VIDEO: પરિવારની છત્રછાયા ગુમાવનારી 45 દિવસની બાળકીને મળ્યા પાલક માતા-પિતા

એ માત્ર 45 દિવસની હતી જ્યારે 16 જાન્યુઆરી 2019ના દિવસેએ ગોઝારો બનાવ બન્યો. સુરતના વેલંજા વિસ્તારમાં રહેતા મૂળ અમરેલીના કોલડીયા પરિવાર ગેસ લિકેજથી થયેલા બ્લાસ્ટમાં ભડથું થઈ ગયો હતો. બચી હતી તો માત્ર 45 દિવસની હેની. પરિવારની છત્રછાયા ગુમાવનાર હેની માટે કોઈ બચ્યું ન હતું પણ તેની વ્હારે આવ્યા એવા પાલક મા-બાપ જેણે હેનીની જિંદગીમાં નવું અજવાળું પાથર્યું.

ભાવેશ કોલડીયા અને તેમના પત્ની દક્ષાબેન કોલડીયાના બીજા લગ્ન બાદ સંતાનમાં દીકરીના આવવાથી ખૂબ ખુશ હતા. દીકરીના જન્મ બાદ આ પરિવાર સંપૂર્ણ થયો હતો પણ તેમની આ ખુશી બહુ લાંબી ન ટકી.  16 જાન્યુઆરીએ ઘરમાં ગેસ સિલિન્ડર ન હોવાથી નજીકમાંથી ગેસ બોટલ લઈ આવ્યા હતા. સવારે ચા મુકવા દક્ષાબેન કિચનમાં ગયા ત્યારે ભાવેશભાઈ બજાર જવાની તૈયારી કરી રહ્યા હતા. તેમનો 5 વર્ષનો દીકરો નીરવ અને સાસુ કપિલાબેન પણ ઓરડામાં હતા અને 45 દિવસની હેની પલંગ પર સુઈ રહી હતી.

દીવાસળી ચાંપતા જ ગેસ લિકેજના કારણે ફ્લેશ ફાયરથી પ્રચંડ ધડાકા સાથે આગ પ્રસરી હતી. જેમાં તમામ સભ્યો આગની લપેટમાં આવી ગયા હતા. પિતા ભાવેશભાઈએ માસૂમ હેનીને બચાવવા ઢાળ બનીને સુઈ ગયા પણ આગની જ્વાળાના લીધે હેનીનો ચહેરો ગંભીર રીતે દાઝી ગયો હતો. તે બાદ હેનીએ ભાઈ,નાની અને માતાપિતાની છત્રછાયા ગુમાવી હતી. એ દિવસ પછી હેનીનો રખેવાળ કોઈ નહોતું.  હેનીના જીવનમાં અંધકાર છવાઈ ગયો હતો.  દુર્ઘટનામાં દાઝેલી હેનીનો ચહેરો એ હદે દાઝી ગયો હતો કે તે જીવશે કે નહીં તે કહેવું પણ મુશ્કેલ હતું.  એટલું જ નહિ પણ તેની સારવાર પણ ખૂબ ખર્ચાળ પુરવાર થશે તેવી વાત તબીબોએ કરી હતી.

જોકે આવા કપરા સમયમાં હેનીના જીવનમાં આવ્યા એવા પાલક માતા પિતા જેઓ પોતે 10 વર્ષથી સંતાનસુખથી વંચિત હતા. પારિવારિક મિત્ર એવા નિલેશ લીંબાચીયા અને કાજલબેને આજે આ દીકરીને મોટી કરી છે.  મોત નજીક દેખાતા હેનીને જન્મ આપનારી માતા દક્ષાબેનની અંતિમ ઈચ્છા હતી કે હેનીની દેખરેખ તેઓ રાખે. જેથી મિત્રધર્મ નિભાવી હેનીને આ ઘટના પછી દત્તક લીધી અને આજે તેઓ તેને સગા મા બાપ કરતા પણ વધુ પ્રેમ આપી રહ્યા છે.

હેનીની સારવાર માટે તેમણે ક્યારેય પીછેહઠ નહિ કરી.  સારવાર માટે તેમણે 8 મહિનાથી ધંધો બંધ કરી દીધો.  ઘરેણાં વેચી કાઢ્યા, ઘરવખરી વેચી નાંખી. આજે પણ હેનીની સારવાર અને દવા પાછળ 35 હજાર જેટલો ખર્ચો થાય છે પણ હેનીને સંપૂર્ણ સાજી કરવા આ દંપતિએ નિર્ધાર કર્યો છે. તે માટે તેઓ ગમે તે કરવા તૈયાર છે. હેનીના પાલક માતા કાજલબેનની આંખ હવે ખુશીના આંસુથી છલકાય છે.  જ્યારે ઘરમાં એક સંતાનની કમી હવે પુરી થઈ ગઈ છે. હેનીને રમકડાથી રમતી જોઈ બંને માતાપિતા સ્વર્ગનો અનુભવ કરે છે.

રોચક VIDEO જોવા માટે TV9Gujaratiના YOUTUBE પેજને SUBSCRIBE કરો