Hyderabadi Baingan Recipe: હૈદરાબાદી બઘારા રીંગણનો અસલી સ્વાદ માણો! સીંગદાણા-તલની ગ્રેવી સાથે બનાવો આ શાહી શાક

ભારતીય રસોડામાં રીંગણનું મહત્વનું સ્થાન છે અને તેમાંથી અનેક પ્રકારની સ્વાદિષ્ટ વાનગીઓ બને છે. સામાન્ય રીતે રીંગણનો ઓળો, ભરેલાં રીંગણ કે રીંગણ ભાજા લોકો ઉત્સાહથી ખાતા હોય છે. આ વાનગીઓમાં સૌથી વિશેષ નામ ‘હૈદરાબાદી બઘારા રીંગણ’ છે, જે તેના અનોખા સ્વાદ અને બનાવવાની રીત માટે ઓળખાય છે. આ હૈદરાબાદની લોકપ્રિય પારંપરિક વાનગી છે, જેને નાના રીંગણ, સીંગદાણા, તલ, નારિયેળ અને મસાલાઓ વડે તૈયાર કરવામાં આવે છે. તેનો ખાટો, તીખો અને હળવો સ્વાદ ભોજનને અનોખો સ્વાદ આપે છે.

જરૂરી સામગ્રી

• 500 ગ્રામ નાના રીંગણ
• 4 થી 5 મોટી ચમચી તેલ
• અડધી નાની ચમચી જીરું
• અડધી નાની ચમચી રાઈ
• 8 થી 10 મીઠા લીમડાના પાન
• 1 ચપટી હળદર પાવડર
• અડધી થી 1 નાની ચમચી લાલ મરચું પાવડર
• સ્વાદાનુસાર મીઠું
• જરૂર મુજબ પાણી
• 2 મોટી ચમચી ઝીણી સમારેલી કોથમીર

ગ્રેવી માટે સામગ્રી

• 3 મોટી ચમચી સીંગદાણા
• 1 મોટી ચમચી સફેદ તલ
• 2 મોટી ચમચી સૂકું નારિયેળ (છીણેલું)
• 2 મધ્યમ કદની ડુંગળી
• 1 ઇંચ આદુનો ટુકડો
• 5 થી 6 લસણની કળીઓ
• અડધી નાની ચમચી જીરું
• 1 નાની ચમચી આખા ધાણા
• 1 મોટી ચમચી આમલીનો પલ્પ (ગર)
• જરૂર મુજબ પાણી

બનાવવાની સરળ રીત

• રીંગણની તૈયારી: સૌપ્રથમ નાના રીંગણને બરાબર ધોઈને સાફ કરી લો. દરેક રીંગણમાં નીચેથી બે એવા કાપા લગાવો કે જેથી દાંડી જોડાયેલી રહે અને રીંગણ છૂટું ન પડે. આમ કરવાથી મસાલો રીંગણની અંદર સુધી પહોંચશે.
• પેસ્ટ તૈયાર કરવી: એક કઢાઈમાં ધીમી આંચ પર સીંગદાણાને સુગંધ આવે ત્યાં સુધી શેકી લો. ત્યારબાદ તલ અને સૂકા નારિયેળને પણ અલગ-અલગ સોનેરી રંગ થાય ત્યાં સુધી શેકી લો. એ જ કઢાઈમાં થોડું તેલ મૂકી ડુંગળી સોનેરી થાય ત્યાં સુધી સાંતળો, પછી આદુ અને લસણ ઉમેરી 1 થી 2 મિનિટ સાંતળી ઠંડુ થવા દો. હવે શેકેલા સીંગદાણા, તલ, નારિયેળ, ડુંગળી-આદુ-લસણ, જીરું અને આખા ધાણાને મિક્સરમાં થોડું પાણી ઉમેરી પીસીને ઘટ્ટ પેસ્ટ બનાવી લો. આમલીને ગરમ પાણીમાં પલાળી તેનો પલ્પ અલગ કાઢી લો.
• રીંગણ તળવા: કઢાઈમાં 2 થી 3 મોટી ચમચી તેલ ગરમ કરી રીંગણને મધ્યમ આંચ પર હળવા સોનેરી અને નરમ થાય ત્યાં સુધી સાંતળીને એક વાસણમાં કાઢી લો.
• ગ્રેવી પકવવી: કઢાઈમાં વધેલા તેલમાં રાઈ, જીરું અને લીમડાનો વઘાર કરો. ત્યારબાદ તૈયાર કરેલી પેસ્ટ ઉમેરી ધીમી આંચ પર 5 થી 7 મિનિટ સાંતળો. તેમાં હળદર, લાલ મરચું અને મીઠું ઉમેરો. મસાલો ચોંટે તો જરૂર મુજબ થોડું પાણી ઉમેરતા રહો.
• મિશ્રણ અને સર્વિંગ: ગ્રેવીમાં આમલીનો પલ્પ અને 1 થી દોઢ કપ પાણી ઉમેરી બરાબર મિક્સ કરો. સાંતળેલા રીંગણ તેમાં ઉમેરી ઢાંકીને ધીમી આંચ પર 15 થી 20 મિનિટ ચડવા દો. ગ્રેવી ઘટ્ટ થાય અને રીંગણ એકદમ નરમ થઈ જાય એટલે ગેસ બંધ કરો. ઉપરથી ઝીણી સમારેલી કોથમીર ભભરાવી તેને રોટલી, પરાઠા, નાન કે ભાત સાથે પીરસો.

દુનિયાના કેટલા મુસ્લિમ દેશોમાં ઉજવાય છે દિવાળી ? ક્યાં-ક્યાં હોય છે સત્તાવાર સરકારી રજા, જાણો સમગ્ર વિગત