કેન્દ્ર સરકારે 58 હજારથી વધુ ભૂતપૂર્વ સૈનિકોને આપી મોટી ભેટ, આજે સાંજ સુધીમાં બેંક ખાતામાં પેન્શન પહોંચી જવાની કરી જાહેરાત

કેન્દ્ર સરકારે (Central Government) માજી સૈનિકોને સારા સમાચાર આપ્યા છે. સરકારે કહ્યું છે કે આજે એટલે કે બુધવાર સાંજ સુધીમાં 58,275 ભૂતપૂર્વ સૈનિકોનું પેન્શન તેમના બેંક ખાતામાં જમા થઈ જશે. રક્ષા મંત્રાલયે (Defence Ministry)  એક પરિપત્ર જાહેર કરીને આ અંગે માહિતી આપી છે. તમને જણાવી દઈએ કે ભારતીય સેનામાંથી નિવૃત્ત થયેલા ઘણા અધિકારીઓ અને જવાનોને બે-ત્રણ મહિનાથી પેન્શન મેળવવામાં સમસ્યાનો સામનો કરવો પડી રહ્યો હતો. ત્યારપછી આ અધિકારીઓએ સોશિયલ મીડિયા દ્વારા સંરક્ષણ મંત્રાલય સુધી પોતાની વાત જણાવી હતી.

સંરક્ષણ મંત્રાલયે કહ્યું કે 58,275 ભૂતપૂર્વ સૈનિકોના લિવિંગ સર્ટિફિકેટની ચકાસણી કરવામાં આવી નથી. ગયા વર્ષે નવેમ્બર સુધીમાં આ યોજાવાની હતી, પરંતુ હવે તેમને 25 મે સુધીનો સમય આપવામાં આવ્યો છે. આવા તમામ પેન્શનરોને એસએમએસ અને ઈમેલ દ્વારા પેન્ડિંગ વાર્ષિક ઓળખ વિશે જાણ કરવામાં આવી રહી છે. સંરક્ષણ મંત્રાલયે વધુમાં કહ્યું છે કે એપ્રિલ 2022નું પેન્શન બુધવારે સાંજ સુધીમાં ખાતામાં આવી જશે.

રાહુલ ગાંધીએ મોદી સરકારની ટીકા કરી

ભૂતપૂર્વ સૈનિકોને એપ્રિલ મહિનાનું પેન્શન ન મળવાથી સંબંધિત હિન્દુસ્તાન ટાઈમ્સમાં પ્રકાશિત અહેવાલને ટાંકીને રાહુલ ગાંધીએ મોદી સરકારને ઘેરી છે. રાહુલ ગાંધીએ ટ્વીટ કરીને લખ્યું, ‘વન રેન્ક, વન પેન્શનની છેતરપિંડી બાદ હવે મોદી સરકાર ‘ઓલ રેન્ક, નો પેન્શન’ની નીતિ અપનાવી રહી છે. સૈનિકોનું અપમાન કરવું એ દેશનું અપમાન છે. સરકારે વહેલી તકે ભૂતપૂર્વ સૈનિકોનું પેન્શન આપવું જોઈએ.

તમને જણાવી દઈએ કે રાહુલ ગાંધીને ટાંકીને હિન્દુસ્તાન ટાઈમ્સના રિપોર્ટમાં કહેવામાં આવ્યું છે કે સેંકડો ભૂતપૂર્વ સૈનિકોને એપ્રિલ મહિનાનું પેન્શન ચૂકવવામાં આવ્યું નથી. આ માટે સંબંધિત વિભાગ દ્વારા કોઈ કારણ આપવામાં આવ્યું નથી. રાહુલ ગાંધીના આ ટ્વીટ બાદ સંરક્ષણ મંત્રાલય પણ સક્રિય થઈ ગયું હતું અને આજે સાંજ સુધીમાં પેન્શનરોનું પેન્શન તેમના બેંક ખાતામાં જમા થઈ જશે તેમ જણાવાયું હતું.