ટ્રેલર લોન્ચ કાર્યક્રમ યોજાયો હતો. આ કાર્યક્રમમાં ખાસ ઉપસ્થિત રહેલા અલ્લુ અર્જુન અને રશ્મિકા મંદાનાને જોવા ચાહકોએ રેકોર્ડ બ્રેક ભીડ સર્જી દીધી હતી.
અલ્લુ અર્જુનની બહુપ્રતિક્ષિત અને બહુચર્ચિત ફિલ્મ 'પુષ્પા 2: ધ રૂલ'નું ટ્રેલર તાજેતરમાં રિલીઝ કરવામાં આવ્યું હતું. બિહારના પટનામાં ગાંધી મેદાન ખાતે ટ્રેલર લોન્ચ માટે એક ભવ્ય કાર્યક્રમનું આયોજન કરવામાં આવ્યું હતું. આ સમયે, ચાહકો વિશાળ સંખ્યામાં એકઠા થયા હતા.
સ્ટેજ પર હાજર અલ્લુ અર્જુને બિહારના ફેન્સનો પોતાના ખાસ અંદાજમાં આભાર માન્યો હતો. જો કે 'ઝુકેગા નહીં..' પુષ્પાનો ફેમસ ડાયલોગ છે, પરંતુ આ વખતે અલ્લુ અર્જુન બિહારના ચાહકો સામે ઝૂકી ગયા.
ચાહકો સાથે વાત કરતા અલ્લુ અર્જુને કહ્યું, "નમસ્તે. બિહારની પવિત્ર ભૂમિને મારી સલામ. બિહારમાં આ મારી પહેલી વાર છે. તમે મને જે પ્રેમ અને સ્વાગત કર્યું છે તેના માટે તમારો ખૂબ ખૂબ આભાર. પુષ્પા કભી ઝુકેગા નહીં, પણ આજ પહેલી વાર તમારા પ્યાર સામે ઝુકેગા
આ અવસર પર અલ્લુ અર્જુન સાથે ફિલ્મની લીડ એક્ટ્રેસ રશ્મિકા મંદાના પણ હાજર હતી. તેણીએ તેના ચાહકો સાથે ભોજપુરી ભાષામાં "નમસ્તે પટના.. કા હલ બા.. સબ ઓકે-થક બા નૂ" કહીને વાર્તાલાપ કર્યો.
અલ્લુ અર્જુને પોતાની ફિલ્મના ફેમસ ડાયલોગ પણ ચાહકોની સામે સંભળાવ્યા. "પુષ્પા કો ફૂલ સમજે ક્યા ? ફૂલ નહીં, અબ જંગલી આગ હૈ મેં ", તેણે ડાયલોગ બોલતા જ ચાહકોએ તાળીઓ પાડીને વધાવી લીધો હતો. તેણે માફી પણ માંગી, "હું મારી હિન્દી થોડી મિસ કરી રહ્યો છું, મને માફ કરજો".
'પુષ્પા 2'ના ટ્રેલર લોન્ચ ઈવેન્ટમાં ચાહકોએ રેકોર્ડ બ્રેક ભીડ બનાવી હતી. અંતે પોલીસે ભીડને વિખેરવા હળવો લાઠીચાર્જ પણ કરવો પડ્યો હતો.