વોડકા મર્દાનગીને અસર કરે છે? શું તે માત્ર મહિલાઓ માટેનું જ પીણું છે, જાણો શું કહે છે રીસર્ચ

ભારત(India) એવો દેશ છે જ્યાં ‘मर्द को दर्द नहीं होता’. અહીં સામાન્ય લોકો માટે પાણી છે, જ્યારે ‘शेरों की प्यास’ છીપાવવા માટે બજારમાં ઘણું બધું ઉપલબ્ધ છે. સોડાની બોટલ પર ‘चीता भी पीता है’ એવા ટેગ લાઇનથી વહેચાય છે અને લોકો આવા ડ્રિન્કને પણ મર્દાનગી સાથે જોડીને જુએ છે. આપણે અહીં દારૂની વાત કરવાની છે. દારૂને લોકો સીધુ મર્દાનગી સાથે જોડે છે. જોકે માત્ર પુરૂષ નહીં પરંતુ આજકાલ મહિલાઓમાં પણ આલ્કોહોલ સેવનનું પ્રમાણ વધવા લાગ્યુ છે અને આ કારણે જ કેટલાક મીથ પણ સામે આવ્યા છે. ભારતીય સમાજમાં આલ્કોહોલના સેવનને લઈને પ્રચલિત ઘણી માન્યતાઓમાંની એક એ છે કે વોડકા (Vodka) એ સ્ત્રીઓની પસંદગી છે અને પુરુષોએ તેને પીવું જોઈએ નહીં.

એવો દાવો કરવામાં આવે છે કે વોડકાનું સેવન પુરુષોના ‘પુરુષત્વ’ એટલે કે પ્રજનન ક્ષમતાને નુકસાન પહોંચાડે છે. એવું કહેવાય છે કે વોડકા પીવાથી શરીરમાં શુક્રાણુઓ ઘટવા લાગે છે. આવી સ્થિતિમાં મહિલાઓ માટે માત્ર તેને પીવું સલામત છે. જો આ દાવાઓ પર વિશ્વાસ કરવામાં આવે તો શું તેનો અર્થ એવો થાય કે વોડકા સિવાય આલ્કોહોલિક પીણાં જેમ કે વ્હિસ્કી, જિન, રમ, રેડ વાઈન વગેરે પુરૂષો માટે સંપૂર્ણપણે સલામત છે? આવો જાણીએ આ વાતોમાં કેટલી સત્યતા છે.

વોડકા ખરેખર મહિલા માટેનું પીણું છે?

લોકોના વ્યક્તિત્વને તેમની દારૂની પસંદગી અને તેની કિંમતના આધારે નક્કી કરવું એ સામાન્ય માનવીય વર્તન છે. વોડકાને મહિલાઓનું પીણું માનવામાં આવે છે તેનું એક કારણ એ છે કે લોકો ઘણી વાર મહિલાઓને જાહેર કાર્યક્રમોમાં વિવિધ પ્રકારના સોડા, જ્યુસ અથવા એનર્જી ડ્રિંક્સ સાથે વોડકા પીતા જુએ છે. વોડકા પારદર્શક હોય છે અને તેમાં ઉમેરવામાં આવેલા જ્યુસ અથવા અન્ય પ્રવાહીના સ્વાદને તે સરળતાથી સ્વીકારી લે છે.

તેનાથી વિપરિત, એવી ધારણા છે કે પુરુષો તેમના ડ્રિન્કમાં વધુ પડતુ જ્યુસ સોડા, કે પાણી ઉમેરવાનું પસંદ કરતા નથી. જો કે, વોડકા માત્ર મહિલાઓ માટે છે, તેમાં કોઈ સત્ય નથી. વિશ્વમાં એવા પુરુષોની નોંધપાત્ર સંખ્યા છે જેઓ વોડકા પ્રેમીઓ છે. મર્દાનગીનું મોટું પ્રતિક બની ગયેલા ફિલ્મી પાત્ર જેમ્સ બોન્ડ પણ વોડકા માર્ટીનીના ચાહક છે. સામાન્ય રીતે મહિલાઓને તેમના ડ્રિંક્સમાં સોડા, જ્યુસ, કોલ્ડ ડ્રિંક્સ વગેરે પીતી જોઈને વોડકાને ‘જનના ડ્રિંક’ તરીકે માનવું સંપૂર્ણપણે ખોટું છે. તે એક સાર્વત્રિક પીણું છે જે યુવાન અને વૃદ્ધો, તમામ ઉંમરના પુરુષો અને સ્ત્રીઓ દ્વારા પ્રિય છે.

માત્ર વોડકા જ નહીં, કોઈપણ આલ્કોહોલ પુરુષત્વ પર ખરાબ અસર કરે છે

ડોકટરો અને તબીબી નિષ્ણાતો માને છે કે માત્ર વોડકા જ નહીં કોઈપણ પ્રકારનો આલ્કોહોલ પુરુષોની પ્રજનન ક્ષમતા પર ખરાબ અસર કરે છે. આવી સ્થિતિમાં, વધુ પડતા આલ્કોહોલના સેવનને કારણે શુક્રાણુઓની સંખ્યામાં ઘટાડો અથવા જાતીય અક્ષમતા જેવી સમસ્યાઓ થવાની સંપૂર્ણ શક્યતા છે. તબીબી નિષ્ણાતોનું કહેવું છે કે દારૂ પીવાની અસર શુક્રાણુના આકાર, કદ, સંખ્યા અને ગતિશીલતા પર પડે છે.

ખરેખર, શુક્રાણુના નિર્માણ અને વિકાસમાં પુરૂષ હોર્મોન ટેસ્ટોસ્ટેરોનની મોટી ભૂમિકા હોય છે. વધુ પડતા આલ્કોહોલ પીવાથી ટેસ્ટોસ્ટેરોનના સ્તર પર ખરાબ અસર પડે છે, જેના કારણે માનવ શરીરમાં શુક્રાણુઓનું ઉત્પાદન ઘટી જાય છે. તેથી ધ્યાનમાં રાખો, કોઈપણ પ્રકારનો દારૂ ‘પુરુષત્વ’ માટે ખતરો છે. માત્ર વોડકાને દોષ આપવો બિલકુલ યોગ્ય નથી. આ રશિયાનું ‘નેશનલ ડ્રિંક’ છે. જો તેમાં આવી ખામી હોત, તો તે રશિયન સંસ્કૃતિનું પ્રતીક ન બની શક્યું હોત.

સંશોધન શું કહે છે?

થોડા વર્ષો પહેલા, ધ ગાર્ડિયન પર પ્રકાશિત થયેલા એક અહેવાલમાં સંશોધનને ટાંકીને કહેવામાં આવ્યું હતું કે દર અઠવાડિયે 5 યુનિટ આલ્કોહોલનું સેવન પુરુષોના શુક્રાણુઓની ગુણવત્તાને અસર કરે છે. રિસર્ચ અનુસાર આનાથી વધુ પ્રમાણમાં આલ્કોહોલનું સેવન કરવાથી સ્પર્મની ગુણવત્તા ખરાબ થઈ જાય છે. સંશોધકોએ પ્રજનનક્ષમ વયના પુરુષોને આલ્કોહોલથી દૂર રહેવાની ચેતવણી પણ આપી હતી. આ અભ્યાસ BMJ જર્નલમાં પ્રકાશિત થયો હતો, જે ડેનિશ સૈન્યના 18 થી 28 વર્ષની વયના 1200 પુરુષો પર કરવામાં આવેલા સંશોધનના આધારે તૈયાર કરવામાં આવ્યો હતો.

જેઓ પિતા બનવા માંગે છે તેમને સામાન્ય રીતે દારૂથી દૂર રહેવાની સૂચના આપવામાં આવે છે. તેનાથી વિપરીત, જો કે, 2018 માં મેન્સ હેલ્થમાં પ્રકાશિત થયેલા એક લેખમાં એક અભ્યાસ ટાંકવામાં આવ્યો હતો જેમાં જાણવા મળ્યું હતું કે મધ્યસ્થતામાં આલ્કોહોલ પીવાથી બિન-પીનારાઓની તુલનામાં પુરુષોમાં પ્રજનન ક્ષમતા વધે છે. આ અભ્યાસ એક જર્નલ એન્ડ્રોલોજીમાં પ્રકાશિત થયો હતો, જે 323 પુખ્ત પુરુષો પર કરવામાં આવેલા સંશોધનના આધારે તૈયાર કરવામાં આવ્યો હતો.