દિલ્હીમાં ફરી એકવાર હીટવેવનો (Heat Wave) કહેર શરૂ થયો છે, જેના કારણે દિલ્હીવાસીઓ આકરી ગરમીનો સામનો કરી રહ્યા છે. શુક્રવારે ઘણી જગ્યાએ તાપમાનનો પારો 45 ડિગ્રી સેલ્સિયસને પાર કરી ગયો હતો. ભારતીય હવામાન વિભાગે (IMD) હવે આગામી દિવસોમાં અહીં હવામાનની સ્થિતિ વધુ ખરાબ થવાની સંભાવના વ્યક્ત કરી છે. આજે માટે રાજધાનીમાં વિવિધ સ્થળોએ હીટવેવની ચેતવણી સાથે ‘યલો એલર્ટ’ (Yellow Alert) જાહેર કરવામાં આવ્યું છે. માત્ર દિલ્હીમાં જ નહીં પણ રાજસ્થાન, દક્ષિણ-પશ્ચિમ ઉત્તર પ્રદેશ, મધ્ય પ્રદેશ, વિદર્ભના ભાગો અને દક્ષિણ હરિયાણાના અલગ-અલગ ભાગોમાં પણ હીટવેવની સંભાવના છે.
દિલ્હીના બેઝ સ્ટેશન સફદરજંગ ઓબ્ઝર્વેટરીમાં શુક્રવારે મહત્તમ તાપમાન 42.9 ડિગ્રી સેલ્સિયસ નોંધાયું હતું, જે ગુરુવારે 42 ડિગ્રી સેલ્સિયસ હતું. શુક્રવારે, મુંગેશપુરમાં મહત્તમ તાપમાન 45.5 ડિગ્રી સેલ્સિયસ અને પિતામપુરામાં 45.6 ડિગ્રી સેલ્સિયસ મહત્તમ તાપમાન નોંધાયું હતું, જે સામાન્ય કરતાં પાંચ ડિગ્રી વધુ હતું. નજફગઢ ખાતેના સ્પોર્ટ્સ કોમ્પ્લેક્સ અને ઓટોમેટિક વેધર સ્ટેશનમાં મહત્તમ તાપમાન 45.7 ડિગ્રી સેલ્સિયસ અને 45.6 ડિગ્રી સેલ્સિયસ નોંધાયું હતું.
રાજસ્થાનમાં ગરમીનું મોજું ચાલુ છે અને પશ્ચિમી વિસ્તારોમાં શુક્રવારે દિવસનું તાપમાન 45 ડિગ્રી સેલ્સિયસથી ઉપર નોંધાયું હતું. હવામાન વિભાગના પ્રવક્તાના જણાવ્યા અનુસાર શુક્રવારે 46.3 ડિગ્રી સેલ્સિયસ મહત્તમ તાપમાન સાથે શ્રીગંગાનગર રાજ્યનું સૌથી ગરમ સ્થળ હતું. તેમણે જણાવ્યું કે ચુરુમાં 46 ડિગ્રી, ધૌલપુરમાં 45.9 ડિગ્રી, નાગૌરમાં 45.4 ડિગ્રી, બિકાનેર-અંટામાં 45.3 ડિગ્રી, વનસ્થલીમાં 45.2 ડિગ્રી, પિલાની-કોટામાં 44.9 ડિગ્રી, બાડમેર-ફલોદીમાં 44.8 ડિગ્રી, હનુમાનગઢના સંગરિયામાં 44 ડિગ્રી સેલ્સિયસ મહત્તમ તાપમાન નોંધાયું છે. પ્રવક્તાએ જણાવ્યું હતું કે રાજ્યના અન્ય ભાગોમાં મહત્તમ તાપમાન 41.2થી 44 ડિગ્રી સેલ્સિયસની રેન્જમાં નોંધાયું હતું.
સ્કાયમેટ વેધર અનુસાર આગામી 24 કલાક દરમિયાન આસામ, મેઘાલય, અરુણાચલ પ્રદેશ, નાગાલેન્ડ, પેટા-હિમાલયન પશ્ચિમ બંગાળ, સિક્કિમ, આંદામાન અને નિકોબાર ટાપુઓ અને દક્ષિણ કર્ણાટકમાં છૂટાછવાયા સ્થળોએ હળવાથી મધ્યમ વરસાદ સાથે હળવો વરસાદ પડી શકે છે. ઉત્તરપૂર્વ ભારત, કેરળ, લક્ષદ્વીપ, ઉત્તરપૂર્વ બિહાર અને જમ્મુ અને કાશ્મીરના ભાગોમાં હળવાથી મધ્યમ વરસાદની શક્યતા છે. ઉપરાંત, ઓડિશા, આંધ્ર પ્રદેશ, ઉત્તર આંતરિક કર્ણાટક, તમિલનાડુ અને કોંકણ અને ગોવામાં હળવો વરસાદ થઈ શકે છે.