ભાડુઆતની દીકરી પર આવી ગયું દિલ, ‘સ્વિંગના સુલ્તાન’ ભુવનેશ્વરની ફિલ્મી લવ સ્ટોરી
ભુવનેશ્વર કુમાર અને નૂપૂર નાગરની લવ સ્ટોરી બાળપણથી શરૂ થઈ હતી, જ્યારે નૂપૂરનો પરિવાર, તેમના ઘરે ભાડેથી રહેતો હતો. મિત્રતા ધીમે ધીમે પ્રેમમાં બદલાઈ અને વર્ષો સુધી સંબંધ જાળવી રાખ્યા બાદ 2017માં બંનેએ પ્રેમ લગ્ન કર્યા. આજે બંને ખુશહાલ જીવન જીવી રહ્યા છે.
ભારતીય ક્રિકેટ ટીમના સ્ટાર પેસર ભુવનેશ્વર કુમાર તેમની સ્વિંગ બોલિંગ માટે જાણીતા છે. હાલમાં તેઓ IPLમાં રોયલ ચેલેન્જર્સ બેંગલુરુ તરફથી રમી રહ્યા છે. મેદાન પર શાંત સ્વભાવ અને સચોટ બોલિંગ માટે ઓળખાતા ભુવીની પર્સનલ લાઈફ પણ એટલી જ ચર્ચામાં રહી છે. ખાસ કરીને તેમની અને નૂપૂર નાગરની લવ સ્ટોરી ખૂબ જ રસપ્રદ છે.
ભાડુઆતની દીકરીથી શરૂ થઈ પ્રેમ કહાની : ભુવનેશ્વર કુમારનો જન્મ ઉત્તર પ્રદેશના મેરઠમાં થયો હતો. તેમની પત્ની નૂપૂર નાગર સાથે તેમની પહેલી મુલાકાત તેમના જ ઘરમાં થઈ હતી. નૂપૂરના પિતા સરકારી નોકરીમાં હોવાથી વારંવાર બદલી થતી રહેતી. આ કારણે તેઓ મેરઠ આવ્યા અને ભુવીના ઘરમાં કિરાયે રહેવા લાગ્યા. તે સમયે ભુવનેશ્વર માત્ર 13 વર્ષના હતા જ્યારે નૂપૂર 11 વર્ષની હતી. બંનેની ઓળખ અહીંથી શરૂ થઈ અને ધીમે ધીમે મિત્રતા મજબૂત બનતી ગઈ.
બાળપણની મિત્રતા બની પ્રેમ : નૂપૂરે એક ઇન્ટરવ્યૂમાં જણાવ્યું હતું કે ભુવનેશ્વરને તેઓ હંમેશા બોલિંગની પ્રેક્ટિસ કરતા જ જોયા. આ જ સમયે બંને વચ્ચે મિત્રતા વધતી ગઈ. થોડા વર્ષો પછી નૂપૂરના પિતાએ ભુવીના ઘરથી થોડા જ અંતરે પોતાનું ઘર બનાવી લીધું. ઘર બદલાયા પછી પણ બંને વચ્ચેનો સંપર્ક યથાવત રહ્યો. બાળપણની મિત્રતા ક્યારે પ્રેમમાં બદલાઈ ગઈ, તે બંનેને પણ ખબર પડી નહીં.
પરિવારને ખબર વગર આગળ વધ્યો સંબંધ : ભુવનેશ્વર કુમારે એક વખત જણાવ્યું હતું કે શરૂઆતના 3-4 વર્ષ સુધી તેમના માતા-પિતાને આ સંબંધ વિશે કોઈ જાણ નહોતી. બંને એકબીજાને મળતા રહ્યા અને સમય જતાં તેમના સંબંધમાં વધુ મજબૂતી આવતી ગઈ.
2017માં લગ્નથી સંબંધને મળ્યું પૂર્ણ સ્વરૂપ : કેટલાક વર્ષો સુધી સંબંધમાં રહ્યા બાદ ભુવનેશ્વર અને નૂપૂરે 23 નવેમ્બર 2017ના રોજ લગ્ન કર્યા. હાલ બંને ખુશહાલ દાંપત્ય જીવન જીવી રહ્યા છે અને તેમની એક દીકરી પણ છે.
ક્રિકેટર અને ઇજનેરનો અનોખો મેળ : ભુવનેશ્વર જ્યાં પ્રોફેશનલ ક્રિકેટર છે, ત્યાં નૂપૂર નાગર એક ઇજનેર છે. તેમણે નોઈડાથી B.Tech પૂર્ણ કર્યું છે. ભુવનેશ્વર અને નૂપૂરની લવ સ્ટોરી બતાવે છે કે સાચો પ્રેમ ક્યાંય પણ શરૂ થઈ શકે ભલે તે એક ભાડુઆત અને ઘરમાલિકના પરિવારમાંથી જ કેમ ન હોય.
