Heavy Rain In kerala: કેરળમાં (Kerala) મૂશળધાર વરસાદ (Rain)ના કારણે ભારત હવામાન વિભાગ (IMD) દ્વારા ગુરૂવારે 12 જિલ્લામાં આખા દિવસ માટે ઓરેન્જ એલર્ટ આપવામાં આવ્યું છે તો બીજી તરફ દિલ્લીના આકાશમાંથી અગનગોળા વરસી રહ્યા હોય તેમ લોકો ગરમીથી ત્રાહિમામ પોકારી ઉઠ્યા છે. હવામાન વિભાગ દ્વારા તિરૂવનંતપુર અને કોલ્લમને બાદ કરતા કેરળના બધા જિલ્લામાં ઓરેન્જ એલર્ટ આપવામાં આવ્યું છે. કેરળ રાજ્ય ડિઝાસ્ટર મેનેજમેન્ટ વિભાગ દ્વારા કહેવામાં આવ્યું છે કે ઉત્તરી તામિલનાડુ અને આસપાસના ક્ષેત્રોમાં ચક્રવાતી દબાણને કારણે દક્ષિણી રાજ્યોના ઘણા ભાગમાં વરસાદ થશે.
કેન્દ્રીય હવામાન વિભાગે બુધવારે રાજ્યમાં આગામી બે દિવસ સુધી વરસાદ થવાની શકયતા વ્યક્ત કરી છે. ઉલ્લેખનીય છે કે કેરળમાં પાછલા કેટલાક દિવસોથી મૂશળધાર વરસાદ થઈ રહ્યો છે અને તેના કારણે સામાન્ય જનજીવન અસ્તવ્યસ્ત થઈ ગયું છે. મૂશળધાર વરસાદની શક્યતાને જોતા રાજ્યમાં સમય કરતા વહેલા પ્રવેશેલા ચોમાસાને ધ્યાનમાં રાખતા કેરળના મુખ્યમંત્રી પિનરાઈ વિજયને એક દિવસ અગાઉજ તૈયારીના સંબંધમાં સૂચનો જાહેર કર્યા હતા. જેથી ભૂસ્ખલન અને પૂર જેવી સમસ્યાઓને પહોંચી વળવા તંત્ર તૈયાર રહે.
એનડીઆરએફ દ્વારા કેરળમાં પાંચ ટીમ તૈયાર કરવામાં આવ્યા છે. સાથે જ તંત્ર દ્વારા લોકોને નદી તથા અન્ય જળાશયોથી દૂર રહેવાની સલાહ આપવામાં આવી છે. તેમજ કટોકટી સિવાય પહાડી ક્ષેત્રોમાં જવાની પણ મનાઈ કરવામાં આવી છે. સાથે જ રાત્રે પણ મુસાફરી કરવાની શક્ય હોય ત્યાં સુધી મનાઈ કરવામાં આવી છે. જિલ્લા પ્રશાસને પણ કાંઠા વિસ્તારથી દૂર રહેવાની સલાહ આપવામાં આવી હતી. IMDએ પૂર્વાનુમાન વ્યક્ત કર્યું હતું કે દક્ષિણ – પશ્ચિમ ચોમાસું 27 મે સુધી રાજ્યમાં દસ્તક આપશે. આ વખતે ચોમાસુ સામાન્ય તારીખ કરતાં પાંચ દિવસ પહેલા આવાવની શક્યતા છે.
ભારતીય હવામાન વિભાગે કેરળના 12 જિલ્લા કાસરગોડ, કન્નૂર, વાયનાડ કોઝીકોડ, મલ્લપુરમ, પલક્કડ, ત્રિશૂર, એર્નાકુલમ, ઈડુક્કી, કોટ્ટાયમ, અલાપ્પુઝા અને પઠાનમથિટ્ટા માટે ઓરોન્જ એલર્ટ જાહેર કરવામાં આવ્યું છે. હવામાન વિભાગે 21 મેથી વરસાદ ઓછો થવાની તથા 48 કલાકમાં દક્ષિણી રાજ્યમાં ભારેથી અતિભારે વરસાદ થવાની આગાહી વ્યક્ત કરી છે.