PM Modi Russia Visit : રશિયા અને ઓસ્ટ્રિયાના પ્રવાસે PM મોદી, પશ્ચિમી દેશોની ચિંતા વધી, ક્રેમલિને શું કહ્યું?

PM Modi Russia Visit : પીએમ મોદી આજે રશિયા અને ઓસ્ટ્રિયાના પ્રવાસ માટે રવાના થઈ રહ્યા છે. પીએમ મોદીની આ મુલાકાતને લઈને રશિયા ખૂબ જ ઉત્સુક છે અને તેને ભારત-રશિયા સંબંધો માટે મહત્વપૂર્ણ માને છે. રશિયન રાષ્ટ્રપતિના ઓફિશિયલ નિવાસસ્થાન ક્રેમલિનના પ્રવક્તા દિમિત્રી પેસ્કોવે આ વાત કહી.

ક્રેમલિનના પ્રવક્તાએ કહ્યું કે, પશ્ચિમી દેશો મોદીની મુલાકાતને ઈર્ષ્યાની નજરે જુએ છે. રશિયાના રાષ્ટ્રપતિ વ્લાદિમીર પુતિનના આમંત્રણ પર પીએમ મોદી 8 અને 9 જુલાઈના રોજ મોસ્કોમાં હશે, ત્યારબાદ તેઓ ઓસ્ટ્રિયા જશે. આ દરમિયાન મોદી રશિયામાં યોજાનારી 22મી ભારત-રશિયા વાર્ષિક સમિટમાં ભાગ લેશે.

પીએમ મોદી પુતિન સાથે કરશે અનૌપચારિક વાતચીત

ભારતના વિદેશ મંત્રાલયે કહ્યું છે કે આ મુલાકાત દરમિયાન બંને દેશો વચ્ચે ઘણા દ્વિપક્ષીય અને વૈશ્વિક મુદ્દાઓ પર ચર્ચા થશે. બીજી તરફ ક્રેમલિનના પ્રવક્તા પેસ્કોવે રાજ્યના ટેલિવિઝન ‘વીજીટીઆરકે’ પર કહ્યું કે, મોસ્કોમાં અન્ય કાર્યક્રમોમાં હાજરી આપવા ઉપરાંત પીએમ મોદી અને વ્લાદિમીર પુતિન અનૌપચારિક વાતચીત પણ કરશે.

ક્રેમલિને કહ્યું છે કે આ મુલાકાત ભલે ઘણી વ્યસ્ત હોય પરંતુ આ મુલાકાતનો એજન્ડા મોટો હશે. પેસ્કોવે કહ્યું, ‘ભારત અને રશિયા વચ્ચેના સંબંધો વ્યૂહાત્મક ભાગીદારીના સ્તરે છે, અમે એક ખૂબ જ મહત્વપૂર્ણ મુલાકાતની રાહ જોઈ રહ્યા છીએ જે ભારત-રશિયા સંબંધો માટે ખૂબ જ મહત્વપૂર્ણ છે.’

ભારત અને રશિયા વચ્ચે કયા કરારો થઈ શકે છે?

પેસ્કોવે ભારપૂર્વક જણાવ્યું હતું કે ‘પશ્ચિમી દેશો વડા પ્રધાન મોદીની રશિયાની મુલાકાતને નજીકથી અને ઈર્ષ્યાપૂર્વક જોઈ રહ્યા છે. પશ્ચિમી દેશોની ગંભીરતા સ્પષ્ટ કરે છે કે તેઓ આ મુલાકાતને ખૂબ મહત્વ આપી રહ્યા છે. વાસ્તવમાં પીએમ મોદી 5 વર્ષ પછી રશિયાની મુલાકાતે જઈ રહ્યા છે. એવી અપેક્ષા છે કે ભારત અને રશિયા વચ્ચે ઘણા સંરક્ષણ કરારો પર હસ્તાક્ષર થઈ શકે છે.

આ વખતે સૌથી વધુ ચર્ચા રશિયાનું 5મી જનરેશન ફાઈટર જેટ સુખોઈ 57 છે. સુખોઈ એરક્રાફ્ટને લઈને ભારત હંમેશાથી ખૂબ જ ગંભીર રહ્યું છે. આ સાથે એવી અપેક્ષા રાખવામાં આવે છે કે ભારતમાં એન્ટી ટેન્ક શેલ બનાવવાની ફેક્ટરી અંગે પણ મહત્વપૂર્ણ સમજૂતી થઈ શકે છે.