દાઉદ ઈબ્રાહિમ સાથે જોડાયેલા 15 લોકોની પૂછપરછ, NIAએ આજે પણ બોલાવ્યા, મુંબઈમાંથી ડી કંપનીનો સફાયો?
ગઈ કાલે દાઉદ ઈબ્રાહિમ (Dawood Ibrahim D Company) સાથે જોડાયેલા 29 સ્થળો પર દરોડા પાડવામાં આવ્યા હતા. NIAની આ મોટી કાર્યવાહીમાં કુલ 15 લોકોની પૂછપરછ કરવામાં આવી હતી. તેમને આજે પણ પૂછપરછ માટે બોલાવવામાં આવ્યા છે.
પાકિસ્તાનમાં બેસીને ભારતમાં હવાલા અને ડ્રગ્સનો ધંધો ચલાવનાર અંડરવર્લ્ડ ડોન દાઉદ ઈબ્રાહીમ (Dawood Ibrahim D Company) સાથે જોડાયેલા 29 સ્થળો પર ગઈકાલે દરોડા પાડવામાં આવ્યા હતા. મુંબઈમાં (Mumbai) નાગપાડા, મુંબ્રા, માહિમ, ભીંડી બજાર, સાંતાક્રુઝ, ગોરેગાંવ, બોરીવલી, ભિવંડી જેવા વિવિધ સ્થળોએ નેશનલ ઈન્વેસ્ટિગેશન એજન્સી (NIA)એ આ મોટા ઓપરેશનમાં કુલ 15 લોકોની પૂછપરછ કરી હતી. તેમને આજે પણ પૂછપરછ માટે બોલાવવામાં આવ્યા છે. જો કે હજુ સુધી કોઈની ધરપકડ કરવામાં આવી નથી.
અટકાયત કરાયેલા લોકોમાં દાઉદ ઈબ્રાહિમનો જમણો હાથ છોટા શકીલનો સાળો સલીમ કુરેશી ઉર્ફે સલીમ ફ્રુટનો અને મુંબઈના પ્રખ્યાત હાજી અલી અને માહિમ દરગાહના ટ્રસ્ટી સોહેલ ખંડવાનીનો સમાવેશ થાય છે. સોહેલ ખંડવાની મહારાષ્ટ્ર સરકારમાં મંત્રી નવાબ મલિકનો બિઝનેસ પાર્ટનર છે. નવાબ મલિક સામે EDની પૂછપરછમાં સલીમ ફ્રુટનું નામ પણ સામે આવ્યું હતું. સલીમ ફ્રુટે નવાબ મલિક વિશે કેટલીક મહત્વપૂર્ણ માહિતી આપી હતી. એવું કહેવાય છે કે સલીમ ફ્રૂટ અને તલોજા જેલમાં રહેલા દાઉદ ઈબ્રાહિમના ભાઈ ઈકબાલ કાસકરના ઈનપુટ્સ દ્વારા નવાબ મલિક વિરુદ્ધ ચાર્જશીટ તૈયાર કરવામાં EDને ઘણી મદદ મળી હતી.
આ લોકોની પૂછપરછ કરવામાં આવી, ડી કંપની વિશે શું કડીઓ મળી?
સોહેલ ખંડવાણી અને સલીમ ફ્રુટ ઉપરાંત જેઓની અટકાયત કરીને પૂછપરછ કરવામાં આવી તેમાં અબ્દુલ કયૂમ, સમીર હિંગોરા, મોબીદા ભીવંડીવાલા, ગુડ્ડુ પઠાણના નામનો સમાવેશ થાય છે. બાબા ફાલુદાના માલિક અસલમ સરોદિયાના ઘર પર પણ દરોડા પાડવામાં આવ્યા હતા. બુકીમાંથી બિલ્ડર બનેલા અજય ગોસાલિયાના ઘરની પણ તપાસ લેવામાં આવી હતી અને પૂછપરછ કરવામાં આવી હતી. કહેવામાં આવી રહ્યું છે કે ગઈકાલની કાર્યવાહીમાં NIAએ ડી કંપનીના મુંબઈ નેટવર્કને ખતમ કરી નાખ્યું છે.
મુંબઈમાં 24 સ્થળો અને થાણેમાં 5 સ્થળોએ દરોડા પાડવામાં આવ્યા હતા
ગઈકાલે NIA દ્વારા મુંબઈમાં 24 સ્થળો અને મુંબઈને અડીને આવેલા થાણે જિલ્લાના મીરા રોડ અને ભાયંદર વિસ્તારોમાં 5 સ્થળોએ દરોડા પાડવામાં આવ્યા હતા. NIAએ ફેબ્રુઆરીમાં દાઉદ ઈબ્રાહિમના મુંબઈમાં હવાલા, ડ્રગ્સ, ટેરર ફંડિંગ અને નકલી ચલણના વ્યવહારોના નેટવર્કના સંબંધમાં FIR નોંધી હતી. હવે આ જ કેસના સંદર્ભમાં કાર્યવાહી કરવામાં આવી રહી છે. દાઉદ ઈબ્રાહિમની ડી કંપની માટે આ એક મોટો સેટ બેક માનવામાં આવી રહ્યો છે.
Latest News Updates
