મુંબઈમાં વસતા ઉત્તર ભારતીયો માટે યુપી સરકારની પહેલ, દેશની ઔદ્યોગિક રાજધાનીમાં ટૂંક સમયમાં ખુલશે ઓફિસ

દેશના ઔદ્યોગિક મહાનગર મુંબઈમાં રહેતા ઉત્તર પ્રદેશના રહેવાસીઓ માટે હવે તેમના વતન રાજ્ય સાથે જોડાવા માટે વધુ એક રસ્તો ખુલવા જઈ રહ્યો છે. ઉત્તર પ્રદેશ સરકાર મુંબઈમાં એક નવી ઑફિસ (Office in Mumbai for UP residents) શરૂ કરવા જઈ રહી છે, જેનો હેતુ મહારાષ્ટ્રની રાજધાની મુંબઈમાં રહેતા યુપીના રહેવાસીઓને તેમના રાજ્યમાં રોકાણ કરવા, તેમના હિતોનું રક્ષણ કરવા અને તેમની સામાજિક સુરક્ષા સુનિશ્ચિત કરવામાં મદદ કરવાનો છે.

સત્તાવાર સૂત્રોના જણાવ્યા અનુસાર, યોગી આદિત્યનાથના નેતૃત્વમાં યુપી સરકાર દ્વારા પ્રસ્તાવિત આ ઓફિસ દ્વારા, યુપીના એવા તમામ રહેવાસીઓ સાથે જોડવાનું શક્ય બનશે જેઓ લાંબા સમયથી મુંબઈમાં નોકરી કે વ્યવસાય માટે રહેતા હોય, અથવા તેઓ, જેઓ રોજગારની શોધમાં દર વર્ષે મુંબઈ જાય છે અને સમયાંતરે અથવા કોઈપણ આફતના કિસ્સામાં યુપી પાછા આવે છે.

એક અંદાજ મુજબ, મુંબઈની 1 કરોડ 84 લાખ વસ્તીમાંથી લગભગ 50 થી 60 લાખ ઉત્તર ભારતીય મૂળના લોકો રહે છે, જેમાં યુપીમાંથી સૌથી વધુ લોકો આવે છે. તેઓ લાંબા સમયથી મુંબઈમાં રહે છે અને સમયાંતરે ઉત્તર પ્રદેશના અલગ-અલગ જિલ્લાઓમાં તેમના ઘરે આવે છે. મુંબઈમાં, ઉદ્યોગ, સેવા ક્ષેત્ર, છૂટક વેપાર, પરિવહન, ખાદ્યપદાર્થો, કારખાના અથવા મિલ જેવા ઘણા ક્ષેત્રોમાં યુપીના લોકોનું નોંધપાત્ર યોગદાન છે. એવા ઘણા વિસ્તારો છે જ્યાં તેઓ મુંબઈના રહેવાસીઓના જીવનમાં મોટી ભૂમિકા ભજવે છે.

યુપીના લોકો ઉદ્યોગ અને સ્ટાર્ટઅપના ક્ષેત્રમાં આગળ

ઉદ્યોગ અને સ્ટાર્ટઅપના ક્ષેત્રમાં પણ યુપીના રહેવાસીઓએ મુંબઈમાં નોંધપાત્ર કામગીરી કરી છે. ઈન્ફોર્મેશન ટેક્નોલોજી, ફિલ્મ, ટેલિવિઝન, મેન્યુફેક્ચરિંગ, ફાઈનાન્સ, ફૂડ પ્રોસેસિંગ વગેરે જેવા ઉદ્યોગોમાં યુપીના ઉદ્યોગ સાહસિકોનું મોટું યોગદાન છે. તેની સાથે જ મુંબઈમાં અસંગઠિત ક્ષેત્રમાં પણ મોટી સંખ્યામાં યુપીના કામદારો કામ કરી રહ્યા છે. છેલ્લા બે વર્ષમાં, કોવિડ આપત્તિ અને લોકડાઉનને કારણે, તેમાંથી મોટી સંખ્યામાં મુંબઈથી તેમના વતન યુપીમાં પાછા આવવું પડ્યું હતું.

સૂચિત કાર્યાલય દ્વારા મુંબઈમાં રહેતા યુપીના રહેવાસીઓને ઉત્તર પ્રદેશમાં પ્રવાસન, સંસ્કૃતિ અને અન્ય ક્ષેત્રોમાં રોકાણની શક્યતાઓથી વાકેફ કરવામાં આવશે અને તેઓને અહીં ઉદ્યોગો સ્થાપવા માટે પ્રેરિત કરવામાં આવશે. આગામી BMC અને અન્ય નાગરિક ચૂંટણીઓમાં, ભાજપ વધુને વધુ ઉત્તર ભારતીય મતદારોને પોતાની તરફ આકર્ષવા માંગે છે. આથી ભાજપે પણ તેના પ્રયાસો શરૂ કરી દીધા છે. આ દીશામાં તેમનું આ પ્રથમ પગલું જણાય રહ્યું છે.